Wetin Revelation Talk About Your Future?

1. Which important decision everybody for earth need to make?

TODAY, people get one important decision to make. They go support Jehovah God as the Person wey get the right to rule heaven and earth, or they go support that harsh enemy wey e get wey be Satan the Devil? Nothing like, ‘I no want dey any side.’ The thing wey they decide go show whether they go live forever or they no go live forever. (Matt. 25:31-33, 46) For “great tribulation,” they go mark them as people wey go survive or as people wey they go destroy.—Rev. 7:14; 14:9-11; Ezek. 9:4, 6.

2. (a) Wetin Hebrews 10:35-39 encourage us make we do? (b) How the book of Revelation fit help us?

² Read Hebrews 10:35-39. If you don choose to support the way Jehovah de rule, that decision na better one. Now, e de hungry you to help other people make they choose well. If na so, then you fit use the things wey they write for the book of Revelation to help them. That special book show wetin go happen to people if they no support Jehovah. The book still show how Jehovah go bless people if they continue to support the way e de rule. If we study this important truth them, na fine thing we do. This one go help us ready more-more to continue de serve Jehovah. Apart from that one, we fit use the things wey we don learn to help people decide well and continue to serve Jehovah.

3. Wetin we go talk about for this article?

³ For this article, we go talk about this questions: Wetin go happen to people wey support the way God de rule? But wetin go happen to people wey choose to support the red big-wicked animal wey the book of Revelation explain?

WETIN GO HAPPEN TO PEOPLE WEY SERVE JEHOVAH WELL?

4. Which group of people apostle John see with Jesus for heaven?

⁴ For one vision, apostle John see two group of people wey support the way Jehovah de rule and get the blessings wey everlasting life go bring. Na 144,000 dey for the first group. (Rev. 7:4) God take them from this earth to form one government, or Kingdom, with Jesus Christ for heaven. They go follow Jesus Christ rule the earth. (Rev. 5:9, 10; 14:3, 4) For the vision, John see them say they stand with Jesus for Mount Zion wey dey heaven.—Rev. 14:1.

5. Wetin go soon happen to the remaining anointed Christians wey dey among the 144,000?

⁵ From time of the apostles come reach now, God don select thousands of people to dey part of the 144,000. (Luke 12:32; Rom. 8:17) But John receive information say na only small number of them go remain for earth for the last days. This ones wey remain go get their final “mark” to show say Jehovah glad with them. They go get this pass mark before great tribulation start. (Rev. 7:2, 3; 12:17) Then when great tribulation don start, God go take this ones wey remain for earth go heaven. They go join the rest of the 144,000 wey don already dey there, wey serve God well till they die. For there, they go rule with Jesus for God’s Kingdom.—Matt. 24:31; Rev. 5:9, 10.

6-7. (a) Which other group John see, and wetin we learn about them? (b) Why Revelation chapter 7 suppose concern anointed Christians wey remain and the “plenty people”?

⁶ After John see the group wey their hope na to live for heaven, e see “plenty people.” This group no be like the 144,000. Bible no tell us how many people go dey for this group. (Rev. 7:9, 10) Wetin we learn about them? The message wey John receive talk say: “Na this people come out of great tribulation, and they don wash their clothes and they make-am white with the blood of the Lamb.” (Rev. 7:14) After they survive the great tribulation, this “plenty people” go live for this earth and enjoy better-better blessings.—Ps. 37:9-11, 27-29; Prov. 2:21, 22; Rev. 7:16, 17.

⁷ Whether God don choose us to go heaven or to remain for this earth, we de see ourself for this picture wey Revelation chapter 7 de show us? We suppose see ourself. That time go really sweet for servants of God wey dey the two groups. We go over glad say we choose to support the way Jehovah de rule. Which other thing the book of Revelation tell us about the great tribulation?—Matt. 24:21.

WETIN GO HAPPEN TO PEOPLE WEY NO SUPPORT GOD?

8. How great tribulation go start, and how this one go affect plenty people?

⁸ As we don learn for the article before this one, the governments for this world go soon attack Babylon the Great, wey be all lie-lie religion together. (Rev. 17:16, 17) Na this one go start great tribulation. But, plenty people go start to serve Jehovah because of this one? No. Instead, Revelation chapter 6 show say for that time, people wey no de serve Jehovah go want get protection from the government and business for this world. Bible compare them to mountains. Because this people no support God’s Kingdom, Jehovah go see them as enemies.—Luke 11:23; Rev. 6:15-17.

9. How servants of Jehovah go dey different for great tribulation, and wetin go be the result?

⁹ The truth na say, faithful servants of Jehovah go dey different for that time of great tribulation wey go really hard. They go still be the only group of people for earth wey de serve Jehovah and wey no gree support the “big-wicked animal.” (Rev. 13:14-17) Because they go continue to hold Jehovah tight, this one go make people wey no support Jehovah to over vex. Because of this one, group of nations go attack servants of God for the whole earth. Na this attack Bible talk about as the attack of Gog of Magog.—Ezek. 38:14-16.

10. With wetin Revelation 19:19-21 talk, wetin Jehovah go do about the attack wey they go attack e people?

¹⁰ Wetin Jehovah go do about this wicked attack? E tell us say: “I go really vex.” (Ezek. 38:18, 21-23) Revelation chapter 19 talk the next thing wey happen. Jehovah send e Son make e protect e people and win their enemies. “The army them for heaven” wey be the faithful angels and the 144,000, go join Jesus for this war to fight Gog of Magog. (Rev. 17:14; 19:11-15) Wetin go be the result of this war? Jehovah go destroy everybody and all organization wey no dey e side!—Read Revelation 19:19-21.

