Selemia
48 Koʼeni te folafola ʼa Sehova ʼo te ʼatu kautau, te ʼAtua ʼo Iselaele ʼo ʼuhiga mo Moape:+
“Malaʼia ki Nepo+ he ʼe kua maumauʼi!
Kua fakalainoaʼi ia Kiliataimi+ he ʼe kua maʼu.
Kua fakalainoaʼi mo maumauʼi te nonoʼaga moʼoni.+
2 ʼE mole kei fakavikiviki he tahi ʼo ʼuhiga mo Moape.
ʼI Heseponi+ neʼe fai ai he fakatuʼutuʼu ʼo ʼuhiga mo tana to:
‘Kotou ʼomai, ke tou pulihi te puleʼaga ʼaeni!’
Matemene, mo koe la ʼe tonu ke ke fakalogologo,
He ʼe tuli koe e te heleta.
3 ʼE logo he kalaga mai Kolonaimi,+
Te logoaʼa ʼo he toe maumau pea mo he holo lahi.
4 Kua maumau ia Moape.
ʼE faifetagihi logoaʼa ʼana fanau.
5 ʼI te mahake ʼo Lukite, ʼe hahake faifetagihi ai te hahaʼi.
ʼI te mahifo ʼo Kolonaimi, ʼe logoʼi te tagi mamahi ʼa te hahaʼi ʼuhi ko te tuʼutamaki.+
6 Kotou feholaki ke kotou maʼuʼuli!
Kotou hage ko te fuʼu senelie ʼae ʼe maʼuli ʼi te toafa!
7 Mo koe la ʼe maʼu anai koe
He ʼe ke falala ki ʼau gaue mo ʼou koloa.
ʼE ʼave popula anai ia Kemosi,+
Mo ʼona pelepitelo pea mo ʼona tama ʼaliki.
8 ʼE haʼu anai te tagata fakatupu maumau ki te ʼu kolo fuli,
ʼE mole hao anai he kolo.+
ʼE mole toe maʼuli anai he tahi ʼi te potu fenua laulelei,
Pea ʼe pulihi anai te fenua laulelei ohage ko tona tala e Sehova.
9 Kotou fakatuʼu he fakailoga ʼi te ala maʼa Moape,
Koteʼuhi ka holo pea ʼe feholaki anai tana hahaʼi.
ʼE liliu anai ʼona kolo ko he meʼa fakalialia.
ʼE mole toe nofo ai anai he tahi.+
10 Ke malaʼia ia ia ʼae ʼe mole ina fakahoko fakaleleiʼi te gaue ʼa Sehova.
Ke malaʼia ia ia ʼae ʼe mole ina liligi te toto ʼaki tana heleta.
11 ʼE maʼuli fimalie te kau Moape talu mai tonatou temi tupulaga,
Ohage ko he vino ʼe tuku ke malolo.
ʼE mole natou hage ko te vino ʼae ʼe huaʼi mai he ipu ki he tahi ipu,
Neʼe heʼeki ʼave popula ia natou.
Ko te tupuʼaga la ʼaia ʼo tanatou taupau tona huʼa malie
Pea ʼe mole fetogi tona magoni.
12 “ ‘Koia,’ ʼe ui e Sehova, ‘kotou fakalogo mai! ʼE hoko mai anai te ʼaho ʼae ʼe au fekauʼi ai ni tagata ke olo ʼo huaʼi natou ohage ko te huaʼi ʼo te vino. Pea ʼe natou huaʼi anai ʼo kaku ki te ʼago ʼo ʼanatou ʼaiʼaga vino. ʼE natou foaʼi anai ʼanatou ʼaiʼaga vino lalahi. 13 ʼE ufiufi anai te kau Moape kia Kemosi ohage ko te ufiufi ʼa te hahaʼi ʼo Iselaele ki Petele ʼae neʼe natou falala ki ai.+
14 ʼE feafeaʼi hakotou ui: “Ko matou ko ni tagata tau malolohi kua tokalelei ki te tau”?’+
Ko te ui ʼaia ʼa te Hau ʼae ko tona huafa ko Sehova ʼo te ʼatu kautau.+
16 Kua vave hoko te malaʼia ki te kau Moape,
Kua vave hoko tonatou pulihi.+
17 ʼE tonu anai ke fakaʼofaʼofa kia natou ia natou fuli ʼae ʼi ʼonatou tafaʼaki,
Ia natou fuli ʼae ʼe natou iloʼi tonatou logologona.
