Question Wey Some People Don Ask

When Satan tell Eve say e no go die if e chop from the tree of the knowledge of good and bad, na this time Satan start the lie wey people de teach today say soul no de die?

No be this time the lie start. Devil no tell Eve say if e chop the fruit wey God say make they no chop, e body go die but one part of e body wey people no fit see (wey them de call soul today) no go die, but go continue to live for another place. Instead, Satan use snake tell Eve say, if e chop the fruit for that tree, Eve no go die at all. So Satan de talk say Eve go continue to live, de enjoy better life for this earth, and na Eve go de choose wetin e want do, e no go need God.​—Gen. 2:17; 3:3-5.

If this lie-lie say soul no de die, no start for garden of Eden, which time e start? We no really know. But we know say all lie-lie wey people de teach that time end when God use water destroy the world for the time of Noah. Nobody dey that time to teach lie-lie because na only Noah and e family survive and them de worship Jehovah.

So e dey clear say the lie-lie wey people de teach today say soul no de die start after God don destroy the world with water for the time of Noah. When God confuse the language wey people de speak for Babel and scatter the people, they “go every corner for the earth.” So e dey clear say the people take the lie-lie say soul no de die and they spread-am. (Gen. 11:8, 9) No matter the time wey the lie-lie start, we dey sure say “the papa of lie,” Satan the Devil get hand for the lie and e dey happy as people de spread the lie for every corner.​—John 8:44.