Wetin We Fit Learn From the Last Things Wey Jacob Tell Im Sons Before E Die?—Part 2

1. Wetin we go talk about for this article?

JACOB sons gather around-am and de sofri listen as their papa de bless each of them. As we talk for the article before this one, wetin Jacob tell Reuben, Simeon, Levi, and Judah, go don really surprise im sons. So them fit de wonder wetin their papa go tell im other eight sons. For this article, we go talk about wetin we fit learn from the things wey Jacob tell Zebulun, Issachar, Dan, Gad, Asher, Naphtali, Joseph, and Benjamin.a

ZEBULUN

2. Wetin Jacob tell Zebulun and how this one happen? (Genesis 49:13) (Still check the box.)

² Read Genesis 49:13. Jacob talk say the family of Zebulun go de stay for waterside. Their land go dey the north side of the Promise Land. More than 200 years later, the tribe of Zebulun receive land. And the land dey between the Sea of Galilee and the Mediterranean Sea. Moses talk say: “O Zebulun, make you de happy when you de go outside.” (Deut. 33:18) E fit be say e de talk about how e go dey easy for the tribe of Zebulun to fit buy and sell things because them de live near two sea. The truth be say people from the tribe of Zebulun get reason to de happy.

3. Wetin fit help us to de happy with the things wey we get?

³ Wetin we learn? No matter where we de live or how our condition be, we get plenty reasons to de happy. And if we de always put mind for the good things wey we get, we go de always happy. (Ps. 16:6; 24:5) But if we de put mind for the things wey we no get instead of the things wey we de enjoy now, this one fit no make us happy. So make we try to de remember the good things wey we de enjoy now.—Gal. 6:4.

ISSACHAR

4. Wetin Jacob tell Issachar, and how this one happen? (Genesis 49:​14, 15) (Still check the box.)

⁴ Read Genesis 49:​14, 15. Jacob praise Issachar because e de work hard. E talk say Issachar dey strong like donkey wey de carry heavy load. Jacob still talk say Issachar go get good land. And wetin Jacob talk happen because Issachar receive land wey de produce well near River Jordan. (Josh. 19:22) The tribe of Issachar work hard to care for their land, and them still work hard to help other people. (1 Ki. 4:7, 17) For example, when Judge Barak and Deborah wey be woman prophet call Israel people to join fight Sisera, the tribe of Issachar na one of the tribes wey ready to help. And them ready to fight for other times.—Judg. 5:15.

5. Why e good make we de work hard?

⁵ Wetin we learn? Just as Jehovah value the hard work of the tribe of Issachar, na so e value our hard work for im service. (Eccl. 2:24) Make we see the example of the brothers wey de work hard to care for congregation. (1 Tim. 3:1) Na true say this brothers no de fight war, but them de work hard to protect their brothers and sisters from anything wey fit spoil their friendship with Jehovah. (1 Cor. 5:1, 5; Jude 17-23) Them still de work hard to prepare talks wey them go give for congregation to encourage brothers and sisters.—1 Tim. 5:17.

DAN

6. Which important assignment the tribe of Dan get? (Genesis 49:​17, 18) (Still check the box.)

⁶ Read Genesis 49:​17, 18. Jacob talk say Dan be like snake wey de attack animals wey big pass-am, animal like horse wey them de use fight war. The tribe of Dan get strong heart and ready to fight enemies of the nation of Israel. As the nation of Israel de go the Promise Land, na the tribe of Dan de protect them from back. (Num. 10:25) The assignment wey the tribe of Dan get dey important even though say other Israel people no de see everything wey them de do from their back to protect them.

7. How we suppose feel about any work wey we do for Jehovah organization?

⁷ Wetin we learn? You don ever do some work and then think say nobody see wetin you do? E fit be say you help clean Kingdom Hall or you work for assembly or convention, or do other important work. If na so e be, na better thing you do. No ever forget say Jehovah de see wetin you de do and e value everything wey you de do for im service. E de really happy when e see say you de worship-am because you want show-am say you love-am, no be because you want make people praise you for wetin you de do.—Matt. 6:​1-4.

