Jehovah De Protect and Care for E People

1. Why Jesus beg Jehovah to protect and care for e disciples?

THE night before Jesus die, e pray one special prayer. E beg Jehovah say make e protect and care for e disciples. (John 17:15, 20) Na true say Jehovah de always protect and care for e people, but Jesus know say Satan no go pity for them when e de attack them. Jesus still know say they go need Jehovah help to fit fight all the wicked attack from Satan.

2. From wetin Psalm 33:18-20 talk, why we no suppose fear when we de face problem?

² This world wey Satan de control de give servant of Jehovah plenty problem. We de face problem wey fit make life tire us and even shake our faith. But for this article, we go see reason why we no suppose fear Satan attack. Jehovah de always care for us! E de see all the problem wey we de face and e always ready to help us. Make we see two example from Bible wey show how Jehovah de protect and care “for people wey de fear-am.”—Read Psalm 33:18-20.

JEHOVAH DE HELP US EVEN WHEN WE DE FEEL SAY NOBODY CARE ABOUT US

3. Sometimes, why we fit de feel say nobody care about us?

³ Even though say we get plenty brothers and sisters for congregation, sometimes we fit still feel say nobody care about us. For example, young people fit de feel say they no get anybody to help them when them de explain their belief for school, or feel say they no get anybody when they move go another congregation. Sometimes we fit de feel bad and no happy, and we fit even feel say we no get anybody to help us. E fit hard us to tell people wetin dey our mind because we de feel say they no go understand. And sometimes, we fit even think say nobody really care about us. If we de feel say nobody care about us, e fit make us lose hope and de worry more-more. Jehovah no want make we ever feel like that. Why we talk so?

4. Why prophet Elijah talk say: “Na only me remain”?

⁴ Think about prophet Elijah. Na better servant of God wey really worship Jehovah well. When Jezebel swear say e go kill-am, e run for e life for 40 days. (1 Ki. 19:1-9) When e dey alone for inside cave, e cry to Jehovah say: “Na me be the only [prophet] wey remain.” (1 Ki. 19:10) Other prophet still dey for Israel because Obadiah don save other 100 prophet so that Jezebel no go kill them. (1 Ki. 18:7, 13) So why Elijah feel say e dey alone? Maybe e de feel say Jezebel don kill the other prophet wey Obadiah save. E fit even be say na because other people no join-am de worship Jehovah after wetin happen for Mount Carmel. Or e de feel say nobody care or know the kind danger wey e dey as Jezebel de try to kill-am. Bible no talk everything about how Elijah de feel. But wetin we dey sure of be say, Jehovah understand why Elijah feel say na only e remain, and e know the best way to help Elijah.

5. Wetin Jehovah do to make Elijah know say e no dey alone?

⁵ Jehovah do plenty things to help Elijah. E ask Elijah question so that Elijah go talk wetin dey e mind. E ask Elijah two times say: “Wetin you de do for here?” (1 Ki. 19:9, 13) Jehovah sofri listen to Elijah as e de talk how e de feel. Jehovah help Elijah know say E dey with-am, and say E really get power. E still let Elijah know say plenty people for Israel, still de worship Jehovah. (1 Ki. 19:11, 12, 18) Elijah mind go don come down after e tell Jehovah how e de feel, and after e hear wetin Jehovah talk. Jehovah give Elijah some important work to do. E send Elijah say make e anoint Hazael as king for Syria, Jehu as king for Israel, and Elisha as prophet. (1 Ki. 19:15, 16) Jehovah help Elijah put mind for better things as e give Elijah all this work. Jehovah still give Elijah better friend wey go de work with-am, e name na Elisha. How Jehovah fit help you when you de feel say nobody care about you?

