Sosue

8 Pea neʼe ui e Sehova kia Sosue: “ ʼAua naʼa ke mataku.+ Ke ke alu mo te kau solia fuli ʼo tauʼi ia te kolo ko Ai. Koʼeni, ʼe au tuku atu kia koe te hau ʼo Ai, mo tana hahaʼi, mo tona kolo pea mo tona fenua.+ 2 ʼE ke fai anai ki te kolo ko Ai pea mo tona hau ia te meʼa ʼae neʼe ke fai ki te kolo ko Seliko pea mo tona hau.+ Kae ʼi te aluʼaga leva ʼaeni, ʼe feala anai ke kotou toʼo maʼa koutou te ʼu koloa pea mo te faga manu. Ke ke fekauʼi he kau solia ke olo ʼo fenonoʼi ʼi te tuʼa kolo.”

3 Neʼe alu ai ia Sosue mo te kau solia fuli ʼo tauʼi ia te kolo ko Ai. Neʼe filifili e Sosue he kau solia malolohi ʼe toko 30 000, pea neʼe ina fekauʼi natou ke olo ʼi te poʼuli. 4 Neʼe ina fai te fakatotonu ʼaeni kia natou: “Kotou fakalogo mai: Kotou olo ʼo fenonoʼi ʼi te tuʼa kolo. ʼAua naʼa kotou mamaʼo fau mai te kolo, pea kotou nonofo teuteu. 5 Kae kia au mo te kau solia fuli ʼae ʼe fakatahi mo au, ʼe matou fakaovi anai ki te kolo. Pea ka ʼomai ʼotatou fili ʼo tauʼi ia matou, ohage pe ko tanatou fai ʼi muʼa atu,+ ʼe matou feholaki anai. 6 ʼE natou tuli anai matou, pea ʼe matou faiga anai ke natou fakamamaʼo mai tonatou kolo, he ʼe natou ui age anai: ‘ ʼE natou feholaki ʼi ʼotatou muʼa, ohage pe ko tanatou fai ʼi muʼa atu.’+ Pea ʼe matou feholaki anai. 7 Pea ʼe kotou mavae fakavilivili leva mai te faʼahi ʼae neʼe kotou fenonoʼi ai ʼo ʼohofi te kolo. ʼE tuku atu anai e Sehova, tokotou ʼAtua ia te kolo ʼaia. 8 Pea ka kotou maʼu te kolo, ʼe kotou tutu anai.+ ʼE kotou fai anai te ʼu meʼa ʼae neʼe ui e Sehova. Koʼena ʼaku fakatotonu.”

9 Neʼe fekauʼi ai natou e Sosue ke olo, pea neʼe natou haʼele ai ʼo kaku ki te koga meʼa ʼae neʼe tonu ke natou fenonoʼi ai. Neʼe natou nonofo ʼi te vaha ʼo Petele mo Ai, ʼi te potu uesite ʼo Ai. Kae neʼe nofo ia Sosue ʼi te po ʼaia mo te toe ʼo te kau solia.

10 Neʼe ʼala uhuuhu leva ia Sosue ʼo fakatahiʼi ʼana tagata solia. Pea neʼe ina taki leva mo te ʼu tagata takitaki ʼo Iselaele ia te kau solia ki Ai. 11 Neʼe olo te kau solia fuli+ ʼae neʼe fakatahi mo ia ʼo nonofo ʼo haga ki te kolo. Neʼe fakatuʼu tonatou nofoʼaga ʼi te potu noleto ʼo Ai. Neʼe ko te potu fenua laulelei ʼae neʼe natou vaha ai mo te kolo ko Ai. 12 Lolotoga te temi ʼaia, neʼe fekauʼi e Sosue he ʼu tagata ʼe toko 5 000 ke olo ʼo fenonoʼi+ ʼi te vaha ʼo Petele+ mo Ai, ʼi te potu uesite ʼo te kolo. 13 Koia, neʼe kaugamalie te kau solia ʼae neʼe natou fakatuʼu tonatou nofoʼaga ʼi te potu noleto ʼo te kolo,+ kae nonofo te tahi kau solia ʼi te potu uesite ʼo te kolo.+ Pea ʼi te po ʼaia, neʼe alu ia Sosue ki te potu fenua laulelei.

