Sakalia
6 Neʼe au toe hiki ake leva ʼoku mata pea neʼe au sio ki ni saliote ʼe fa ʼe ʼomai mai te vaha ʼo te ʼu moʼuga ʼe lua. Neʼe ko te ʼu moʼuga kapa. 2 Neʼe toho te ʼuluaki saliote e ni hosi kula pea neʼe toho te lua saliote e ni hosi ʼuli.+ 3 Neʼe toho te tolu saliote e ni hosi hina pea neʼe toho te fa saliote e ni hosi pulepule.+
4 Neʼe au fehuʼi ki te ʼaselo ʼae neʼe ma palalau: “Siʼoku ʼaliki, kotea te ʼu saliote ʼaia?”
5 Neʼe tali mai e te ʼaselo: “ ʼE ko te ʼu laumalie ʼe fa+ ʼo te lagi ʼae neʼe tutuʼu ia muʼa ʼo te ʼAliki ʼo te kele katoa pea neʼe natou mavae leva mai ai.+ 6 ʼE alu te saliote ʼae ʼe toho e te ʼu hosi ʼuli ki te fenua ʼo te potu noleto.+ Kae ʼe mavae te ʼu hosi hina ʼo fakalaka ʼi te tai. Pea ʼe olo te ʼu hosi pulepule ki te fenua ʼo te potu saute. 7 Pea neʼe kua fakaʼamu e te ʼu hosi pulepule ke olo la ʼo foliʼi te kele.” Pea neʼe ina ui age: “Kotou olo la ʼo foliʼi te kele!” Pea neʼe natou olo ai ʼo foliʼi te kele.
8 Pea neʼe ina pauʼi au ʼo ina ui mai: “Sio! Ko natou ʼae ʼe mavae ʼo olo ki te fenua ʼo te potu noleto neʼe natou fakamalū ifo te hauhau* ʼo Sehova ʼi te fenua ʼo te potu noleto.”
9 Pea neʼe toe palalau mai ia Sehova, ʼo ina ui mai: 10 “Toʼo te meʼa ʼofa ʼae neʼe ʼaumai e Eletai, mo Topisa pea mo Setasa mai te kau popula. ʼI te ʼaho ʼaia, ʼe ke alu anai mo te ʼu tagata ʼaia ʼae neʼe ʼomai mai Papiloni ki te ʼapi ʼo Sosiasi, te foha ʼo Sofoni. 11 ʼE ke toʼo anai te siliva mo te aulo, ʼo ke fai ʼaki he pale pea ke ʼai ki te ʼulu ʼo Sosue+ te foha ʼo Seosatake, te pelepitelo lahi. 12 Pea ʼe ke ui age anai:
“ ‘Koʼeni te folafola ʼa Sehova ʼo te ʼatu kautau: “Koʼe te tagata ʼae ʼe higoa ko Huli.+ ʼE homo ake anai ʼi tona nofoʼaga totonu pea ʼe ina laga anai te fale lotu ʼo Sehova.+ 13 Ko ia ʼae ka ina laga anai te fale lotu ʼo Sehova, pea ko ia anai ka ina maʼu te kololia. ʼE heka anai ki tona hekaʼaga fakahau pea ʼe pule anai. ʼE toe liliu anai ko he pelepitelo.+ Pea ʼe iku anai te ʼu gaue ʼaia ʼe lua ki te tokalelei. 14 Pea ʼe tuku anai te pale ʼi te fale lotu ʼo Sehova moʼo fakamanatu kia Elemi, mo Topisa, mo Setasa+ pea mo Eni, te foha ʼo Sofoni. 15 Pea ʼe ʼomai anai ia natou ʼae ʼe nonofo mamaʼo ʼo tokoni ki te laga ʼo te fale lotu ʼo Sehova.” ʼE kotou iloʼi moʼoni anai ʼe ko Sehova ʼo te ʼatu kautau ʼae neʼe ina fekauʼi mai au kia koutou. ʼEi, ʼe hoko moʼoni anai te faʼahi ʼaia, mo kapau ʼe kotou fakalogo lelei ki te leʼo ʼo Sehova tokotou ʼAtua.’ ”