LESSON 42
Wetin Bible Talk About to Dey Single and to Marry?
For some culture, people believe say person no fit dey happy if e no marry. But, no be everybody wey don marry dey happy and no be everybody wey no marry dey sad. As Bible talk, the truth na say, to dey single and to marry na gift from God.
1. Wetin be some things wey person fit gain if e no marry?
Bible talk say: “If person marry, e do fine, but person wey e no marry go do better.” (Read 1 Corinthians 7:32, 33, 38.) How person wey no marry fit “do better”? Christians wey no marry no get husband or wife to care for. So, them dey free to do plenty things. For example, some de do more for Jehovah, like to travel go another country to preach the good news. The one wey dey important pass na say they get plenty time to near Jehovah.
2. Wetin be some things wey people de gain when they marry as law talk?
Just as to dey single get gain, na so marriage get e own gain. Bible talk say “two people better pass only one person.” (Ecclesiastes 4:9) This one na true especially for Christians wey de obey the advice from Bible for their marriage. When people marry as law talk, them de make the promise to love, respect, and care for each other. Because of this one, them de get protection for their marriage pass man and woman wey just de live together. And their pikin them de get protection too.
3. How Jehovah de see marriage?
When Jehovah start the first marriage, e talk say: “Man go leave e papa and e mama and go stay with e wife.” (Genesis 2:24) Jehovah want make husband and wife love each other and stay together as long as them dey alive. E allow make husband and wife divorce only if one of them go sleep with another person. If this one happen, Jehovah allow make the husband or wife wey no do bad decide whether e go divorce the one wey do bad.a (Matthew 19:9) Jehovah no allow make Christians marry more than one wife or one husband.—1 Timothy 3:2.
LEARN MORE THINGS
Learn how you fit dey happy and how you fit make Jehovah happy, whether you marry or you no marry.
4. If you dey single, use this gift well
Jesus talk say to dey single na gift. (Matthew 19:11, 12) Read Matthew 4:23, and talk about this question:
As Jesus no marry, how e use this gift to serve e Father and help other people?
Christians wey no marry fit get joy as them de use their life the way Jesus use e own life. Play the VIDEO, and talk about the question for under.
Which better ways Christians wey no marry fit use their life?
You know?
Bible no talk the age wey person must reach before e marry. But, e talk say make person wait until e don “pass the age when body de push person for sex.” This time, e de hard for young person to make good decision.—1 Corinthians 7:36.
5. Take time choose person wey you go marry
One of the important decisions wey you fit ever make na to choose the person wey you go marry. Read Matthew 19:4-6, 9, and talk about this question:
Why e no good make Christian rush to marry?
Bible fit help you know the good qualities good husband or wife de get. The one wey dey important pass na to look for person wey love Jehovah when we want marry.b Read 1 Corinthians 7:39 and 2 Corinthians 6:14. Then talk about this questions:
Why e good make we marry only Christian like us?
How you think say Jehovah go feel if we marry person wey no de worship Jehovah?
If two animals carry load and the animals no dey the same size or get the same power, the two of them go suffer. For the same way, if Christian marry person wey no de serve Jehovah, they go get plenty problems
6. De see marriage the way Jehovah de see-am
For Israel for past, some men divorce their wives because of small-small reasons. Read Malachi 2:13, 14, 16, and talk about this question:
Why Jehovah hate-am when people end their marriage for reason wey Bible no support?
When husband or wife sleep with another person and they divorce, the one wey no do bad and their children de suffer
Play the VIDEO, and talk about the question for under.
If your husband or wife no de serve Jehovah, wetin you fit do to make your marriage succeed?
7. Follow the laws wey Jehovah don give about marriage
Person go need to really try hard to follow the laws wey Jehovah don give about marriage.c But when people try to obey, Jehovah de bless them. Play the VIDEO.
Read Hebrews 13:4, and talk about this questions:
You think say the laws wey Jehovah don give about marriage make sense? Why you talk like that?
Jehovah want make Christians register their marriage and if they divorce, e want make they register the divorce, because for plenty countries, their government want make people do-am like that. Read Titus 3:1, and talk about this question:
If you don marry, you dey sure say you marry as government law talk?
PERSON FIT ASK YOU SAY: “Na must to register marriage? Man and woman no fit just de stay together like that?”
How you go answer?
WETIN THIS LESSON TEACH
To dey single and to marry na gift from Jehovah. Whether person marry or e no marry, e fit dey happy and enjoy e life if e de live for way wey Jehovah want.
Wetin You Don Learn
If person no marry, how e fit use e life well?
Why Bible talk say make we marry only Christians like us?
Wetin be the only reason wey Bible talk say husband and wife fit divorce?
LEARN OTHER THINGS
Wetin e mean to marry “only inside the Lord”?
“Question Wey Some People Don Ask” (The Watchtower, July 1, 2004)
Watch two short videos wey fit help you make good decisions about who you fit choose to marry and about marriage.
Learn why one brother de feel say the things wey Jehovah don give-am better pass anything wey e leave to serve Jehovah.
Wetin be some things wey person go first think about before e decide to divorce or leave e wife or husband?
“Honor ‘Wetin God Don Join Together’ ” (The Watchtower, December 2018)
a Check Endnote 4 wey talk about wetin go make husband and wife separate when any of them no sleep with another person.
b For some culture, na papa and mama de choose who their pikin go marry. For this case, papa and mama wey love their pikin, no go de find person wey get money or big position for their pikin, instead, they go find person wey love Jehovah.
c If you de stay with person and wuna no marry, na you go decide whether you go leave the person or wuna go marry.