Wetin You Fit Do Make Phone No Cause Problem for Your Marriage

The way you de use phone fit make your marriage sweet well-well or e fit cause problem for your marriage. How this one de affect your marriage?

• Wetin you need to know

• Wetin you fit do

• Wetin some husband and wife talk

• Question wey husband and wife go talk about

Wetin you need to know

• To use phone with sense fit make marriage sweet well-well. For example, some husband and wife de use their phone talk and send message to each other when them no dey together.

  

  “Small text message wey talk say ‘I love you’ or ‘I de think of you’ fit make una love for each other de strong more-more.”​—Jonathan.

• When husband and wife no use phone with sense this one fit affect their marriage. For example, some people de press their phone everytime and this one de reduce the time wey them suppose spend together as husband and wife.

  “I know say e get some time wey my husband for really like to talk with me if to say I know de press my phone.”​—Julissa.

• Some people talk say them fit de press their phone and still de talk about serious matter with their husband or wife at the same time. Sherry Turkle wey study about how human being de behave talk say, “this one na the lie wey people de tell theirself.” Even though say people think say them fit do plenty things at the same time, this one no be better thing. Sherry Turkle still talk say “the more we de try to do plenty things at the same time the more we go de make mistake.”a

  “To talk with my husband de sweet me well-well, but no be when e de press im phone and still want talk with me. When my husband de do plenty things at the same time, this one de make me feel say e no care if I dey there.”​—Sarah.

The main point: The way you de use phone fit make you enjoy your marriage well-well or e fit cause problem for your marriage.

Wetin you fit do

Know wetin dey important pass. Bible talk say: “Make sure say una de choose the things wey dey important pass.” (Philippians 1:10) Ask yourself say, ‘The time wey me and my husband or wife de spend to press phone de reduce the time wey we suppose spend together as husband and wife?’

“E no good to see man and woman wey busy de press their phone as them de chop together restaurant. We no want become slave to our phone and forget wetin dey important pass, wey be our friendship with each other.”​—Matthew.

Get time wey you go de use phone. Bible talk say: “So make una de really watch how una de live make e no be as people wey no get sense, but make e be as people wey get sense. And make una de use una time well.” (Ephesians 5:15, 16) Ask yourself say, ‘Instead make I de check all the message as them de enter my phone, I fit get time wey I go de use read and check them?’

“To de put my phone for silent don really help me de check the message wey I receive for another time. E no de too happen say I must quick-quick answer the call, reply the message, or email wey enter my phone.”​—Jonathan.

If e dey possible, no carry work come house. Bible talk say: “Everything get e own time.” (Ecclesiastes 3:1) Ask yourself this question: ‘I de allow my work to reduce the time wey I de spend with my family, because I de use my phone do things wey concern my work for house? If I de do this kind thing, how this one de affect my marriage? If them ask my husband or wife this question, wetin e go talk?’

“Because of computer and other things, we fit do our work anytime and for anywhere. I don try my best make I no de check my phone everytime and de do things wey concern my work when I dey with my wife.”​—Matthew.

Make una talk about how una go de use phone. Bible talk say: “Make each person no de look for wetin go benefit only imself, but make e be wetin go benefit another person too” (1 Corinthians 10:24) Make una talk about how una de use phone and if need dey, make una adjust. Una fit use the part for this article wey be question wey husband and wife go talk about to do this one.

“Me and my husband de tell each other the truth and we no de keep quiet when one of us don de use im phone or computer too much. We know say this one fit cause problem for us, so we de try understand how each of us de feel when we de talk about the matter.”​—Danielle.

The main point: Make sure say your phone na your servant, no allow-am control you.