GAD

8. Wetin make-am easy for enemies of Israel people to fit attack the tribe of Gad? (Genesis 49:19) (Still check the box.)

⁸ Read Genesis 49:19. Jacob talk say enemies go attack the tribe of Gad. About 200 years later, the tribe of Gad receive land for the east side of River Jordan wey dey near their enemies So e dey easy for their enemies to come attack them. But the tribe of Gad want stay for this area because the land get plenty green grass wey their animal fit chop. (Num. 32:1, 5) E clear say people from the tribe of Gad no de fear. Why? Because them trust Jehovah say e go help them defend the land wey e give them from people wey fit come attack them. For many years, them even send their soldiers to help other tribes to fit win the rest of the Promise Land, for the west side of River Jordan. (Num. 32:​16-19) Them trust say Jehovah go protect their wives and children when them comot go fight their enemies. Jehovah bless them for their strong heart and as them ready to help their brothers even though say e no easy.—Josh. 22:​1-4.

9. How trust for Jehovah de affect the decisions wey we de make?

⁹ Wetin we learn? To fit continue to worship Jehovah even when we de face serious problem, we must continue to trust Jehovah. (Ps. 37:3) Even though say e no easy, many brothers and sisters today de work hard to join build Kingdom Halls and other buildings for Jehovah organization, go preach where them need more people to preach, or help Jehovah organization for other ways. Them de do this one because them trust say Jehovah go always care for them.—Ps. 23:1.

ASHER

10. Wetin the tribe of Asher no gree do? (Genesis 49:20) (Still check the box.)

¹⁰ Read Genesis 49:20. Jacob talk say the tribe of Asher go dey rich, and this na wetin happen. The tribe of Asher receive land wey de produce well-well. (Deut. 33:24) Apart from that one, their land dey near Mediterranean Sea, and part of their land na the port of Sidon wey rich well-well. But the tribe of Asher no gree drive Canaan people comot from the land. (Judg. 1:​31, 32) The bad example of Canaan people and the plenty things wey the tribe of Asher get make them start to slow down for Jehovah worship. For example, when Judge Barak beg Israel people to come join fight Canaan people, the tribe of Asher no go. Because of this one, them no see the miracle wey Jehovah do to fit help Israel people win their enemy “near the water of Megiddo.”(Judg. 5:​19-21) Shame go don catch the tribe of Asher when them hear as Judge Barak and Deborah sing after them win Canaan people and talk for the song say: “Ash′er just sitdown near sea.”—Judg. 5:17.

11. Why we no want waste our time and power to de pursue money and property?

¹¹ Wetin we learn? We want give Jehovah our best. But to fit do this one, we need to dey careful make we no start to think like people for this world wey de feel say na money and wetin money fit buy dey important pass for life. (Prov. 18:11) Na true say we need money, but make we no ever feel say to get plenty money dey important pass our worship to Jehovah. (Eccl. 7:12; Heb. 13:5) We no de waste our time and power to try to get things wey we no really need. Instead, we de do our best for Jehovah service. We know say if we continue to worship Jehovah well, Jehovah go bless us with better life for Paradise.—Ps. 4:8.

NAPHTALI

12. How wetin Jacob tell Naphtali happen? (Genesis 49:21) (Still check the box.)

¹² Read Genesis 49:21. Jacob talk say Naphtali go “de talk better-better things.” This one fit mean the way Jesus be de talk when e dey for this earth. Jesus spend plenty time for the city of Capernaum wey dey the land of the tribe of Naphtali. This na why Bible call Capernaum Jesus “city.” (Matt. 4:13; 9:1; John 7:46) And when prophet Isaiah de talk about Jesus, e talk say Jesus go be “bright light” to the people of Zebulun and Naphtali.” (Isa. 9:1, 2) When Jesus dey this earth, e show say e be “real light wey de give light to any kind person” for the way e teach.—John 1:9.