14 ʼI te sio ʼa te hau ʼo Ai ki te faʼahi ʼaia, neʼe mavae fakavilivili ai mo ʼana tagata mai te kolo ʼi te kei hegihegi, ke natou olo ʼo tauʼi ia Iselaele. Neʼe fehagaʼaki te ʼu foʼi kautau ʼaia ʼe lua ʼi he koga meʼa neʼe haga ki te toafa. Kae neʼe mole iloʼi e te hau ʼo Ai neʼe fenonoʼi te tahi kau solia ʼi te tuʼa kolo. 15 Pea neʼe ʼohofi e te ʼu tagata ʼo Ai ia Sosue mo te kau Iselaele fuli ʼae neʼe fakatahi mo ia, ʼo natou feholaki ai ʼi te ala ʼae ʼe alu ki te toafa.+ 16 Neʼe fakatahitahi te ʼu tagata fuli ʼo te kolo ke natou tuli ia natou. Neʼe natou tuli ai ia Sosue, ʼo fakamamaʼo mai tonatou kolo. 17 Neʼe mole kei ʼi ai he tagata ʼi Ai pea mo Petele. Neʼe natou tuli fuli ia te kau Iselaele kae neʼe natou tuku ava te ʼu matapa ʼo te kolo.

18 Pea neʼe ui e Sehova kia Sosue: “Hiki te savelo ʼae ʼe ke toʼo ʼo ke faoʼi tou nima ki Ai,+ he ʼe au tuku atu kia koe te kolo ʼaia.”+ Neʼe hiki ai e Sosue te savelo ʼae neʼe ina toʼo, ʼo ina faoʼi ai tona nima ki te kolo. 19 ʼI te temi ʼae neʼe ina faoʼi ai tona nima, neʼe mavae ai tana kau solia mai te koga meʼa ʼae neʼe fenonoʼi ai, ʼo hufi te kolo pea neʼe natou maʼu ai. Neʼe natou foimo tutu atu aipe te kolo.+

20 ʼI te maliu mai leva ʼa te ʼu tagata ʼo Ai, ʼo sisio ki te kohu ʼae kua alu ake ʼi tonatou kolo, neʼe mole kei natou lava feholaki ki he tahi faʼahi. Pea neʼe maliu ai leva te kau solia ʼa Sosue ʼae neʼe feholaki ki te toafa, ʼo tauʼi te ʼu tagata ʼo Ai. 21 Koia, ʼi te sio ʼa Sosue mo te kau Iselaele fuli ʼae neʼe fakatahi mo ia kua maʼu te kolo e te kau solia ʼae neʼe fenonoʼi pea mo te alu ake ʼa te kohu ʼi te kolo, neʼe natou toe liliu leva ʼo tauʼi te ʼu tagata ʼo Ai. 22 Pea neʼe mavae te kau solia Iselaele mai te kolo ʼo olo ʼo tauʼi te ʼu tagata ʼo Ai. Neʼe mole kei ʼi ai honatou holaʼaga, he neʼe ʼohofi natou mai muʼa pea mo muli. Neʼe matehi e te kau Iselaele ia natou fuli, neʼe mole hao he tahi pea neʼe mole lava hola he tahi.+ 23 Kae neʼe natou puke maʼuli ia te hau ʼo Ai,+ ʼo natou ʼave kia Sosue.

