Lua Samuele

24 Pea neʼe toe to te hauhau ʼo Sehova ki te kau Iselaele,+ ʼi te temi ʼae neʼe uga ai e he tahi ia Tavite* ke fakafeagai kia natou, ʼo ina ui age: “Alu, pea ke lau+ ia Iselaele mo Suta.”+ 2 Neʼe ui ai e te hau kia Soape,+ te pule ʼo te foʼi kautau, ʼae neʼe fakatahi mo ia: “Fakalelei siʼou loto, alu ki te ʼu telepi fuli ʼo Iselaele, mai Tane ki Pele-sepa,+ pea ke ke tohi te hahaʼi,* ke au iloʼi tonatou kaugamalie.” 3 Kae neʼe ui e Soape ki te hau: “Siʼoku ʼaliki te hau, ʼofa pe ke haga ia Sehova tou ʼAtua ʼo fakatuputupu te kaugamalie ʼo te hahaʼi ʼo tuʼa 100, pea ʼofa pe ke ke sio ki ai. Kae he koʼe koa ʼe ke fia lau te hahaʼi?”

4 Kae neʼe malohi age te folafola ʼa te hau ʼi ʼae ʼa Soape pea mo te kau takitaki ʼo te foʼi kautau. Koia neʼe mavae ai ia Soape mo te kau takitaki ʼo te foʼi kautau mai te hau ʼo olo ʼo tohi te hahaʼi ʼo Iselaele.+ 5 Neʼe natou fakalaka ʼi te Solotane pea mo nonofo ʼi Aloele,+ ʼi te potu saute* ʼo te kolo ʼae ʼe ovi ki te vai tafe.* Neʼe natou olo leva ki te fenua ʼo te kau Kate ʼo hoko atu ki Saesele.+ 6 Hili ʼaia neʼe natou olo ki Kileate+ pea mo te fenua ʼo Tasetimi-otesi, pea neʼe natou hoko atu ki Tane-saane pea natou olo ki Sitoni.+ 7 Neʼe natou olo leva ki te kolo tau ʼo Tile+ pea mo te ʼu kolo fuli ʼo te kau Hevi+ mo te kau Kanaane, pea neʼe natou fakaʼosi leva ki Pele-sepa,+ ʼi te Nekepe+ ʼo Suta. 8 Neʼe natou fakalaka ai ʼi te fenua katoa, pea hili mahina ʼe hiva mo ʼaho ʼe 20, neʼe natou toe liliu leva ki Selusalemi. 9 Neʼe fakaha age e Soape ki te hau te kaugamalie ʼo te hahaʼi ʼae neʼe tohi. ʼI Iselaele, neʼe ko te toko 800 000 ʼu tagata tau neʼe popoto ʼi te fakaʼaogaʼi ʼo te heleta, pea ʼi Suta neʼe ko te ʼu tagata ʼe toko 500 000.+

10 Kae neʼe vevele leva te loto* ʼo Tavite+ ʼi tana ʼosi lau ʼaia te hahaʼi. Neʼe ui e Tavite kia Sehova: “Neʼe lahi taku agahala+ ʼi taku fai te faʼahi ʼaia. Koia, Sehova e, fakalelei siʼou loto, fakamolemole mai ki taku agahala,+ he neʼe au agavale.”+ 11 ʼI te ʼala uhu ake ʼa Tavite, neʼe fakaha e Sehova tana folafola ki te polofeta ko Kate,+ te tagata ʼae ʼe ina fakaha kia Tavite te ʼu meʼa ʼae neʼe ha, ʼo ina ui: 12 “Alu pea ke ui age kia Tavite: ‘Koʼeni te folafola ʼa Sehova: “ ʼE au fakaha atu te ʼu aluʼaga ʼe tolu. Filifili te aluʼaga ʼae ʼe tonu anai ke au fakahoko kia koe.” ’ ”+ 13 Neʼe alu ai ia Kate kia Tavite, ʼo ina ui age: “ ʼE tonu koa ke to he hoge ʼi tou fenua lolotoga taʼu ʼe fitu?+ Peʼe tonu koa ke ke hola lolotoga mahina ʼe tolu ia muʼa ʼo ʼou fili ʼae ʼe natou tuli koe?+ Peʼe tonu koa ke to he taʼi mahaki ʼi tou fenua lolotoga ʼaho ʼe tolu?+ Fakakaukauʼi lelei te tali ʼae ʼe tonu ke au fakaha kia Ia ʼae neʼe ina fekauʼi mai au.” 14 Neʼe ui e Tavite kia Kate: “ ʼE au hoha ʼaupito. Fakalelei siʼou loto, kae ke tou to ki te ʼu nima ʼo Sehova,+ he ʼe lahi tona manavaʼofa,+ kae ke ʼaua naʼa au to ki te ʼu nima ʼo te tagata.”+

