Tolu Soane

1 Ko au, te tagata kua matuʼa,* ʼe au faitohi atu kia koe, Kaiusi, tehina ʼofaina, ʼae ʼe au ʼofa moʼoni ai.

2 Tehina ʼofaina, ʼe au faikole ke hoko atu tau manuʼia ia faʼahi fuli pe pea mo ke maʼuli malolo lelei, ohage pe ko tau manuʼia ʼi te temi nei. 3 Koteʼuhi neʼe lahi ʼaupito toku fiafia ʼi te temi ʼae neʼe ʼomai ai te ʼu tehina, pea mo natou fakamoʼoni ʼo ʼuhiga mo tau taupau maʼu ia te moʼoni. ʼEi, ʼe au iloʼi ʼe ke maʼuli ʼo mulimuli ki te moʼoni.*+ 4 ʼE lahi ʼaupito toku fiafia* moka au logo ʼe haga mulimuli ʼaku fanau ki te ala ʼo te moʼoni.+

5 Tehina ʼofaina, ʼe ke fakaha tau agatonu ʼi te ʼu meʼa ʼae ʼe ke fai maʼa te ʼu tehina, logo la ʼe mole ke iloʼi ia natou.+ 6 Neʼe natou fai he fakamoʼoni ʼo ʼuhiga mo tou ʼofa ia muʼa ʼo te kokelekasio. Fakalelei siʼou loto, moka natou mavae, ke ke tokoni kia natou ʼi hona aluʼaga ʼe tuha mo te ʼAtua.+ 7 Koteʼuhi neʼe natou olo ʼo faifakamafola ʼi tona huafa, ʼo mole natou kole he meʼa+ ki te hahaʼi ʼo te ʼu puleʼaga. 8 Koia, ʼe ko totatou maʼua ke tou fakaha te tali kaiga kia natou ʼaia,+ ke tou gaue fakatahi ai moʼo lagolago ki te moʼoni.+

9 Neʼe au faitohi ki te kokelekasio, kae ko Tiotefeso, ʼae ʼe ina fia maʼu te ʼuluaki tuʼulaga ia natou,+ ʼe mole ina tali he meʼa mai ia matou ʼaki he fakaʼapaʼapa.+ 10 Koia, kapau ʼe au alu atu, ʼe au fakaha anai te ʼu gaue ʼae ʼe ina fai, ʼi tana haga ʼo fakamafola he ʼu fasituʼu* ʼo ʼuhiga mo matou.+ Pea ʼe mole gata ai, kae ʼe mole ina fia fakatalitali te ʼu tehina+ ʼaki he fakaʼapaʼapa, pea ʼe faiga ke ina taʼofi ia natou ʼae ʼe natou fia fakatalitali te ʼu tehina pea mo ina fakamavae natou ʼi te kokelekasio.

11 Tehina ʼofaina, ʼaua naʼa ke faʼifaʼitakiʼi te meʼa ʼae ʼe kovi, kae ke ke faʼifaʼitakiʼi te meʼa ʼae ʼe lelei.+ Ko ia ʼae ʼe ina fai te meʼa ʼae ʼe lelei, ʼe haʼu ia mai te ʼAtua.+ Kae ko ia ʼae ʼe ina fai te meʼa ʼae ʼe kovi, ʼe mole ina iloʼi ia te ʼAtua.+ 12 Neʼe palalau lelei te ʼu tehina fuli ʼo ʼuhiga mo Temetelio, pea ʼe fakamoʼoni ki ai ia tona faʼahiga maʼuli ʼae ʼe mulimuli ki te moʼoni. ʼE matou fai mo matou he fakamoʼoni ʼo ʼuhiga mo ia, pea ʼe ke iloʼi ko te fakamoʼoni ʼae ʼe matou fai ʼe moʼoni.

13 Neʼe lahi te ʼu meʼa neʼe au fia palalau atu ki ai, kae ʼe mole au fia tohi atu. 14 ʼE au fakaʼamu ke ta felaveʼi la pea ke ta palalau ai.

Ke ia koe te tokalelei.

ʼE ʼofa atu te ʼu tehina. Fakaha age ʼoku ʼofa ki te ʼu tehina takitahi.