Sister Hulda Succeed to Do Wetin E Plan

FOR Indonesia, we get three of our sisters wey de live for one small island wey them de call Sangir Besar. Many people for the island know them because of the preaching work. But them get other work wey them de do for the area.

Since them de live near big ocean, them go go inside water go find big stones and carry them comot. Some of the stone big like football. Then, them go use hammer break them to small-small ones. When them finish, them go put-am inside bucket and carry-am climb step, go where them de stay. After, them go put the small-small stone inside big bags wey people wey de build road go come carry inside big motor.

One of the sister name na Hulda. E de spend plenty time do this work pass the other sisters. E de use all the money wey e work, care for im family. But this time, e get something wey e want use part of the money buy. E want buy tablet (phone) wey e go fit use open JW Library^®. Sister Hulda know say the video and other things wey dey JW Library^® go help-am fit preach well and understand Bible more.

Sister Hulda work two hours every morning for one and half month and e succeed to break stone wey full one big motor. For the end, e get money to buy the tablet.

Sister Hulda talk say: “Even though I tire well-well and I get wound for my hand, I no de remember all the pain when I de use the tablet prepare for meeting and use-am for preaching.” E still talk say the tablet really help-am when coronavirus start, since na Internet we use do meeting that time. We happy say sister Hulda succeed to do wetin e plan.