WEDDING DEY, AFTER THE WAR

11. Which special thing go happen wey the book of Revelation talk about?

¹¹ Just think how faithful servants of God for earth go feel as they survive that war wey God go use destroy e enemies kpatakpata! That time go really sweet our heart no be small! Na true say heaven go over glad when God don destroy Babylon the Great. But another thing go happen wey go even bring more joy. (Rev. 19:1-3) This thing wey go happen na really important thing for the book of Revelation. Bible call-am the time wey the “Lamb” go “marry.”—Rev. 19:6-9.

12. As e dey for Revelation 21:1, 2, which time the Lamb go marry?

¹² When the marriage go happen? All the 144,000 go dey for heaven just before the war of Armageddon go start. But no be that time the Lamb go marry. (Read Revelation 21:1, 2.) The Lamb go marry after the war of Armageddon don finish and God don destroy all e enemies.—Ps. 45:3, 4, 13-17.

13. Wetin the marriage of the Lamb go really mean for people wey be part of-am?

¹³ Wetin this marriage go really mean for people wey be part of-am? Just as marriage de join man and woman together, na so this marriage go join the King wey be Jesus Christ with the 144,000 wey be e “woman.” That important thing wey go happen go start the new government wey go rule the earth for 1,000 years.—Rev. 20:6.

YOUR FUTURE AND THE CITY WEY GET GLORY

14-15. Wetin Revelation chapter 21 compare 144,000 to? (Check picture for front cover.)

¹⁴ Revelation chapter 21 compare the 144,000 people to one city wey over fine wey the name na “New Jerusalem.” (Rev. 21:2, 9) This city get 12 foundation stones, and the thing wey they write ontop them na “the 12 names of the 12 apostles of the Lamb.” Why John really put e mind for this one? Na because e see say they write e name ontop one of the stones. This one na really big honor!—Rev. 21:10-14; Eph. 2:20.

¹⁵ This city no be like any other city. The city get one main street wey they make with original gold. E get 12 gates wey they make with one special stone wey them de call pearl. They design the walls and foundations with precious stones. And they measure everything well with no single mistake at all. (Rev. 21:15-21) But e be like say something de miss. See wetin John talk, e say: “I no see temple for inside, because Jehovah God the Almighty na e temple, and the Lamb too. And the city no need sun or moon to shine there, because na the glory of God make-am shine, and na the Lamb be e light.” (Rev. 21:22, 23) The people wey form the New Jerusalem go dey with Jehovah. (Heb. 7:27; Rev. 22:3, 4) So na Jehovah and Jesus be the temple for that city.

16. Wetin go happen to humans when God’s Kingdom don de rule for one thousand years?

¹⁶ E de really sweet anointed Christians for heart to think about this city. But people wey their hope na to live for this earth still suppose see say the city concern them. For the one thousand years wey God’s Kingdom go rule, the New Jerusalem go bring plenty-plenty blessings. John see this blessings de flow like “river wey the water de give life.” And the two sides for the river get “trees wey de give life.” The trees de produce leaves wey de “heal the nations.” (Rev. 22:1, 2) All the people wey dey alive that time go get the chance to gain from this good things wey God go provide. Small-small, everybody wey de obey Jehovah go dey perfect. Sickness no go dey again, pain go disappear, and people no go de cry because them de feel sad.—Rev. 21:3-5.

17. As e dey for Revelation 20:11-13, who go gain from the one thousand years wey the Kingdom go rule?

¹⁷ Who go gain from this wonderful things wey Jehovah go provide? The first people wey go gain go be the plenty people wey go survive Armageddon, and maybe any pikin wey they go born for the new world. But Revelation chapter 20 still promise say people wey don die go come back to life. (Read Revelation 20:11-13.) Faithful “righteous people” wey don die for past and “people wey no dey righteous” wey no get the chance to learn about Jehovah, go come back to life for this earth. (Acts 24:15; John 5:28, 29) So this one mean say na everybody go come back to life for the earth when the Kingdom don de rule for one thousand years? No. Wicked people wey no gree use the chance wey they get to serve Jehovah before they die, no go come back to life. They get the chance, but they show say they no be the kind people wey suppose live for Paradise for this earth.—Matt. 25:46; 2 Thess. 1:9; Rev. 17:8; 20:15.

THE FINAL TEST

18. How things go be for earth when the 1,000 years don end?

¹⁸ For the end of the 1,000 years, all the people wey go dey earth go don dey perfect. The sin wey we get from Adam, no go affect anybody wey dey alive that time. (Rom. 5:12) God go don comot the curse wey follow the sin wey we get from Adam, kpatakpata. So this one mean say people for earth go “come back to life” because they go dey perfect for the end of the 1,000 years.—Rev. 20:5.

19. Why final test suppose dey?

¹⁹ We know say when Satan try to make Jesus do wetin go make God vex, Jesus no gree. E continue to serve God well even with the test. But na all perfect people go dey ready to do like that when God don give Satan the chance to test them? Na each person go show whether e hold Jehovah tight when God don release Satan from the abyss for the end of the 1,000 years. (Rev. 20:7) People wey show say them dey faithful for this final test, go live forever and at last they go enjoy wetin e really mean to dey free. (Rom. 8:21) People wey no gree obey Jehovah, God go destroy them forever together with Satan and e demons.—Rev. 20:8-10.

20. How the wonderful prophecies for the book of Revelation de make you feel?

²⁰ How you de feel after we don talk small about the book of Revelation again? E no de sweet you to see yourself for this wonderful prophecies? This one no de make you to want invite other people to come join us de worship God for the correct way? (Rev. 22:17) Now wey we don talk about this things wey go happen for future, we de over glad and we want talk like apostle John wey talk say: “Amen! Come, Lord Jesus.”—Rev. 22:20.