6. Wetin you fit pray about when you de feel say nobody care about you? (Psalm 62:8)

⁶ Jehovah want make you pray to-am. E de see the problem wey you de struggle with, and e want make you always remember say e ready to listen to your prayer any time. (1 Thess. 5:17) E de happy to listen to our prayer. (Prov. 15:8) When you de feel say nobody care about you, wetin you fit pray about? Just like Elijah, tell Jehovah everything wey dey your mind. (Read Psalm 62:8.) Tell Jehovah the things wey de worry you for mind and how them de make you feel. Beg Jehovah say make e help you know wetin you go do when you no dey happy or de feel say nobody care about you. For example, if you de fear when your classmate ask you question about your belief, beg Jehovah make e give you strong mind to fit answer them. You fit still tell-am to help you fit use sense explain your belief to them. (Luke 21:14, 15) If something de make you feel bad, beg Jehovah make e help you fit talk to mature person for congregation wey get strong faith. You fit beg Jehovah make e help the person wey you want talk to, make e understand how you de feel. So tell Jehovah everything wey dey your mind, try see how e de answer your prayer, and allow people help you. This one go really help you when you de feel say nobody care about you.

7. Wetin Mauricio example teach you?

⁷ Jehovah don give all of us better work. Make you always remember say Jehovah de see and e dey happy with you for all the things wey you de do for congregation and the preaching work. (Ps. 110:3) When you de do Jehovah work, how e fit help you when you de feel say nobody care about you? Think about the example of one young brother wey e name na Mauricio.b Just small time after Mauricio baptize, one of e tight friend start to leave Jehovah small-small. Mauricio talk say: “As I see-am de leave Jehovah, I no come dey sure of myself again. I start to wonder if I go fit do wetin I promise Jehovah and remain part of e family. I feel say na only me dey and nobody fit understand how I de feel.” Wetin help Mauricio? E talk say: “I start to preach pass before, and this one really help me comot mind from wetin de worry me. E de make me happy to preach with brothers and sisters and I stop to de feel say na only me dey.” Even if we no fit preach with our brothers and sisters from house to house, we still dey happy to join them preach with phone or letter. Which other things still help Mauricio? E talk say: “I still do plenty work for congregation. I do my best to prepare and handle part for meeting. This one make me feel say Jehovah and my brothers and sisters really value me.”

JEHOVAH DE HELP US WHEN WE GET SERIOUS PROBLEM

8. How serious problem fit make us feel?

⁸ For this last days, we know say we go face plenty problem. (2 Tim. 3:1) But e fit surprise us when some kind problem wey we no expect happen. We fit start to get problem about money matter, start to suffer from serious sickness, or person wey we love fit even die. When this kind thing happen, e fit make life tire us, especially if e be like say we de go from one problem to another or say we de get plenty problem at the same time. No forget say Jehovah know wetin we de face, and e go fit help us endure any problem.

9. Talk some of the things wey happen to Job.

⁹ Think about how Jehovah help Job. E face different-different problem around the same time. They thief some of e animal and some die, and they kill almost all e servant. The one wey pain pass be say all e children die that same day. (Job 1:13-19) After small time, as Job still de feel the pain of all this problem, sickness come join. And this one na serious sickness wey de spoil person body. (Job 2:7) The condition bad sotey Job talk say: “My life don tire me; I no want continue to live.”—Job 7:16.

10. How Jehovah help Job fit endure e problem? (Check picture for front cover.)

¹⁰ Jehovah see all the things wey happen to Job. Because Jehovah love Job, e give Job wetin e need to continue to hold-am tight. Jehovah talk to Job about the kind deep sense wey E get and how E de care for all the things wey E make. E tell-am about many wonderful animals. (Job 38:1, 2; 39:9, 13, 19, 27; 40:15; 41:1, 2) Jehovah still use Elihu encourage Job and make e mind come down. Elihu still remind Job say Jehovah de always bless e servant wey no tire to endure. But Jehovah still use Elihu sofri correct Job. Elihu help Job stop to think about only e self. And e let Job know say when we compare ourself to Jehovah wey make heaven and earth, we no reach anything. (Job 37:14) Jehovah still give Job work to do, e tell Job say make e pray for e three friends wey don sin. (Job 42:8-10) For this our time, how Jehovah de help us when we de face serious problem?

