THINGS WEY FIT HELP FAMILY | HOW TO CARE FOR CHILDREN
Why E Dey Important Make Children De Read—Part 1: Read Book or Watch Film?
When your children don finish the work wey them get for house, wetin them go use their time do? Watch film or read book? You think say them go run carry phone or them go run carry book?
For many years now, TV, video and Internet don de make people no put mind again to de read. One woman wey de write book wey im name na Jane Healy write one book for 1990, the name of the book na Endangered Minds. E talk say: “E no go tey, people fit stop to de read.”
Wetin e talk that time fit be like say e no go ever happen. But now after thirty years, some teachers and professors for countries wey them de use technology well-well don notice say young people no de like to read the way people de read before.
For this article, we go talk about:
Why e dey important make children de read?
To de read de make person imagine wetin e de read. For example, when you de read story, you fit imagine the voice of the people, how them be like, and even how the environment be. The person wey write the story go give you some idea but na you go think the rest by yourself.
One mama wey im name na Laura talk say: “When we de watch film, na wetin another person don imagine or think, we de watch and this one de make us happy. But when we de read, na you yourself de imagine or think for your own mind wetin another person don write, and na this one really better pass.”
To de read de make person get better character. When children de read, e de help them sabi think of solution to different-different problem. To de read de help children put mind for wetin them de do and this one de help them to get better-better character like to dey patient, to sabi control theirself and to sabi feel for other people.
To de read de make children sabi feel for other people? Yes! Some people wey de do research talk say when children no de rush and de take their time read story, e de help them to feel for the people wey them de read about. This one fit come help the children to de feel for people wey them meet for real life.
To de read de make person sabi think deep. People wey no de rush when them de read, de take their time read and them de even read again and again so that them go understand wetin the person wey write-am get for mind. And as them de do this one, e go help them remember wetin them de read and to gain from-am.—1 Timothy 4:15.
One papa wey im name na Joseph notice say: “When you de read, e dey easy to think about wetin you de read, connect-am with wetin you know, and think about wetin you fit learn from-am. Films and videos no de always help us to think deep like this.”
The main point: Even though say we fit gain from videos and other things wey we fit watch, when your children no de read, e fit make them no gain from the better-better things wey them suppose gain if them de read.
Wetin you fit do to make your children like to de read?
Start early. Chloe wey be mama of two boys talk say: “We start to de read to our boys since when them still dey inside belle. And after we born them, we continue to de read to them. As time de go, them come de really enjoy to de read and e come be part of wetin them de do everyday.”
Bible advice: “From small pikin you don know the holy things wey them write.”—2 Timothy 3:15.
Arrange your house the way e go de hungry your children to read. If your pikin see books to de read, this one go make-am like to de read. One mama wey im na Tamara wey get four children talk say: “Get books wey your pikin go happy to read and put-am for im room where e go dey easy for-am to see-am read.”
Bible advice: “Train pikin to follow the right way; even when e don grow, e no go leave-am.”—Proverbs 22:6.
Reduce how una de use computer or phone. One papa wey im name na Daniel talk say: “Every week, e good to get one evening wey we no go press phone or computer or even watch TV. Even if na just one night every week, we de relax and take time read together or everybody go read on im own.”
Bible advice: “Make una make sure say una de choose the things wey dey important pass.”—Philippians 1:10.
Show better example. Karina one mama wey get two girls talk say: “Make the way you de read the story de hungry your children to want hear-am and to fit imagine wetin de happen for the story. If you like to de read, your children self go like-am.”
Bible advice: “Make you continue to put all your heart for the way you de read for public.”—1 Timothy 4:13.
No be every pikin go de like to read. If you de encourage your children to de read, this one fit move them to like to de read. David one papa wey get two girls talk one thing wey e de do. E talk say: “I de read wetin my girls de read. This one de help me know wetin them like and we fit talk about-am together. E come be like say we get our own group wey we de read together and this one really sweet!”