ʼUluaki Koloniko
13 Neʼe palalau ia Tavite mo te ʼu pule ʼo he toko afe, mo te ʼu pule ʼo he toko teau pea mo te ʼu pule fuli.+ 2 Neʼe ui leva e Tavite ki te hahaʼi katoa ʼo Iselaele: “Kapau ʼe lelei te faʼahi ʼaeni kia koutou pea mo tali e Sehova totatou ʼAtua, pea tou fakaha ki ʼotatou tahi ʼu tehina ʼae ʼe nonofo ʼi te ʼu potu fenua fuli ʼo Iselaele, ʼo feia mo te kau pelepitelo pea mo te kau Levite ʼae ʼi ʼonatou kolo+ mo ʼonatou koga meʼa lunaʼia, ke natou ʼomai ʼo fakatahi mo tatou. 3 Pea ke tou toe ʼaumai te Aleka+ ʼo totatou ʼAtua.” Neʼe palalau feia koteʼuhi neʼe mole tokakaga ki ai te hahaʼi ʼi te temi ʼo Saulo.+ 4 Neʼe loto e te hahaʼi katoa ke fai te faʼahi ʼaia, he neʼe natou manatu ʼe ko he meʼa ʼe lelei. 5 Koia neʼe fakatahiʼi ai e Tavite ia Iselaele katoa, mai te vai tafe ʼo* Esipito ʼo kaku ki Lepo-hamate,*+ ke olo ʼo ʼaumai te Aleka ʼo te ʼAtua moʼoni ʼae neʼe ʼi Kiliate-sealimi.+
6 Neʼe alu leva ia Tavite mo Iselaele katoa ki Paalea,+ ʼae ko Kiliate-sealimi ʼi Suta, ʼo toʼo mai ai te Aleka ʼo te ʼAtua moʼoni ko Sehova, ʼae ʼe ʼafio ʼi te ʼu fuga* kelupimi.+ ʼE fetapa te hahaʼi ʼi te muʼa Aleka ki tona huafa. 7 Kae neʼe natou hili te Aleka ʼo te ʼAtua moʼoni ki he saliote foʼou,+ pea neʼe natou ʼaumai mai te ʼapi ʼo Apinatape. Neʼe taki e Usea mo Akeso ia te saliote.+ 8 Neʼe fakafiafia ia Tavite mo te hahaʼi fuli ʼo Iselaele ʼaki tonatou malohi katoa ia muʼa ʼo te ʼAtua moʼoni, ʼo natou hiva, mo ta he ʼu alepa, mo he ʼu nafa,+ mo he ʼu simepale,+ mo he tahi age ʼu meʼa faimaholo, pea neʼe natou pupuhi he ʼu fakatagi pupuhi.+ 9 Kae ʼi tanatou kaku atu ki te hahaʼaga fulumeto ʼo Kitone, neʼe faoʼi e Usea tona nima ʼo puke te Aleka, he neʼe meʼa pe ke to ʼuhi ko te ʼu pipi. 10 ʼI te lakaga ʼaia, neʼe to te hauhau ʼo Sehova kia Usea, pea neʼe Ina matehi ia ia he neʼe ina faoʼi tona nima ʼo puke te Aleka,+ ʼo mate ai ia muʼa ʼo te ʼAtua.+ 11 Kae neʼe ita* ia Tavite ʼi te to ʼo te hauhau ʼo Sehova kia Usea. Neʼe fakahigoa te koga meʼa ʼaia ko Pelesi-usea* ʼo kaku mai ki te ʼaho nei.
12 Neʼe mataku leva ia Tavite ki te ʼAtua moʼoni ʼi te ʼaho ʼaia, pea neʼe ina ui: “ ʼE lava feafeaʼi haku ʼaumai te Aleka ʼo te ʼAtua moʼoni?”+ 13 Neʼe mole ʼaumai e Tavite te Aleka ki te faʼahi ʼae neʼe nofo ai, ʼi te Kolo ʼo Tavite. Kae neʼe ina fakatotonu ke ʼave ki te ʼapi ʼo Opeto-etome te tagata Kiete. 14 Neʼe tuku te Aleka ʼo te ʼAtua moʼoni ʼi te loto fale ʼo Opeto-etome lolotoga mahina ʼe tolu. Pea neʼe tapuakiʼi e Sehova te loto fale ʼo Opeto-etome mo te ʼu meʼa fuli ʼae neʼe ina maʼu.+