You Know?

Why them repeat some things for Bible?

SOMETIMES, people wey write Bible repeat some things for different-different place inside Bible. Make we see three reason wey fit don make them do like that.

The time wey them write-am. For the time of Israel people, many people no get their own copy of the Law. The tabernacle na the main place wey them de go hear wetin the Law talk. Because na for there them de read-am to them. (Deut. 31:​10-12) The small-small things wey de happen around and the plenty hours wey them de stand to listen to the Law, fit make them no listen well. (Neh. 8:2, 3, 7) This one fit don make them de repeat important things or words so that the people go fit remember wetin Jehovah talk and do-am. As them de repeat some things, e fit don help Israel people to remember plenty things about Jehovah Law.—Lev. 18:​4-22; Deut. 5:1.

How them write-am. Some parts of Bible na songs. For example, the book of Psalms, Song of Solomon, and Lamentations, na songs. Some songs get some words wey them repeat. This one de help them know the main point for the song. For example, see the words wey them repeat for Psalm 115:​9-11: “Israel people, make una trust Jehovah. Na im de help una and e be una shield. Aaron pikin them, make una trust Jehovah. Na im de help una and e be una shield. Una wey de fear Jehovah, make una trust Jehovah. Na im de help una and e be una shield.” As the people de repeat the words when them de sing, this one go help them no forget-am.

Why them write-am. Sometimes, people wey write Bible repeat wetin them write because the message dey important well-well. For example, when Jehovah tell Israel people say make them no chop blood, e tell Moses say make e repeat the reason why e talk like that. Jehovah want make Israel people know say life dey inside blood, so blood na life. (Lev. 17:​11, 14) Many years later, when the apostles and the elders for Jerusalem de write to Christians about wetin them need to run from to fit make God happy, them still talk again say them need to run from blood.—Acts 15:​20, 29.

Even though say them repeat some things for Bible, this one no mean say Jehovah want make we just de repeat words or some things from Bible. For example, Jesus talk say: “When una de pray, make una no de repeat the same words again and again.” (Matt. 6:7) And e give us idea of wetin we fit pray for. (Matt. 6:​9-13) Even though we no go repeat the same word plenty times when we de pray, we fit pray about the same matter plenty times.—Matt. 7:​7-11.

So, Jehovah get better reason why e allow people wey write Bible to repeat some words or things again and again. Na one way wey Jehovah de use teach us for our own good.—Isa. 48:​17, 18.