Exodus
1 Now, na the names of Israel sons wey come Egypt with Jacob be this, each man wey come with im family: 2 Reu′ben, Sim′e·on, Le′vi, and Judah; 3 Is′sa·char, Zeb′u·lun, and Benjamin; 4 Dan and Naph′ta·li; Gad and Ash′er. 5 All the people* wey come from the family of Jacob* na 70 people,* but Joseph be don already dey Egypt. 6 After some time, Joseph die and all im brothers too, and all that generation of people. 7 And Israel people* begin born plenty children and start to really plenty, and them continue to spread and get more power quick-quick sotey them full everywhere for the land.
8 As time de go, one new king start to rule Egypt, and this one no know Joseph. 9 So e tell im people say: “See! Israel people plenty pass us and get power pass us. 10 Make we use sense do them something. If we no do like that, them go continue to plenty and if war start, them go join our enemies fight us and comot from this country.”
11 So them choose oga them wey de force people to work* so that them go use hard work suffer Israel people, and Israel people build cities to store things for Phar′aoh. The name of the cities na Pi′thom and Ra·am′ses. 12 But the more them de suffer them, the more them de plenty and de spread more-more. So Egypt people start to really fear because of Israel people. 13 Because of this one, Egypt people turn Israel people to slave and force them to do hard work. 14 Them use hard work make life tire them, as them de command them to use clay make cement and make bricks, and to do every kind of work wey slave de do for bush. True-true, them suffer them and force them do every kind of work wey slave de do.
15 After, the king of Egypt talk to the Hebrew women wey de help women born, wey their name na Shiph′rah and Pu′ah. 16 E tell them say: “When una de help the Hebrew women born, and una see say them don dey ontop stool to born, make una kill the pikin if na boy; but if na girl, make una leave-am.” 17 But the women fear the true God, and them no do wetin the king of Egypt tell them. Instead, them go leave the children wey be boy. 18 After some time, the king of Egypt call the women and ask them say: “Why una still de leave the children wey be boy?” 19 The women tell Phar′aoh say: “The Hebrew women no be like Egypt women. Them dey strong, and before the woman wey want help them born go reach there, them don already born.”
20 So God bless this two women, and the people continue to plenty and get power well-well. 21 After, because the two women fear the true God, God make them get their own families. 22 At last, Phar′aoh command all im people say: “Every Hebrew boy wey them born, make una throw-am inside River Nile, but make una leave all the girls.”