LESSON 05
Bible Na Message From God to Us
Jehovah don give us Bible. This Bible na better gift and e get 66 small-small books. But you fit de ask yourself say: ‘Where Bible come from? Who get Bible?’ To answer this questions, make we talk about how the message from God inside Bible reach us.
1. If na people write Bible, why we de talk say na God get-am?
Na about 40 different people write the books of the Bible. About 3,500 years don pass since they write the first book of the Bible and about 1,900 years don pass since they write the last book. And this people come from different places and they do different-different work. Even as na different-different people write Bible, wetin they write agree. Wetin make-am possible? Na because na God get Bible. (Read 1 Thessalonians 2:13.) This people no write wetin them de think. Instead, God use “holy spirit tell them wetin they go talk.”a (2 Peter 1:21) God use holy spirit move this people to write wetin e get for mind.—2 Timothy 3:16.
2. Who fit gain from the Bible?
“People from every country and tribe and language and people” fit gain from the good news wey Bible get. (Read Revelation 14:6.) God don make sure say Bible dey for plenty language pass any other book wey people don write. Almost everybody today fit read and listen to the Bible. This one na true no matter the place wey people de live or the language wey them de speak.
3. How Jehovah don protect the Bible from danger?
They first write Bible for things like papyrus and leather and this things fit spoil. They make papyrus from plant and leather from the skin of animals. But because some people love Bible, they use hand copy exactly wetin they write for Bible plenty times. Some leaders for government and religion try to destroy the Bible, but other people try to protect-am. Jehovah no allow anybody or anything stop say make e no talk to us. Bible talk say: “The word of our God de last forever.”—Isaiah 40:8.
LEARN MORE THINGS
Learn more about how God give e holy spirit to direct people to write Bible, how e protect Bible, and how e make-am dey possible for people to get Bible.
4. Bible tell us who get the message wey dey inside
Play the VIDEO. Then read 2 Timothy 3:16, and talk about the questions for under.
If na people write Bible, why them de call Bible the Word of God?
You think say e make sense to believe say na God tell people wetin they go write?
Person fit tell e secretary make e write letter, but the message inside the letter na the person get-am no be the secretary. Na so e be for Bible, na people write Bible, but the message inside Bible na from God
5. Bible survive even as they want destroy-am
If Bible na book from God, God suppose protect-am. For plenty years, some leaders don try to destroy Bible. Leaders for religion don try to hide the message from Bible. But plenty people don put their life for danger to protect Bible even as people dey against them and want kill them. To learn about one of this people, play the VIDEO, and talk about the questions for under.
Now wey you don know how plenty people put their life for danger to protect Bible, e de hungry you to read-am? Why you de feel like that?
Read Psalm 119:97, and talk about this question:
Wetin don move some people to put their life for danger to translate Bible and give-am to people?
6. Bible na book for everybody
Bible na book wey they don translate and give-am to plenty people pass any other book wey people don write. Read Acts 10:34, 35, and talk about this questions:
Why God want make they translate and give Bible to plenty people?
Wetin you like about Bible?
Almost
everybody
for the whole world
fit read or listen to Bible for the language wey they fit understand
E dey for more than
3,000
language
e fit be complete Bible or just part of the Bible
5,000,000,000
The Bibles wey they don make na around this number,
this one plenty pass any other book wey they don make
SOME PEOPLE DE TALK SAY: “Bible na just one old book wey people write.”
Wetin you think?
Wetin show say Bible na the word of God?
WETIN THIS LESSON TEACH
Bible na the word of God, and God don make sure say everybody fit get-am.
Wetin You Don Learn
Wetin e mean say God use holy spirit direct people to write Bible?
Wetin you like pass about the way Bible survive, the way they don translate-am and the number of people wey get Bible?
Now wey you don know how God don try make you get Bible wey e de use-am talk to you, how that one de make you de feel about God?
LEARN OTHER THINGS
Read the story of how they translate Bible from the old books wey they use write-am that time to the ones wey we get today.
“How Bible Survive Reach This Our Time” (Awake!, November 2007)
Learn how Bible don survive three serious things wey people do to destroy-am.
“The Story of How Bible Survive” (The Watchtower No. 4 2016)
See how other people put their life for danger to translate Bible.
They don copy and translate Bible plenty times. How you fit dey sure say they never change the message of God inside Bible?
“They Don Change the Message for Inside Bible?” (E dey for jw.org)