Sosue

16 Ko te fenua ʼae neʼe fai ki ai he toho+ ke maʼu e* te hologa ʼo Sosefo,+ neʼe kamata mai te Solotane ʼi te ʼu tafaʼaki ʼo Seliko, ʼo alu ki te ʼu vai ʼae ʼe tuʼu ʼi te potu esite ʼo Seliko. Neʼe hake ai mai Seliko ki te toafa ʼo kaku ki te potu moʼugaʼia ʼo Petele.+ 2 Pea neʼe hoko atu mai Petele ʼae ʼe ovi ki Lusi, ʼo kaku ki te tuʼakoi ʼo te kau Alaki, ʼae ʼi Ataloti. 3 Neʼe hifo leva ki te potu uesite, ʼo kaku ki te tuʼakoi ʼo te kau Safeleti, mo te tuʼakoi ʼo Pete-oloni ʼi Lalo+ pea mo Kesele.+ Neʼe gata ai tonatou fenua ʼi te tai.

4 Neʼe maʼu leva e Manase mo Efalaimi, te hologa ʼo Sosefo,+ ʼonā fenua.+ 5 Koʼeni te tuʼakoi ʼo te fenua ʼo te hologa ʼo Efalaimi, ʼae neʼe vaevae ʼi ʼonatou famili: Ko te tuʼakoi ʼo tonatou tofiʼa ʼi te potu esite neʼe ko Ataloti-ata,+ ʼo kaku ki Pete-oloni ʼi ʼOluga,+ 6 pea neʼe alu te tuʼakoi ki te tai. Pea neʼe hoko atu mai Mikemetati+ ʼae ʼe tuʼu ʼi te potu noleto, ʼo alu ai te tuʼakoi ki te potu esite, ʼo kaku ki Taanati-silo pea mo Sanoake. 7 Pea neʼe hifo mai Sanoake ki Ataloti pea mo Naala, ʼo kaku ki Seliko+ pea neʼe alu ai ki te Solotane. 8 Pea neʼe hoko atu te tuʼakoi mai Tapua+ ki te potu uesite ʼo kaku ki te Vai Tafe* ʼo Kanea. Pea neʼe gata ai te tuʼakoi ʼi te tai.+ Neʼe ko te tofiʼa ʼaia ʼo te telepi ʼo Efalaimi, ʼae neʼe vaevae ʼi ʼonatou famili. 9 Neʼe toe maʼu foki e te hologa ʼo Efalaimi he ʼu kolo neʼe tuʼu ʼi te fenua ʼae neʼe foaki ko he tofiʼa ʼo Manase,+ ʼo feia mo te ʼu kolo liliki ʼae ʼi ʼonatou tafaʼaki.

10 Neʼe mole kapu e te kau Efalaimi te kau Kanaane ʼae neʼe nonofo ʼi Kesele.+ Koia neʼe hoko atu pe tanatou nonofo ʼi te lotolotoiga ʼo te fenua ʼo Efalaimi ʼo kaku mai ki te temi nei.+ Kae neʼe fakamaʼua e te kau Efalaimi ke natou gaue maʼa natou ohage ko he ʼu kaugana.+