Question Wey Some People Don Ask

David write for Psalm 61:8 say e go praise the name of God “forever.” E mean say David be think say e no go ever die?

No. Wetin David write for the verse dey correct.

Make we think about wetin e write for that verse and other place them wey resemble this one. E say: “I go sing praises to your name forever as I de do wetin I don promise you everyday.” “I de use all my heart praise you, O Jehovah my God, and I go praise your wonderful name forever.” “I go praise your name forever and ever.”—Ps. 61:8; 86:12; 145:1, 2.

When David write this things wey e write, e no think say e no go ever die. E know say people de die because of sin, and e gree say e be sinner. (Gen. 3:3, 17-19; Ps. 51:4, 5) E know say even people wey serve God well, like Abraham, Isaac, and Jacob die. And David know say e go die one day. (Ps. 37:25; 39:4) But wetin e write for Psalm 61:8 show say e really get-am for mind and want praise God forever, when e still dey alive.—2 Sam. 7:12.

Some of the things wey David write na about wetin don happen for e life, as e dey for wetin they write for the top (superscriptions) of Psalm 18, 51, and 52. For Psalm 23, David talk say Jehovah na shepherd wey de give better advice, de make person mind come down and de protect. Na that kind shepherd David be. And e really want serve God ‘all e life.’—Ps. 23:6.

Make we still remember say na Jehovah use holy spirit move David to write the things wey e write. Part of wetin e write na about the things wey go happen for future. For example, for Psalm 110, David write about the time when e Lord (Jesus) go ‘sitdown for the right hand’ of God for heaven and receive power. Wetin Jesus go do? E go win all the enemy of God and “bring judgement against the nations” for the earth. Jesus wey be the Messiah come from the family of David. And Jesus go rule from heaven and go be “priest forever.” (Ps. 110:1-6) Jesus talk say wetin David talk for Psalm 110 na about-am and say e go happen for future.—Matt. 22:41-45.

Jehovah move David to write about wetin happen for e time and wetin go happen for future when e go come back to life again and go fit praise Jehovah forever. So Psalm 37:10, 11 and 29 de talk about wetin happen for Israel that time and wetin go happen for future when the whole earth go become Paradise.—Check paragraph 8 for the article “You Go De With Me for Paradise” for this Watchtower.

Psalm 61:8 and other verse like this one, show say for Israel that time, David really want praise Jehovah until e die. And e still de show wetin David go do for future when God bring-am back to life.