ʼUluaki Koloniko

20 ʼI te kamata ʼo te taʼu,* ʼi te temi ʼae ʼe olo ai te ʼu hau ki te tau, neʼe taki e Soape+ ia he foʼi kautau solia pea neʼe natou maumauʼi ia te fenua ʼo te kau Amone. Neʼe alu ʼo ʼa takai te kolo ko Lapa,+ kae neʼe nofo ia Tavite ʼi Selusalemi.+ Neʼe tauʼi e Soape ia Lapa pea neʼe ina maumauʼi.+ 2 Neʼe toʼo e Tavite te pale fakahau ʼae neʼe ʼi te ʼulu ʼo Malekame, pea neʼe ina fakafuafua ko tona mamafa neʼe ko he taleta* aulo ʼe tahi, pea neʼe teuteuʼi ʼaki ni maka maʼuhiga. Neʼe hili leva te pale ʼaia ki te ʼulu ʼo Tavite. Neʼe ina toe toʼo foki he ʼu tuʼuga koloa mai te kolo.+ 3 Neʼe ina ʼave te hahaʼi ʼae neʼe nonofo ʼi ai ʼo fakagaueʼi.+ Ko ʼihi neʼe ta maka ko ʼihi neʼe gaue mo he ʼu meʼa gaue ukamea mo masila pea mo ni toki. Neʼe fai e Tavite te faʼahi ʼaia ki te ʼu kolo fuli ʼo te kau Amone. Neʼe toe liliu leva ia Tavite mo te kau solia fuli ki Selusalemi.

4 Hili ʼaia, neʼe hoko he tau mo te kau Filisitini ʼi Kesele. ʼI te lakaga ʼaia, neʼe matehi e Sipekai+ te tagata Husa ia Sipai, ʼae neʼe hifo mai te kau Lefaimi,+ pea neʼe fakalogo leva te kau Filisitini ki te kau Iselaele.

5 Pea neʼe toe hoko he tau mo te kau Filisitini, neʼe matehi e Elesanane te foha ʼo Saile ia Lasemi, te tehina ʼo Koliate+ te tagata Kiete. Neʼe hage te ʼakau ʼo te tao ʼa Lasemi ko te ʼakau ʼae ʼe lalaga ai te filo.+

6 Pea neʼe toe hoko he tau ʼi Kiete.+ Neʼe ʼi ai he toe tagata lahi,+ mo ʼona kauʼi tuhi ʼe 6 ʼi ʼona nima lua, mo ʼona kauʼi vaʼe ʼe 6 ʼi ʼona vaʼe lua, ʼo fakatahiʼi ai ko kauʼi tuhi mo kauʼi vaʼe ʼe 24. Neʼe toe hifo mai foki mo ia mai te kau Lefaimi.+ 7 Neʼe laga tau tuʼumaʼu+ ki Iselaele. Koia, neʼe matehi leva ia ia e Sonatane te foha ʼo Simea,+ te taʼokete ʼo Tavite.

8 Neʼe hifo mai te ʼu tagata ʼaia mai te kau Lefaimi+ ʼae ʼi Kiete,+ pea neʼe matehi natou e Tavite mo ʼana tagata faifekau.