Selemia

41 ʼI te fitu mahina leva neʼe alu ai ia Isemaele+ ki Misipa mo tagata ʼe toko hogofulu kia Ketalia, foha ʼo Asikame. Ko Isemaele neʼe ko te foha ʼo Netania, foha ʼo Elisama pea neʼe kau ʼi te famili hau pea mo te kau gaue maʼuhiga ʼo te hau.+ Pea lolotoga tanatou kaitahi ʼi Misipa, 2 neʼe tuʼu ake leva ia Isemaele, foha ʼo Netania pea mo te ʼu tagata ʼe toko hogofulu ʼo matehi ʼaki ʼanatou heleta ia Ketalia, foha ʼo Asikame, foha ʼo Safani. Neʼe ina matehi te tagata ʼae neʼe fakanofo e te hau ʼo Papiloni ke pule ki te fenua. 3 Neʼe toe matehi e Isemaele te kau Sutea fuli ʼae neʼe nonofo mo Ketalia ʼi Misipa, ʼo toe feia pe mo te kau solia Kaletea ʼae neʼe nonofo ai.

4 ʼI te hili ʼo te matehi ʼo Ketalia, ʼi te ʼaho ake, neʼe heʼeki iloʼi e he tahi, 5 pea neʼe tau mai leva ni tagata mai Sekemi,+ mo Silo+ pea mo Samalia.+ Neʼe natou toko 80. Neʼe tele ʼonatou kava, mo makahaehae ʼonatou mutuʼi meʼa, pea neʼe natou hifi ʼonatou sino.+ Neʼe natou ʼomai mo ni molaga meʼa kai pea mo te iseso hina+ ke natou ʼave ki te fale lotu ʼo Sehova. 6 Neʼe mavae ai ia Isemaele, foha ʼo Netania ʼi Misipa ʼo alu kia natou. Neʼe haʼele tagi. Pea ʼi tanatou felaveʼi, neʼe ina ui age kia natou: “ ʼOmai kia Ketalia, foha ʼo Asikame.” 7 Kae ʼi tanatou hu ki te kolo, neʼe matematehi natou e Isemaele, foha ʼo Netania mo ʼana tagata ʼo laku natou ki he foʼi tane vai.

8 Kae neʼe ui e te toko hogofulu ʼo te ʼu tagata ʼaia kia Isemaele: “ ʼAua naʼa ke matehi matou. Neʼe matou fufu ʼi te vao he fulumeto, mo he olose, mo he lolo pea mo he meli.” Neʼe fakatotonu ai e Isemaele ke mole matehi ia natou mo ʼonatou kaugā fagona. 9 Neʼe laku leva e Isemaele ia te ʼu tagata fuli ʼae neʼe ina matehi ki te foʼi tane vai lahi ʼae neʼe faʼu e te Hau ko Asa ʼi te temi ʼae neʼe ina tauʼi ai te Hau ʼo Iselaele ko Paesa.+ Ko te foʼi tane vai ʼaia neʼe fakafonu ʼaki te ʼu sino mate e Isemaele, foha ʼo Netania.

10 Neʼe pilisoniʼi leva e Isemaele ia natou fuli ʼae neʼe toe ʼi Misipa,+ ʼo kau ai te ʼu ʼofafine ʼo te hau pea mo te hahaʼi katoa ʼae neʼe nonofo ʼi Misipa, ʼae neʼe tuku e Nepusalatane, te pule ʼo te kau leʼo kia Ketalia,+ foha ʼo Asikame. Neʼe pilisoniʼi natou e Isemaele, foha ʼo Netania pea neʼe alu leva ki te kau Amone.+

11 ʼI te iloʼi ʼae e Seonane,+ foha ʼo Kalease pea mo te ʼu pule solia fuli ʼae neʼe nonofo mo ia, ia te agakovi fuli ʼae neʼe fakahoko e Isemaele, foha ʼo Netania, 12 neʼe natou olo ai mo ʼanatou tagata solia fuli ʼo tauʼi ia Isemaele, foha ʼo Netania. Neʼe natou maʼu atu ia ia ʼo ovi ki te ʼu vai lalahi* ʼi Kipeone.

13 Neʼe fiafia ia natou fuli ʼae neʼe pilisoniʼi e Isemaele ʼi tanatou sisio kia Seonane, foha ʼo Kalease pea mo te ʼu pule solia fuli. 14 Neʼe toe liliu ai leva te hahaʼi fuli ʼae neʼe pilisoniʼi e Isemaele ʼi Misipa,+ ʼo olo mo Seonane, foha ʼo Kalease. 15 Kae neʼe feholaki ia Isemaele, foha ʼo Netania mo te toko valu ʼo ʼana tagata mai ia Seonane, ʼo olo ki te kau Amone.

16 Neʼe ʼave leva e Seonane, foha ʼo Kalease mo te ʼu pule solia fuli ʼae neʼe faifagona mo ia te hahaʼi ʼo Misipa ʼae neʼe toe. Neʼe ko te hahaʼi ʼae neʼe natou haofaki mai ia Isemaele, foha ʼo Netania ʼi te hili ʼo tana matehi ia Ketalia,+ foha ʼo Asikame. Neʼe natou toe liliu ai mai Kipeone mo te hahaʼi tagata, mo te kau solia, mo te hahaʼi fafine, mo te ʼu fanau pea mo te kau faifekau ʼo te fale hau. 17 ʼI tanatou olo ʼaia, neʼe natou tutuʼu leva ʼi te nofoʼaga ʼo Kimame ʼe ovi ki Petelehemi+ he neʼe natou fakatotonu ke natou olo ki Esipito+ 18 ʼuhi ko te kau Kaletea. Neʼe natou matataku ia natou koteʼuhi neʼe matehi e Isemaele, foha ʼo Netania ia Ketalia, foha ʼo Asikame, ʼae neʼe fakanofo e te hau ʼo Papiloni ke pule ki te fenua.+