We Like to Do Wetin Correct for Jehovah Eye

1. Which temptation Joseph face, and wetin e do?

WHEN Joseph dey Potiphar house, e face one serious temptation. When Joseph master wey be Potiphar no dey house, e wife tell Joseph say: “Sleep with me.” But Joseph no gree. Person wey read the story for this our time fit de wonder say, ‘Why Joseph no gree?’ Since e master no dey, e no go know. And as Joseph be slave for e house, this woman fit make life really hard for-am if e no gree do wetin e want. Even though say the woman continue to disturb Joseph, e no ever gree for-am. Why? Joseph talk say: “How I go come do this kind bad thing and sin against God?”—Gen. 39:7-12.

2. How Joseph know say to sleep with another man wife na sin against God?

² This story of Joseph happen more than 200 years before Moses write the Law wey talk say: “Make you no sleep with person wey no be your husband or wife.” (Ex. 20:14) So how Joseph manage know say to sleep with another man wife na “sin against God”? Even though say the Law never dey that time, wetin Joseph know about Jehovah make-am understand say that kind thing no good for E eye. For example, Joseph know say Jehovah make marriage to be for one man and one woman. And e fit don hear how Jehovah save e great-grandmama wey be Sarah, two times when two different king nearly take-am from e husband, Abraham. God still save e grandmama wey be Rebekah when this kind thing happen to-am. (Gen. 2:24; 12:14-20; 20:2-7; 26:6-11) As Joseph think deep about this things, e really help-am know wetin good and wetin bad for God eye. Because Joseph love Jehovah, e make up e mind to de always do wetin correct for Jehovah eye.

3. Wetin we go talk about for this article?

³ You like to do wetin correct for Jehovah eye? We dey sure say your answer na yes. But all of us de make mistake, and if we no dey careful, we fit start to see things like people for the world. (Isa. 5:20; Rom. 12:2) For this article, we go talk about wetin e really mean to do wetin correct for Jehovah eye and wetin we go gain when we love to do-am. We go still talk about three things wey go help us like to do wetin correct for Jehovah eye more-more.

WETIN E REALLY MEAN TO DO WETIN CORRECT FOR JEHOVAH EYE?

4. When people de think about person wey de do wetin correct for God eye, which kind person de come their mind?

⁴ When people de think about person wey de do wetin correct for God eye, the kind person wey de come their mind na person wey dey proud, wey de like to judge people, and wey de feel say e better pass other people. But the truth na say that kind character wey people de think so, no de make Jehovah happy at all! In fact, na this kind character leaders for religion for Jesus time get. But Jesus make-am clear say wetin them de do no good because them de judge other people, and them de make their own law of wetin good and wetin bad. (Eccl. 7:16; Luke 16:15) That kind character no good, because person wey de do wetin correct for God eye no de ever think say e better pass other people.

5. From wetin Bible talk, wetin e mean to do wetin correct for God eye? Give example.

⁵ To do wetin correct for God eye na better thing. This one mean say we go de do wetin Jehovah talk say be the correct thing. Bible help us know say person wey de do wetin correct for Jehovah eye go de follow the law wey Jehovah don set. For example, Jehovah say make people wey de do business de use correct scale for their business. (Deut. 25:15) So any Christian wey want do wetin correct for God eye must always talk true for e business. Person wey like to do wetin correct for God eye go still like to treat people well. E hate to see when people de do partial. And to “fit do wetin [Jehovah] like,” we must de think about how Jehovah go feel about our decision. This one go show say we really de do wetin correct for e eye.—Col. 1:10.

6. Why we fit trust say na only Jehovah get the right to tell us wetin good and wetin bad? (Isaiah 55:8, 9)

⁶ Bible help us know say na Jehovah be the “God wey wetin correct de come from.” (Jer. 50:7) Since na Jehovah make us, na only Jehovah get the right to tell us wetin good and wetin bad. Because we get sin for body we no fit know wetin good and wetin bad, but Jehovah dey perfect, e know exactly wetin good and wetin bad. (Prov. 14:12; read Isaiah 55:8, 9.) But because God make us to fit copy e example, we fit do wetin correct for God eye. (Gen. 1:27) And we de like to do-am. The love wey we get for our Papa de move us to do all our best to copy e example.—Eph. 5:1.

7. Why we need to follow how things suppose be for the correct way? Give example.

⁷ We de gain when we follow the law of Jehovah about wetin good and wetin bad. Why we talk like that? Think-am say every driver get e own meaning of the color of traffic light? Wetin you think say go happen? Or how e go be if doctor and nurse them no de follow the correct way they suppose treat people? Some people fit die. True-true, when we follow the law about how things suppose be, this one de protect us. Na so e be, when we follow the law of Jehovah about wetin good and wetin bad, e de protect us.

