8 ʼE au hifo anai ʼo haofaki ia natou mai te ʼu nima ʼo te kau Esipito.+ ʼE au fakamavae anai ia natou mai te fenua ʼaia pea mo taki ia natou ki he fenua ʼe lelei mo laulahi. Ko he fenua ʼe tafe ai te huʼa pipi mo te meli,+ ia te fenua ʼo te kau Kanaane, mo te kau Heti, mo te kau Amole, mo te kau Pelesite, mo te kau Hevi pea mo te kau Sepusi.+

7 Koteʼuhi ʼe fakahu koutou e Sehova tokotou ʼAtua ki he fenua ʼe lelei,+ ko he fenua ʼe maʼu ai ni vai tafe mo ni matapuna vai ʼe tafe ki te potu fenua laulelei pea mo te potu moʼugaʼia, 8 ko he fenua ʼe fua ai te fulumeto, mo te olose, mo te ʼu fuʼu vite, mo te ʼu fuʼu fiku, mo te ʼu kelenate,+ ko he fenua ʼe fonu ai ko te lolo oliveto mo te meli,+ 9 ko he fenua ʼe mahu ai te meʼa kai pea ʼe maʼu fuli ai pe te ʼu meʼa ʼae ʼe ʼaoga kia koutou, ko he fenua ʼe maʼu ai te ukamea pea ʼe kotou keli anai ʼona moʼuga ke maʼu ai te kapa.