13. Wetin we fit do so that wetin we de talk go make Jehovah happy?

¹³ Wetin we learn? Wetin we de talk and how we de talk-am really matter to Jehovah. Wetin we fit do so that “better-better things” wey go make Jehovah happy go de come out from our mouth? Number one, make we de always talk true. (Ps. 15:1, 2) Number two, make we de talk things wey go encourage other people. For example, make we de quick praise people for the good things wey them do, and make we no de talk about their mistakes or de complain. (Eph. 4:29) And number three, make we learn how to start discussion with people and then share the good news with them.

JOSEPH

14. Explain how wetin Jacob tell Joseph take happen? (Genesis 49:​22, 26) (Still check the box.)

¹⁴ Read Genesis 49:​22, 26. Jacob really dey proud of im son Joseph. Joseph na “person wey [Jehovah] don choose among im brothers.” In fact, Jacob call-am “branch of tree wey de produce fruit.” Na Jacob imself be the tree and na Joseph be the branch of that tree. Joseph na the first son of Rachel, wey be Jacob wife wey e really love. Jehovah spirit move Jacob to talk say na Joseph go get the right as firstborn instead of Reuben wey be Leah first son. (Gen. 48:5, 6; 1 Chron. 5:1, 2) Wetin Jacob talk happen when Joseph two sons, Ephraim and Manasseh become two tribes for Israel and receive their own land and property.—Gen. 49:25; Josh. 14:4.

15. How Joseph behave when them treat-am for bad way?

¹⁵ Jacob still talk say “people wey de shoot arrow continue to trouble-am and shoot-am, and continue to hate-am.” (Gen. 49:23) The people wey Jacob de talk about na Joseph brothers wey jealous Joseph and treat-am for bad way. Wetin them do make-am suffer plenty things. But Joseph no hate im brothers or blame Jehovah for wetin happen to-am. Instead, as Jacob talk, Joseph “bow no comot from where e dey, and im hand strong” (Gen. 49:24) Joseph trust Jehovah all this time wey e de face problem. E forgive im brothers and even treat them for kind way. (Gen. 47:​11, 12) Joseph allow the problems wey e face to train-am and make-am better person. (Ps. 105:​17-19) Because of this one, Jehovah use-am do many important things.

16. How we fit copy Joseph example when we de face problem?

¹⁶ Wetin we learn? Make we no ever allow the problems wey we de face to make us stop to love Jehovah or our brothers and sisters. Remember say Jehovah fit use the problems wey we de face to train us. (Heb. 12:7, ftn.) E fit help us copy im better-better character like to de show mercy and de forgive. (Heb. 12:11) We fit dey sure say just as Jehovah bless Joseph, na so e go bless us too.

BENJAMIN

17. How wetin Jacob talk about the tribe of Benjamin happen? (Genesis 49:27) (Still check the box.)

¹⁷ Read Genesis 49:27. Jacob talk say the tribe of Benjamin go be like wolf and them go sabi fight well-well. (Judg. 20:​15, 16; 1 Chron. 12:2) The first king for Israel wey be King Saul come from the tribe of Benjamin, and e really fight against the Philistines. (1 Sam. 9:​15-17, 21) Many years later, Queen Esther and Mordecai wey come from the tribe of Benjamin save Israel people make their enemies no kill them.—Esther 2:​5-7; 8:3; 10:3.

18. How we fit copy the example of the tribe of Benjamin?

¹⁸ Wetin we learn? People from the tribe of Benjamin really happy when Saul wey be person from their tribe become king. But later, when Jehovah choose David wey come from the tribe of Judah to become king, the people from the tribe of Benjamin support the person wey Jehovah don choose. (2 Sam. 3:​17-19) Many years later, when ten tribes of Israel turn against the tribe of Judah, the tribe of Benjamin support the tribe of Judah and the king wey come from the family of David. (1 Ki. 11:​31, 32; 12:​19, 21) Just like the tribe of Benjamin, make we too continue to support the people wey Jehovah don choose to care for im people today.—1 Thess. 5:12.

19. How we fit gain from the last things wey Jacob tell im sons before e die?

¹⁹ We fit learn plenty things from the last things wey Jacob talk before e die. The things wey Jacob talk and how e happen fit help us trust say all the other things wey Jehovah promise us for Bible go happen. And e fit still help us understand how we fit make Jehovah happy.