Kotou ui age kia natou: ‘Oiaue, kua fasiʼi te tokotoko malohi, te tokotoko matalelei!’
18 Hifo mai ʼi tou tuʼulaga fakakololia
ʼO heka fia inu,* taʼahine ʼae ʼe nofo ʼi Tiponi,+
He ʼe haʼu te tagata fakatupu maumau ʼo Moape ʼo tauʼi koe,
Pea ʼe ina maumauʼi anai ʼou kolo tau.+
19 Ia koe ʼae ʼe nofo ʼi Aloele,+ tuʼu ovi ki te ala pea ke sio!
Fehuʼi ki te tagata mo te fafine ʼae ʼe feholaki: ‘Kotea ʼae neʼe hoko?’
20 Kua fakalainoaʼi ia Moape, neʼe fakamatakuʼi.
Kotou lauga mo kalaga!
Kotou fakaovi ki te Alenone+ ʼo kotou tala kua maumauʼi ia Moape.
21 “Kua hoko mai te temi ʼae ʼe fakamauʼi ai te fenua laulelei+ ʼae ko Oloni, mo Saatesi,+ mo Mefaati,+ 22 mo Tiponi,+ mo Nepo,+ mo Pete-tipelataimi, 23 mo Kiliataimi,+ mo Pete-kamuli, mo Pete-meoni,+ 24 mo Keliosi,+ mo Potisela, mo te ʼu kolo fuli ʼo te fenua ʼo Moape, te ʼu kolo mamaʼo mo te ʼu kolo ovi.
25 ‘Kua toʼo te malohi ʼo Moape,
Kua fasiʼi tona nima,’ ko te ui ʼaia ʼa Sehova.
26 ‘Fakainu ia ia+ ke konahia he neʼe ina ui ʼe malo anai ia Sehova.+
ʼE teka mafulifuli ia Moape ʼi tona lua
Pea ʼe vaʼi ia ia e te hahaʼi fuli.
27 ʼE mole koa la ko koe ʼae neʼe ke vaʼi ia Iselaele?+
Neʼe kau koa la ia ia ʼi ni tagata kaihaʼa,
Ke ke kalokalo ai tou ʼulu pea mo ke laukovi ki ai?
28 Hahaʼi ʼo Moape, kotou mavae ʼi te ʼu kolo pea kotou nonofo ʼi te ʼutu.
Kotou hage ko te lupe ʼae ʼe ina fai tona moeʼaga ʼi te mata mato.’ ”
29 “Neʼe matou logo ki te palalauʼi ʼo te fialahi ʼo Moape, ʼe fiatuʼu ʼosi,
ʼEi, ʼe palalauʼi tana laupisi, tona fialahi, tona fiatuʼu mo tona lotolahi.”+
30 “ ʼE ui e Sehova: ‘ ʼE au iloʼi ʼe ita vave,
Kae ʼe mole he ʼuhiga ʼo ʼana palalau.
ʼE mole ina fai anai te ʼu meʼa ʼae ʼe ina ui.
31 Koia ʼe au lauga anai ʼo ʼuhiga mo Moape,
ʼE au kalaga anai ʼuhi ko Moape katoa,
Pea ʼe au tagilaulau anai ʼo ʼuhiga mo te ʼu tagata ʼo Kile-helesi.+
32 Gaueʼaga vite ʼo Sipima, ʼe au tagi anai maʼa koe
ʼO laka age ʼi taku tagi maʼa Saesele.+
Kua fakalaka ʼi te tai ʼou vaʼa ʼakau ʼae kua failau.