11. How Bible de help us when we de face problem?

¹¹ Jehovah no de talk to us direct the way e talk to Job, but e de use the things wey e don write for Bible direct and talk to us. (Rom. 15:4) E de make our mind come down with the hope wey e don give us about the future. Think about some things for Bible wey fit make our mind come down when we de face problem. Jehovah don promise us for Bible say nothing, no be even serious problem go “fit separate us from the love wey God get for us.” (Rom. 8:38, 39) E still promise us say e “dey near all the people” wey de pray to-am. (Ps. 145:18) Jehovah don tell us say if we show say we trust-am, e go help us fit manage our problem and we go still dey happy even when we de suffer. (1 Cor. 10:13; Jas. 1:2, 12) As we learn from Bible, our problem na for short time when we compare-am to everlasting life wey God don promise us. (2 Cor. 4:16-18) Jehovah don promise us say e go destroy Satan the Devil and all the people wey de cause problem for this world. (Ps. 37:10) You don cram some Bible verse wey go fit help you endure when you de face problem?

12. Wetin Jehovah want make we do if we want really gain from Bible?

¹² Jehovah want make we always get the time wey we de use study Bible and de think deep about wetin we read. When we de do the things wey we de learn, our faith and friendship with Jehovah go de strong more-more. This one go give us the power to endure our problem. Jehovah de give holy spirit to people wey trust e Word. And the spirit go give us “power wey pass normal power” so that we go fit endure any problem.—2 Cor. 4:7-10.

13. How the things wey Jehovah de use “faithful slave” give us de help us endure problems?

¹³ Jehovah de use “faithful and discreet slave” give us plenty things wey we need, like videos, music, and our book them. (Matt. 24:45) This things de make our faith strong and help us continue to hold Jehovah tight. Make we continue to de use all this things wey Jehovah don give us well. One sister for United States talk say e really happy for this things wey Jehovah de give us. E talk say: “For 40 years wey I don de worship Jehovah, I don face plenty problem wey don really test my faith.” This sister face serious problem. For example, one driver wey drink kill e grandpapa, and e papa and mama sick sotey they die. And e don get cancer two times. Wetin help our sister fit endure all this problem? E talk say: “Jehovah de always take care of me. The things wey e de use faithful and discreet slave give us don help me endure. They don really make me feel like Job wey talk say: ‘I no go ever leave God till I die!’ ”—Job 27:5.

14. How Jehovah de use our brothers and sisters help us when we de face problem? (1 Thessalonians 4:9)

¹⁴ Jehovah don train e people to show love and help each other when them de face problem. (2 Cor. 1:3, 4; read 1 Thessalonians 4:9.) Like Elihu, our brothers and sisters ready to help us continue to hold Jehovah tight when we de face serious problem. (Acts 14:22) For example, think about how brothers and sisters for one congregation help one sister continue to hold Jehovah tight when e husband really sick. The sister name na Diane, e talk say: “Things really hard for us that time, but we see how Jehovah help and support us. Brothers and sisters for our congregation really help us. They visit us, they hug us, and they call us for phone. All this things really help us fit endure our problem. As I no sabi drive, na brothers and sisters de carry me go meeting and preaching.” We dey happy say we get this kind brothers and sisters for congregation!

WE THANK JEHOVAH FOR E LOVE AND THE WAY E DE CARE FOR US

15. Why we de sure say we go fit endure our problem?

¹⁵ All of us go face some kind problem. But as we don learn, we no go dey alone when we de face problem. Jehovah de care for us just like papa wey love e children. Jehovah dey our back, e ready to hear our prayer and e really want support us. (Isa. 43:2) We dey sure say we go fit manage our problem because Jehovah don give us everything wey we need to fit endure. E don give us the chance to de pray to-am, e give us Bible, e de use faithful slave give us plenty things, and e don still give us brothers and sisters wey de help us when we get problem.

16. Wetin we go do if we want make Jehovah continue to care for us?

¹⁶ We really happy say Jehovah wey be our Papa for heaven de care for us! “E de really make us happy.” (Ps. 33:21) We fit show say we like-am as Jehovah de care for us when we de use all the things wey e don give us. We still need to de do wetin go make Jehovah continue to care for us. This one mean say, if we continue to do our best to obey Jehovah and do wetin good for e eye, e go protect and care for us forever!—1 Pet. 3:12.