24 Koia neʼe matehi ai e te kau Iselaele ia te hahaʼi fuli ʼo Ai ʼi te toafa ʼae neʼe tuli ai natou, ʼei neʼe natou matehi ia natou fuli ʼaia ʼaki te heleta. Hili ʼaia, neʼe natou toe liliu fuli ai ki Ai ʼo matehi ia natou ʼae neʼe kei toe ʼaki te heleta. 25 ʼI te ʼaho ʼaia, neʼe matehi ai te hahaʼi fuli ʼo Ai, ko te toko 12 000, tagata mo fafine. 26 Neʼe hoki tuku e Sosue tona nima ki lalo, ʼae neʼe ina puke ʼaki te savelo+ ʼi te hoki ʼosi mamate fuli ʼa te hahaʼi ʼo Ai.+ 27 Neʼe toʼo leva e te kau Iselaele te faga manu pea mo te ʼu koloa ʼae neʼe natou maʼu ʼi te kolo ʼaia, ʼo mulimuli pe ki te ʼu fakatotonu ʼae neʼe foaki e Sehova kia Sosue.+

28 Pea neʼe tutu e Sosue ia Ai pea neʼe liliu ko he kolo maumau.+ Neʼe tuku feia te kolo ʼo kaku mai ki te ʼaho nei. 29 Neʼe ina tautau te sino ʼo te hau ʼo Ai ki he pou* ʼo kaku ki te afiafi. Pea neʼe ina fakatotonu ke fakahifo te sino ʼo te hau mai te pou ʼi muʼa ʼo te to ʼo te laʼa.+ Pea neʼe li tona sino ki te huʼaga ʼo te kolo pea neʼe fakatuʼuga ai ni maka. ʼE kei tuʼu aipe ʼi te temi nei.

30 Pea neʼe fakatuʼu leva e Sosue he ʼaletale maʼa Sehova, te ʼAtua ʼo Iselaele ʼi te Moʼuga ʼo Epale.+ 31 Neʼe ina laga te ʼaletale ʼo mulimuli pe ki te fakatotonu ʼae neʼe fai e Moisese, te tagata faifekau ʼa Sehova, ki te kau Iselaele pea ohage pe ko tona tohi ʼi te Lao+ ʼa Moisese: “Ko he ʼaletale ʼe fai ʼaki ni maka neʼe mole ta ʼaki he meʼa gaue ukamea.”+ Neʼe momoli ai ni holokoseta* maʼa Sehova pea mo he ʼu sakilifisio ʼo te tokalelei.*+

32 Pea neʼe hiki ai leva e Sosue ia te Lao ki te ʼu maka. Ko te Lao+ ʼaia neʼe tohi e Moisese ia muʼa ʼo te kau Iselaele.+ 33 Neʼe tutuʼu ia te kau Iselaele fuli, mo te ʼu tagata takitaki, mo te ʼu pule, pea mo te ʼu tuʼi fakamau ʼi te ʼu tafaʼaki ʼo te Aleka, ia muʼa ʼo te kau pelepitelo Levite, ʼae neʼe natou fata te aleka ʼo te fuakava ʼa Sehova. Pea neʼe toe kau ai foki mo te kau matapule.+ Neʼe vaelua te hahaʼi, ko te tahi koga neʼe tutuʼu ʼo haga ki te Moʼuga ʼo Kalisimi pea ko te tahi koga ki te Moʼuga ʼo Epale+ (ohage pe ko tona fakatotonu ki muʼa atu e Moisese, te tagata faifekau ʼa Sehova),+ ke tapuakiʼi ai te hahaʼi ʼo Iselaele. 34 Hili ʼaia, neʼe lau leʼo lahi e Sosue te Lao katoa,+ ia te ʼu tapuakina+ mo te ʼu malaʼia,+ ohage pe ko tona tuʼu ʼi te tohi ʼo te Lao. 35 Neʼe lau leʼo lahi e Sosue te ʼu meʼa fuli ʼae neʼe fakatotonu e Moisese. Neʼe ina fai te faʼahi ʼaia ia muʼa ʼo te hahaʼi fuli ʼo Iselaele,+ ʼo kau ai te hahaʼi fafine mo te ʼu fanau, pea mo te kau matapule+ ʼae neʼe maʼuʼuli* fakatahi mo natou.+