How You Fit Study Bible Make You Benefit and Enjoy-am More

Joshua de read the Law; the walls for Jericho fall and house wey Rahab de stay no fall; Joshua carry e hand up as e de pray

JEHOVAH give Joshua big work make e do-am. E go take Israel people enter Promise Land. But the problems wey Joshua go face no go easy at all. Even with that one, Jehovah tell Joshua say e go succeed. E talk say: ‘No fear, make your heart really strong. Make you follow my Law. Read-am day and night, so that you go really follow all the things wey they write for inside. Then you go succeed for wetin you de do and you go do things with sense.’—Josh. 1:7, 8.

We de live for time wey ‘things really hard to handle.’ Like Joshua, we too de face problem. (2 Tim. 3:1) But we fit succeed if we follow the advice wey Jehovah give Joshua. Make we read Bible everyday, and use wetin we learn when we get problem.

But e fit be say some of us no really know how to study, or we no de enjoy our study. Bible study really dey important. Some things wey you fit do so that you go enjoy and benefit from your study dey the box, “You Fit Do This Things for Your Study.” Make you check-am.

One person wey e write Psalms sing say, “Help me make I follow the road wey your commandment dey, because I really like them.” (Ps. 119:35) You fit really enjoy your Bible study too. As you study, you go find plenty better things wey they go make your faith strong.

Na true say Jehovah no give you the work wey e give Joshua. But you self get problem wey you de face. So, like Joshua, make you study Bible and do the things wey you de learn. You go benefit from this things. When you do like that, you too go succeed for wetin you de do and you go do things with sense.

YOU FIT DO THIS THINGS FOR YOUR STUDY

Pray before you study. The things wey the almighty God want make we do dey inside Bible. They write this things so that you fit gain from them. So anytime wey you read Bible, make you tell Jehovah to help you understand-am, remember-am, and use the things wey you read for your life.—Ezra 7:10.
Make you de ask yourself question as you de read Bible, or other books wey we get. E fit be question like: ‘Wetin this place wey I read de tell me about Jehovah? E talk anything wey e concern the main message wey Bible talk about? How I fit use this things help other people?’
Think deep about wetin you study. When you de study, e good make you stop and think about wetin you don read. Ask yourself question like: ‘How this thing wey I read de make me feel? Why e de make me feel like that? How e concern wetin don happen to me before, wetin de happen to me now, and wetin fit happen to me for future? How I fit follow this advice and the things wey I read for Bible wey they fit guide me?’ (Job 23:5; Ps. 49:3) From the thing wey you study, you fit explain why Jehovah tell e people make they no do some kind things? Or, wetin fit happen if they no do the thing wey e tell them?—Deut. 32:28, 29.
Try imagine wetin you de read when you de read about things like story. For example, you fit imagine how e happen when the children of Jacob sell their brother Joseph give Ishmael people? (Gen. 37:18-28) For your mind, wetin you see, hear, and smell? Just do like say na you be any of the people for the story. Wetin them de think and feel? If you de see the story for your mind like that, e go make you understand wetin you de read and you go benefit more.
Use the things wey we de use do research. This things go help you gain plenty things from your study. Try sabi all the things wey them de use do research for your language, the one wey we get for Internet and the one wey we print. Tell other people make they help you learn how to really use this things do research. For example, Watch Tower Publications Index or the Research Guide for Jehovah’s Witnesses go help you find things wey we don write about different-different topic. They go still help you find how we don explain plenty verse for Bible. Use the appendix wey we get for inside New World Translation of the Holy Scriptures, if e dey for any language wey you sabi. They go help you know plenty better things about how some areas be, and how things happen one after the other. You go still know things about weight, measurement, and other things.
Gather all the main point wey you don study so that you go fit remember them. Another good thing be say, you fit talk about wetin you learn with other people. You fit still use wetin you learn for preaching. When you do this one, you no go forget the main point quick. Apart from that one, you go fit still use wetin you learn help other people.