8. Wetin Jehovah promise people wey de do wetin correct for e eye?

⁸ Jehovah de bless people wey de do things the way e want. E promise say: “Na righteous people go stay for this earth, and them go stay inside forever.” (Ps. 37:29) How you think say life go be if to say everybody de do wetin correct for Jehovah eye? Peace go dey, people go get one mind, and everybody go happy. Na that kind life Jehovah want make you enjoy. True-true all of us get better reason to always want do wetin good for Jehovah eye! But wetin go help us like to do wetin Jehovah want more-more? Make we see three things wey fit help us.

MAKE YOUR LOVE FOR WETIN JEHOVAH WANT STRONG MORE-MORE

9. Wetin go help us to love wetin correct for God eye?

⁹ Number 1: Love the Person wey get the right to tell us wetin good and wetin bad. For us to love wetin correct for God eye, we must love Jehovah the God wey get the right to set law about wetin good and wetin bad. The more we love Jehovah, the more we go like to do wetin correct for e eye. For example, if to say Adam and Eve really love Jehovah, they for no disobey e command.—Gen. 3:1-6, 16-19.

10. Wetin Abraham do to fit understand how Jehovah de think?

¹⁰ We no want make the same mistake wey Adam and Eve make. So we must continue to learn about Jehovah, show say we like e fine-fine character, and de do our best to understand the way e de think. As we do this one, our love for Jehovah go de strong more-more. Make we see the example of Abraham. E really love Jehovah. Even when Abraham no understand wetin Jehovah want do, e continue to hold Jehovah tight. And e do e best to know Jehovah more. For example, when e hear say Jehovah want destroy Sodom and Gomorrah, Abraham first de fear say the “Judge of the earth” go destroy good people with wicked people. Abraham no ever think say God go fit do that kind thing, so e sofri ask Jehovah some question about the matter. Jehovah sofri answer Abraham. And at last, Abraham understand say Jehovah de see wetin dey everybody heart and e no go ever destroy good people when e de destroy wicked people.—Gen. 18:20-32.

11. How Abraham show say e love and trust Jehovah?

¹¹ The way Abraham and Jehovah talk about Sodom and Gomorrah really make Abraham know Jehovah more. This one make e love and respect for Jehovah strong pass before. After many years, Jehovah tell Abraham make e do something wey really hard to do. Jehovah tell-am make e sacrifice e special son Isaac. But now, Abraham don really understand the kind God wey Jehovah be, so this time, e no ask Jehovah any question. Abraham do wetin show say e ready to obey Jehovah. Think about how e go don pain Abraham as e de ready to sacrifice e son wey e really love! Abraham go don really think deep about the things wey e don learn about Jehovah. E know say Jehovah na God of love and e no go ever do anything wey no correct. As apostle Paul talk, Abraham believe say Jehovah go fit bring e son back to life. (Heb. 11:17-19) And Jehovah don first promise Abraham say the children of Isaac go form one nation, and that time, Isaac never get any pikin. Abraham love Jehovah and e trust say Jehovah go always do the correct thing. Even though say e really hard Abraham, e obey Jehovah because e really get strong faith.—Gen. 22:1-12.

12. How we fit copy Abraham example? (Psalm 73:28)

¹² How we fit copy Abraham example? We need to continue to learn about Jehovah. This one go help us near-am pass before and love-am more-more. (Read Psalm 73:28.) E go help us de see things the way Jehovah de see-am, and our conscience go de work well. (Heb. 5:14) E go still help us no gree do wetin Jehovah no like when people de try make us do-am. We no go ever want do wetin no go make Jehovah happy and wey fit spoil our friendship with-am. Which other way we fit show say we like to do wetin correct for Jehovah eye?

13. Wetin we go do so that we go continue to love wetin correct for Jehovah eye? (Proverbs 15:9)

¹³ Number 2: De do wetin go make you continue to love wetin correct for Jehovah eye everyday. Just as we de always do exercise to make our body strong, na so we need to de do wetin Jehovah want everyday so that our love for wetin correct for Jehovah eye go de strong more-more. This na something wey we fit do everyday. Jehovah na good God, and e no go ever tell us to do wetin pass our power. (Ps. 103:14) Jehovah tell us for Bible say: “E love people wey de do wetin good for e eye.” (Read Proverbs 15:9.) When we get any plan to do more for Jehovah, we de do our best so that we go fit do wetin we plan. Na so e still be if we want de always do wetin correct for Jehovah eye. And if we de do our best, Jehovah go dey patient with us, and continue to help us fit do wetin correct more-more.—Ps. 84:5, 7.

