Sopo
2 Neʼe hoko mai leva te ʼaho ʼae neʼe olo ai te ʼu foha ʼo te ʼAtua moʼoni*+ kia muʼa ʼo Sehova,+ pea neʼe ulu mo Satana kia muʼa ʼo Sehova.+
2 Koia neʼe fehuʼi ai e Sehova kia Satana: “ ʼE ke haʼu ʼaena maifea?” Neʼe tali e Satana kia Sehova: “Neʼe au fealuʼaki pe ʼo foliʼi te kele.”+ 3 Pea neʼe ui age e Sehova kia Satana: “Neʼe ke tokagaʼi la taku kaugana ko Sopo? ʼE mole he tahi ʼi te kele ʼe tatau mo ia. Ko he tagata agatonu mo faitotonu,+ ʼe manavasiʼi ki te ʼAtua pea ʼe fakamamaʼo mai te meʼa ʼae ʼe kovi. Pea ʼe haga nofo agatonu,+ logo la tau faiga ʼae ke au gaohi koviʼi ia ia+ kae ʼe mole hona tupuʼaga.” 4 Kae neʼe tali age e Satana kia Sehova: “Kili ki te kili! ʼE foaki anai e te tagata ia meʼa fuli ʼe ina maʼu moʼo fetogi ʼaki tona maʼuli.* 5 Koia, haga muʼa ʼo faoʼi tou nima ʼo fāfā ki tona sino, pea ʼe laukovi anai kia koe.”+
6 Neʼe tali leva e Sehova kia Satana: “Koʼeni, ʼe au tuku atu ia ia ki ʼou nima! Kae ʼaua pe naʼa ke matehi ia ia!” 7 Neʼe mavae ai ia Satana mai te ʼafioʼaga ʼo Sehova, pea neʼe ina fakamamahiʼi ia Sopo ʼaki ni foʼi polo fakamataku,+ mai tona ʼalofi vaʼe ki tona ʼulu. 8 Neʼe nofo ai leva ia Sopo ʼi te lefulefu ʼo fakaʼaogaʼi he kogaʼi ipu kele moʼo vaku ʼaki tona sino.+
9 Neʼe ui age leva e tona ʼohoana: “ ʼE kei ke agatonu pe? Laukovi ki te ʼAtua kae ke mate!” 10 Kae neʼe ina tali age: “ ʼE ke palalau ohage ko he fafine vale. ʼE tou tali pe koa mai te ʼAtua moʼoni te meʼa ʼae ʼe lelei? ʼE mole tonu koa la ke tou toe tali mo te meʼa ʼae ʼe kovi?”+ Logope la te ʼu meʼa fuli ʼae neʼe tau mo ia, kae neʼe mole agahala ia Sopo ʼi ʼana palalau.+
11 Neʼe iloʼi leva e te ʼu kaumeʼa* ʼe toko tolu ʼo Sopo te ʼu malaʼia fuli ʼae neʼe tau mo ia, pea neʼe natou tahi ʼomai mai tona potu fenua. Neʼe ko Elifasi+ te tagata Temane, mo Pilitate+ te tagata Suake,+ pea mo Tesofale+ te tagata Naamati. Neʼe natou talaga ai ke natou olo fakatahi kia Sopo ʼo fakaha tonatou ʼofa pea mo fakafimalieʼi tona loto. 12 ʼI tanatou sisio mai mamaʼo ki ai, neʼe mole natou iloʼi pe la ko ia. Neʼe natou fetagihi leʼo lahi ai mo hae ʼonatou kofu, mo li te efu ki te ʼaele mo ʼonatou ʼulu.+ 13 Pea neʼe natou nonofo leva mo ia lolotoga ʼaho ʼe fitu mo po ʼe fitu. Neʼe mole palalau he tahi kia ia, he neʼe natou sisio ki te lahi ʼo tona mamahi.+