Kua kaku ki te tai, ki Saesele.+
33 Kua puli te fiafia ʼi te ʼu gaueʼaga
Pea mo te fenua ʼo Moape.+
Neʼe au fakaʼago te vino ʼi te ʼu lomiʼaga vite.
ʼE mole toe malamalaki fakafiafia anai e he tahi te vite.
ʼE ʼi ai anai ni kalaga kae ʼe mole kei tatau ia.’ ”+
34 “ ‘ ʼE logo te tagi ʼa Heseponi+ ʼo kaku ki Eleale.+
Maʼia mo te ʼu vai ʼo Nimelimi ʼe moamoa katoa anai.+
35 ʼE au pulihi anai ʼi Moape
Ia ia ʼae ʼe haʼu ʼo momoli he molaga ʼi te faʼahi maʼoluga,
Pea mo ia ʼae ʼe ina momoli ni sakilifisio ki tona ʼatua,’ ko te ui ʼaia ʼa Sehova.
36 ‘Koia ʼe tagi anai toku loto ohage ko he fagufagu* ʼo ʼuhiga mo Moape,+
Pea ʼe tagi anai toku loto ohage ko he fagufagu ʼo ʼuhiga mo te ʼu tagata ʼo Kile-helesi,
Koteʼuhi ʼe pulihi anai te ʼu koloa ʼae neʼe ina tanaki.
37 Kua tele te ʼu ʼulu fuli,+
Pea kua kosi te ʼu kava fuli.
38 “ ‘ ʼI te ʼu fuga fale fuli ʼo Moape
Pea ʼi te ʼu malaʼe lalahi fuli ʼo ʼona kolo,
ʼE logo ʼatea pe ki ni tagilaulau,
Koteʼuhi neʼe au maumauʼi ia Moape
Ohage ko taku maumauʼi he ʼaiʼaga vino neʼe siʼaki,’* ko te ui ʼaia ʼa Sehova.
39 ‘Koʼeni kua mataku ʼosi! Kotou tagilaulau!
Kua lituʼa ia Moape ʼi tona ufiufi!
ʼE vaʼi ia Moape e te hahaʼi fuli,
Pea kua matataku ia natou fuli ʼae ʼi ʼona tafaʼaki ʼi tanatou sisio ki ai.’ ”
40 “Koʼeni te folafola ʼa Sehova:
41 ʼE maʼu anai te ʼu kolo
Pea mo ʼona kolo tau.
ʼI te ʼaho ʼaia, ʼe lotohoha anai te ʼu tagata tau ʼo Moape
Ohage ko he fafine ʼe fanau.’ ”
43 Kua maʼu te mataku, mo te ʼu luo, mo te ʼu hele ʼi ʼokotou muʼa,
Hahaʼi ʼo Moape,’ ko te ui ʼaia ʼa Sehova.
44 ‘ ʼE to anai ki he luo ia ia ʼae ʼe hola mai te mataku,
Pea ko ia ʼae ʼe hake ake mai te luo ʼe to anai ki he hele.’
‘ ʼE hoko mai anai te taʼu ʼae ʼe au fakatuʼā ai ia Moape,’ ko te ui ʼaia ʼa Sehova.
45 ‘ ʼE fenonoʼi ʼi Heseponi ia natou ʼae neʼe feholaki kae kua gaʼegagaʼe.
ʼE haʼu anai he afi mai Heseponi,
He uloʼi afi mai te kolo ko Sihone.+
ʼE ina tutu anai te laʼe ʼo Moape
Pea mo te ʼu foʼi ʼulu ʼo te ʼu tagata tau agamalohi fuli.’+
46 ‘Malaʼia kia koe, Moape!
Kua puli te hahaʼi ʼa Kemosi.+
Kua pilisoniʼi ʼou foha
Pea kua ʼave popula ʼou ʼofafine.+
47 Kae ʼe au fakatahiʼi anai te kau popula ʼo Moape ʼi te ʼu ʼaho fakamuli,’ ko te ui ʼaia ʼa Sehova.
‘Ko te fakaʼosi ʼaeni ʼo te tautea ʼae neʼe tala ʼo ʼuhiga mo Moape.’ ”+