14. Wetin the “iron wey soldier de use cover e chest” mean, and why we need-am?

¹⁴ Because Jehovah love us, e de remind us say to do wetin correct for e eye no too hard. (1 John 5:3) Instead, we need to do-am everyday because e de protect us. Remember the complete soldier uniform wey apostle Paul talk about. (Eph. 6:14-18) Which part of the uniform de protect the soldier heart? Na the “iron wey soldier de use cover e chest,” and this one mean wetin correct for Jehovah eye. Just as the iron de protect the soldier chest and heart, na so wetin correct for God eye de protect our friendship with Jehovah. That na why e dey important to make sure say we de do wetin correct for Jehovah eye, because e go make our soldier uniform complete.—Prov. 4:23.

15. How wetin correct for God eye fit protect you?

¹⁵ How wetin correct for God eye fit protect you the way the iron wey soldier de wear for chest de protect e heart? E go protect you when you de think about wetin God want before you choose wetin you go do everyday. This one mean say when you de decide wetin you go talk about, music wey you go listen to, the kind film wey you go watch, or the kind book wey you go read, make you first ask yourself say: ‘How e go affect my friendship with Jehovah? How Jehovah go see-am? E go make me de like things wey Jehovah hate, like sex wey no clean, fight-fight, long throat and to de think only about myself?’ (Phil. 4:8) If you choose to do wetin Jehovah want, this one go protect you from wetin fit spoil your friendship with-am.

16-17. How Isaiah 48:18 make us dey sure say we fit continue to do wetin correct for Jehovah eye forever?

¹⁶ You don ever ask yourself whether you go fit continue to always do wetin correct for Jehovah eye everyday of your life? Make we learn from one example wey Jehovah use for Isaiah 48:18. (Read-am.) Just as the “wave for sea” de continue to move, Jehovah promise say we fit continue to do wetin correct for e eye. Think-am say you de stand near one big sea, and you de see as the water de move go inside and come out, you go ever think say one day e go stop? No! Because you know say this water don de move like that for many years and e go continue like that.

¹⁷ Just like the wave for sea de continue to move, you fit continue to do wetin correct for Jehovah eye! How we fit do this one? Before you choose anything wey you want do, first think about wetin Jehovah want. Then do wetin Jehovah want. Even though say wetin you want choose fit dey hard for you, dey sure say your Papa for heaven go give you power and help you to continue to do wetin correct for e eye everyday.—Isa. 40:29-31.

18. Why we no suppose de judge other people?

¹⁸ Number 3: De allow Jehovah to judge. As servant of Jehovah, we de do our best to do wetin correct for Jehovah eye, but make we no de judge people and de think say we better pass them. When we remember say na Jehovah be the correct “Judge of the earth,” this one go help us make we no de think say wetin our brothers and sisters de do no reach anything because we de feel say we better pass them. (Gen. 18:25) Jehovah never give us the right to judge other people. In fact, Jesus command us say: “Stop to de judge, so that they no go judge wuna.”—Matt. 7:1.b

19. How Joseph show say e trust the way Jehovah de judge?

¹⁹ Make we still learn from the example of Joseph. E no judge other people, even though say they treat-am for bad way. Joseph brothers attack Joseph, sell-am as slave and make their papa believe say e don die. After many years, Joseph see e brothers again. Now Joseph don be important ruler for Egypt and get the power to judge e brothers and punish them. Even though say they don change their bad character, Joseph brothers be de fear say Joseph go treat them the way they treat-am. But e tell them say: “I no be God, so make wuna no fear.” (Gen. 37:18-20, 27, 28, 31-35; 50:15-21) Joseph do this one because e know say na only Jehovah get the right to judge e brothers.

20-21. How we fit stop to de think say na only our way better pass?

²⁰ We fit copy Joseph example when we de allow Jehovah judge every matter. For example, we no de think say we know wetin de move our brothers to behave the way them de behave, because we no fit read their heart. Na only Jehovah de see wetin dey person heart. (Prov. 16:2) E love everybody, no matter where they come from. And Jehovah de encourage all of us make we really welcome people with all our heart. (2 Cor. 6:13) We want de show say we love all our Christian brothers and sisters, no be to de judge them.

²¹ This one still mean say we no go judge people wey never start to serve Jehovah. (1 Tim. 2:3, 4) E dey right to judge your family person wey no de serve Jehovah and talk say, “That person no go ever serve Jehovah”? No, because that one go mean say we don de do pass ourself. Jehovah still de give everybody for everywhere the chance to change and come serve-am. (Acts 17:30) Make we always remember say if person de think say na only e way better pass, this one na sin.

22. Why you don make up your mind say you go continue to do wetin correct for Jehovah eye?

²² Make our love for wetin correct for Jehovah eye move us to dey happy and help us to be better example for other people so that they go love us and love God more. Make we no ever stop to de allow “wetin correct” de hungry us. (Matt. 5:6) Know say e de sweet Jehovah for mind as you de try your best to do wetin correct for e eye. As people for this world de continue to do wetin bad for Jehovah eye more-more, make you no allow-am worry you. Always remember say “Jehovah love people wey de do wetin correct for e eye.”—Ps. 146:8.