Serious Bad Weather Wey De Happen—Bible Fit Help You Cope?
You de among the millions of people wey serious bad weather de affect? Bad weather wey de put people life for danger, de happen for different-different way. For example, hurricane, typhoon, cyclone, and tornado most times de make water for sea overfull and flow enter land. Heavy rain fit cause erosion wey de make ground open, and strong breeze with rain fit cause lightning and thunder wey fit cause fire wey de destroy things. Serious dry season, hot weather, and serious cold weather fit still cause plenty problem.
For different-different place for this world disaster wey bad weather cause de happen now pass before and de cause problem more-more. The International Federation of Red Cross and Red Crescent Society talk say: “The number of people wey disaster de affect continue to de increase as flood, strong breeze with rain and serious dry season de happen more-more. Because of this one every year many people de die, them no get place to stay and even to survive na wahala.”
When this kind things happen people de suffer well-well. Them de suffer no be because of only their property wey loss, their house or their person wey them love wey die, but e still de affect how them de feel.
If you don suffer because of serious bad weather, wetin Bible talk fit help you. The things wey Bible talk go make your mind come down, give you hope, and give you better advice, wey don help people wey don suffer for matter wey concern disaster. (Romans 15:4) E still de answer important question wey many people de ask theirself say: Why God allow make this kind thing happen—e de use-am punish me?
Serious bad weather for this our time no be punishment from God
Bible de teach say no be God de cause the suffer wey people de suffer today. E make us de sure say “person no fit use bad things test God, and God too no de test anybody.” (James 1:13) This one mean say no be God de cause the bad weather wey de make people suffer today.
Na true say Bible talk about some times when God use the things wey e make take punish wicked people. But the way e use-am dey different from the way bad weather de destroy things today, wey de happen without warning and de affect good and bad people. Bible show say God de always protect good people, de warn people, and explain the reason why e do wetin e do. For example, God talk why e bring heavy rain wey cause Flood for Noah time, e warn people before e do-am, and e save Noah and im family.—Genesis 6:13; 2 Peter 2:5.
To learn more about how we fit know say the natural disaster wey de happen today no be punishment from God, read the article wey the title na, “Wetin Bible Talk About Natural Disaster?”
God care about people wey serious bad weather de affect
Bible show say Jehovaha God de care and pity for people. See some Bible verse wey show this one.
Isaiah 63:9: “For all the time wey them dey for problem, [God] de feel their pain.”
Wetin e mean: E de really pain Jehovah when people de suffer.
1 Peter 5:7: “E de care about [you].”
Wetin e mean: Jehovah care about how you de feel.
Because Jehovah care and de pity for people, this one de make-am want do something to help them. E de use Bible give better advice wey de make people mind come down and de give correct hope say for future disaster wey bad weather de cause no go dey again.—2 Corinthians 1:3, 4.
Time de come when serious bad weather no go be problem again
Bible talk wetin Jehovah promise, say E go “give [you] hope and correct future.” (Jeremiah 29:11) E want make people enjoy life for paradise for this earth and no fear say the weather go cause wahala.—Genesis 1:28; 2:15; Isaiah 32:18.
God go use im Kingdom wey dey heaven wey Jesus de rule bring that better future. (Matthew 6:10) Jesus get the sense and power wey e need to stop bad weather. When Jesus dey this earth, e show say e get power to control weather. (Mark 4:37-41) E go rule for way wey show say e get sense and understand how things be. Jesus go teach people how to care for the earth and no do things wey go spoil-am. (Isaiah 11:2) When Jesus de rule, people no go ever suffer because of bad weather again.
You fit de wonder say, ‘Which time Jesus go use im power control weather?’ To answer this question, read the article wey the title na, “When Will God’s Kingdom Rule the Earth?” (For English)
Things wey we fit do to prepare for serious bad weather
Bible advice fit help you before e happen, when e de happen, and after e don happen.
Before e happen: Ready to do something quick-quick.
See wetin Bible talk: “When person get sense, e go see danger and hide. But when person no get sense e go just de go, and e go suffer the result.”—Proverbs 22:3.
Wetin e mean: Know the kind disaster wey fit happen for your area so that you fit do something quick-quick to protect yourself and your family.
Experience: “The day wey we escape the wildfire wey happen, we don ready our go bags, our medicine and our clothes. People just de panic because them confuse and no know wetin to do. But we don get everything wey we need, and this one really make me happy!”—Tamara, California, U.S.A.
When e de happen: Put mind for wetin dey important pass.
See wetin Bible talk: “Even when person get plenty things, no be the things wey e get de give-am life.”—Luke 12:15.
Wetin e mean: Life dey important well-well pass property.
Experience: “When Typhoon Lawinb scatter our house, I no fit think well and I no know wetin I go do. But one thing wey I do na to really pray to Jehovah. I happy say nobody die but na only money and property loss.”—Leslie, Philippines.
After e don happen: Put mind for today, no worry about tomorrow.
See wetin Bible talk: “Make una no de overworry about tomorrow, because tomorrow still get things to worry about.”—Matthew 6:34.
Wetin e mean: No de overworry about problem wey fit happen for future.
Experience: “After Hurricane Irma make flood carry our house, plenty things come dey wey we need to decide and stress finish me no be small. I try follow the advice for Bible wey talk say make we no de overworry about tomorrow. I come see say Jehovah fit help me do more pass wetin I think say I fit do.”—Sally, Florida, U.S.A.
To get more advice wey fit help you, read the article wey the title na “When Disaster Strikes—Steps That Can Save Lives.” (For English)