THINGS WEY FIT HELP FAMILY
Teach Your Children About Alcohol
“Our daughter dey six years old when we first talk with-am about alcohol. E surprise us say e know plenty things about alcohol pass as we think.”—Alexander.
Wetin you need to know
E dey important to teach children about alcohol. No wait until your pikin dey around 13 to 19 years before you go start to teach-am about alcohol. One papa wey de live for Russia wey im name Khamit talk say: “I wish say we don teach our son when e still dey small about how to use alcohol for the correct way. The problem wey we face later come make me know why this one dey important. I come see say my son don de drink alcohol well-well when e dey 13 years.”
Why you suppose worry about this matter?
Your pikin classmate, things wey them de advertise, and other things wey them de show for TV fit affect how your pikin de see alcohol.
The U.S. Centers for Disease Control and Prevention talk say small children for United States de drink 11 percent of all the alcohol wey people de drink for the country.
Because of this one, e no surprise us say doctors de advice papa and mama say make them teach their children from when them still small about the problem wey fit come because of alcohol. How them go fit do this one?
Wetin you fit do
Think of some question wey your pikin fit ask about alcohol. Small children de ask plenty questions. And as them de grow, them de even ask question more-more. Because of this one, you need to prepare how you go answer when them go ask you question. For example:
If your pikin de ask which kind taste alcohol get, you fit tell-am say wine be like juice wey sour small, and beer be like say e bitter.
If your pikin want taste alcohol, you fit tell-am say alcohol no good for children body. Tell-am how alcohol de affect people: Alcohol fit make person relax but if you take-am too much, e fit make eye turn you, and e fit make you behave anyhow and do things wey you go later regret.—Proverbs 23:29-35.
Learn about-am. Bible talk say: “Wise person de use sense do something.” (Proverbs 13:16) Know how alcohol de affect person and know the law wey government put about the age wey person fit start to drink alcohol for your country. This one go help you ready yourself to fit help your pikin.
Make you be the first person wey go start to talk about this matter. One papa for Britain wey im name na Mark talk say: “Children no know the reason why them no suppose drink alcohol and how e de affect people wey drink-am. I ask my son wey dey eight years whether to drink alcohol good or bad. I try to talk this matter the way my pikin go dey free to talk wetin dey im mind.”
You go help your children know how serious the matter be if you talk-am for different-different time. Base on the age wey your pikin dey, de talk about alcohol as you de teach-am about other matter wey e need to know about life, like sex matter and how e fit dey safe when e de waka for road.
Show better example. Children be like sponge. Just like sponge de quick soak water, na so children de quick learn things wey de happen around them. Research show say na papa and mama children de quick learn from pass. This one mean say if alcohol na the main thing wey de make your mind come down or relax, your pikin go think say na alcohol be the solution to all worry-worry wey people de face for life. So make you be better example for your pikin. Make sure say you use alcohol for the correct way.
Your children go learn from the way you de drink alcohol