Leviticus

1 And Jehovah call Moses and talk to-am from the tent of meeting say: 2 “Talk to Israel people* and tell them say, ‘If anybody among una want give offering to Jehovah from among the animals wey fit live with people, make una offering be from bulls and cow or sheep and goats.

3 “‘If im offering na offering wey them de burn and na from among the bulls, e go sacrifice bull wey dey well for body. E go give the offering from im heart for front of Jehovah for the domot of the tent of meeting. 4 E go put im hand ontop the head of the offering wey them de burn, and God go accept im offering and forgive im sins.

5 “‘Then them must kill the young bull for front of Jehovah, and the sons of Aaron wey be the priests go bring the blood and sprinkle the blood for all the sides of the altar wey dey for the domot of the tent of meeting. 6 Them go remove the skin of the offering wey them de burn and cut-am to pieces. 7 The sons of Aaron, wey be the priests, go put fire ontop the altar and arrange wood ontop the fire. 8 The sons of Aaron, wey be the priests, go arrange the pieces of the offering with the head and the fat* ontop the wood wey dey ontop the fire for the altar. 9 Them go wash im intestines and im legs* with water, and the priest go burn-am to make everything bring smoke from ontop the altar as offering wey them de burn, offering wey them make with fire wey get better smell* to Jehovah.

10 “‘If e want give sheep or goat as offering wey them de burn, make e give young ram or man goat wey dey well for body. 11 Them go kill-am for the right side* of the altar for front of Jehovah, and the sons of Aaron wey be priests go sprinkle im blood for all the sides of the altar. 12 E go cut-am to pieces and the priest go arrange-am together with the head and the fat* ontop the wood wey dey ontop the fire for the altar. 13 E go wash the intestines and the legs* with water, and the priest go bring everything and burn-am to make smoke comot from ontop the altar. This one na offering wey them de burn, offering wey them make with fire wey get better smell* to Jehovah.

14 “‘But if e bring birds as offering wey them de burn to Jehovah, e go bring im offering from turtledoves or young pigeons. 15 The priest go sacrifice-am for the altar and pinch im neck open and burn-am to make smoke comot from ontop the altar, but e go allow the blood to come out for the side of the altar. 16 E go remove the part where food de stay for the neck, and the feathers and throw them near the altar for the front side,* where the ashes dey.* 17 E go cut-am open near im wings but e no go divide-am to two parts. Then the priest go burn-am to make smoke comot from ontop the altar, ontop the wood wey dey ontop the fire. This one na offering wey them de burn, offering wey them make with fire wey get better smell* to Jehovah.