15 Neʼe fakato leva e Sehova he taʼi mahaki+ ʼi Iselaele mai te uhu ʼo kaku ki te temi ʼae neʼe fakatuʼutuʼu ki ai. Pea neʼe mamate ai te toko 70 000 hahaʼi+ mai Tane ki Pele-sepa.+ 16 ʼI te temi ʼae neʼe faoʼi ai e te ʼaselo tona nima ke ina fakaʼauha ia Selusalemi, neʼe fakahemala* leva ia Sehova ʼo ʼuhiga mo te malaʼia ʼaia.+ Neʼe ina ui ai ki te ʼaselo ʼae neʼe ina fakaʼauha te hahaʼi: “Kua feʼauga, tuku ki lalo tou nima.” Neʼe kua ovi te ʼaselo ʼa Sehova ki te hahaʼaga fulumeto ʼa Alavana+ te tagata Sepusi.+

17 ʼI te sio ʼa Tavite ki te ʼaselo ʼae neʼe ina fakaʼauha te hahaʼi, neʼe ina ui kia Sehova: “Neʼe ko au ʼae neʼe agahala, pea neʼe ko au ʼae neʼe au fai te meʼa ʼae ʼe kovi. Kae kotea ʼae neʼe fai e te ʼu ovi ʼaeni?+ Fakalelei siʼou loto, tauteaʼi au pea mo te famili ʼo taku tamai.”+

18 Pea ʼi te ʼaho ʼaia, neʼe haʼu ia Kate kia Tavite ʼo ina ui age: “Alu pea ke fakatuʼu he ʼaletale maʼa Sehova ʼi te hahaʼaga fulumeto ʼa Alavana, te tagata Sepusi.”+ 19 Neʼe alu ai ia Tavite, ʼo mulimuli ki te folafola ʼa Kate, ohage pe ko tona fakatotonu age e Sehova. 20 ʼI te sio ifo ʼa Alavana ki te olo age ʼa te hau pea mo ʼana hahaʼi faifekau, neʼe foimo haʼu aipe ʼo tulolo ki te kele ia muʼa ʼo te hau. 21 Pea neʼe fehuʼi e Alavana: “Siʼoku ʼaliki te hau, kotea te tupuʼaga ʼo tau haʼu kia au?” Neʼe tali age e Tavite: “Neʼe au haʼu ke au totogi tau hahaʼaga fulumeto pea ke au laga ai he ʼaletale maʼa Sehova, ke fakagata ai te malaʼia ʼae kua to ki te hahaʼi.”+ 22 Kae neʼe ui e Alavana kia Tavite: “Siʼoku ʼaliki te hau, ke ke toʼo taku hahaʼaga fulumeto pea ke ke momoli te meʼa ʼae ʼe lelei kia koe.* Koʼeni te ʼu pipi ʼe feala ke ke momoli ko he ʼu holokoseta, pea ʼe feala ke ke fakaʼaogaʼi te saliote mo te ʼakau toho ʼo te faga pipi moʼo fai fafie. 23 Siʼoku hau, ʼe au foaki atu te ʼu meʼa fuli ʼaia kia koe.” Pea neʼe toe ui leva e Alavana ki te hau: “ ʼOfa pe ke fakaha atu e Sehova tou ʼAtua tona ʼofa.”

24 Kae neʼe ui e te hau kia Alavana: “Kailoa, kae ʼe tonu ke au totogi tau hahaʼaga fulumeto. ʼE mole au momoli anai kia Sehova toku ʼAtua, he ʼu holokoseta neʼe mole au totogi.” Koia, neʼe foaki ai e Tavite he ʼu sikele* siliva ʼe 50 moʼo totogi ʼaki te hahaʼaga fulumeto pea mo te ʼu pipi.+ 25 Neʼe laga leva e Tavite he ʼaletale+ ʼi ai maʼa Sehova pea neʼe ina momoli he ʼu holokoseta mo he ʼu sakilifisio ʼo te tokalelei. Neʼe tali leva e Sehova te ʼu kole mamahi ʼo ʼuhiga mo te fenua,+ pea neʼe gata ai te malaʼia ʼae neʼe to ki Iselaele.