Lua Samuele
4 ʼI te logo ʼa Iseposete, te foha ʼo Saulo*+ ki te kua mate ʼa Apenele ʼi Hepelone,+ neʼe lotovaivai ai* pea neʼe lotohoha ai te kau Iselaele fuli. 2 Neʼe ʼi ai te ʼu tagata ʼe lua neʼe pule ki he ʼu kutuga solia ʼa te foha ʼo Saulo: Neʼe higoa te tahi ko Paana pea ko te tahi neʼe ko Lekape. Neʼe ko te ʼu foha ʼaia ʼo Limoni, te tagata Peeloti, ʼo te telepi ʼo Pesamino. (Koteʼuhi neʼe toe kau foki ia Peeloti+ ki te telepi ʼo Pesamino. 3 Neʼe feholaki te kau Peeloti ki Kitaimi,+ pea ʼe natou nonofo ai ohage ko he kau matapule ʼo kaku mai ki te ʼaho nei.)
4 Pea neʼe ʼi ai he foha ʼo Sonatane,+ te foha ʼo Saulo, neʼe maʼimoa ʼona vaʼe.*+ Neʼe taʼu nima ʼi te temi ʼae neʼe fakaha ai te logo mai Siseleele+ ʼo ʼuhiga mo Saulo pea mo Sonatane. Neʼe fua ia ia e te fafine ʼae neʼe ina taupau ʼo hola, kae ʼi tana hola ʼaia ʼi tona mataku, neʼe to te toe ʼo maʼimoa ai. Neʼe higoa ko Mefiposete.+
5 Pea neʼe olo ia Lekape mo Paana, te ʼu foha ʼo Limoni, te tagata Peeloti ki te ʼapi ʼo Iseposete. Neʼe vevela ʼi te ʼaho ʼaia, pea neʼe lolotoga malolo ʼi te hoʼata. 6 Neʼe nā feulufi ki te ʼapi ohage pe ʼe nā olo ʼo toʼo te fulumeto, pea neʼe nā hukiʼi ia ia ʼi tona fatu. Pea neʼe feholaki leva ia Lekape mo Paana,+ tona tehina. 7 ʼI te temi ʼae neʼe nā ulu ai ki te ʼapi, neʼe takoto ʼi tona palepale, ʼi tona koga fale. Neʼe nā hukiʼi ia ia ʼo mate ai, pea ʼosi ʼaia neʼe nā tuʼusi tona ʼulu. Neʼe nā toʼo leva tona ʼulu pea neʼe nā haʼele ʼi te po katoa ʼi te ala ʼae neʼe alu ki te Alapa. 8 Pea neʼe nā ʼaumai te ʼulu ʼo Iseposete+ kia Tavite ʼi Hepelone, ʼo nā ui ki te hau: “Koʼeni te ʼulu ʼo Iseposete, te foha ʼo Saulo tou fili+ ʼae neʼe ina kumi ke ina matehi koe.*+ ʼI te ʼaho nei, neʼe fakahoko e Sehova te lagavaka maʼa koe, siʼoku ʼaliki te hau, ʼo ʼuhiga mo Saulo pea mo tona hakoga.”
9 Kae neʼe tali age e Tavite kia Lekape mo Paana, tona tehina, te ʼu foha ʼo Limoni, te tagata Peeloti: “ ʼE au tala moʼoni atu ia muʼa ʼo Sehova, te ʼAtua maʼuli, ʼae neʼe ina haofaki* au mai ʼoku mamahi fuli,+ 10 neʼe au puke ʼo matehi ʼi Tesikelake te tagata ʼae neʼe ina fakaha mai: ‘Kua mate ia Saulo’+ pea mo manatu ʼe ko he logo lelei kia au. Koʼena te fakapale ʼo te tagata ʼave logo ʼaia. 11 ʼE feafeaʼi age la moka neʼe matehi e he ʼu tagata agakovi he tagata faitotonu ʼi tona ʼapi, ʼi tona palepale! ʼE mole tonu koa la ke au tauteaʼi koulua ʼuhi ko takolua fai te ligi toto ʼaia+ pea mo pulihi koulua ʼi te kele?” 12 Neʼe fakatotonu ai e Tavite ki te kau tagata tupulaga ke natou matehi naua.+ Neʼe natou tuʼusi ʼonā nima mo ʼonā vaʼe pea mo natou tautau ʼonā sino+ ʼo ovi ki te maʼanuʼaga ʼae ʼi Hepelone. Kae neʼe natou toʼo te ʼulu ʼo Iseposete ʼo tuku ki te fale maka ʼo Apenele, ʼi Hepelone.