Senesi

20 Neʼe hiki leva e Apalahamo tona nofoʼaga+ ʼo alu ki te fenua ʼo te Nekepe, pea neʼe maʼuli ʼi te vaha ʼo Katesi+ mo Sule.+ ʼI tana nofo* ʼi Kelali,+ 2 neʼe toe ui pe e Apalahamo ʼo ʼuhiga mo tona ʼohoana ko Sala: “ ʼE ko toku tokolua.”+ Koia, neʼe fekauʼi ai e Apimeleke, te hau ʼo Kelali ʼana hahaʼi faifekau ke natou ʼaumai ia Sala kia ia.+ 3 Ki muli age, ʼi te tahi po, neʼe ui e te ʼAtua kia Apimeleke ʼi he moemisi: “Koʼeni, ʼe ke mate moʼoni anai ʼuhi ko te fafine ʼae neʼe ke toʼo,+ he ʼe kua ʼosi ʼohoana ia pea kua ʼi ai tona pule.”+ 4 Kae neʼe mole fāfā ia Apimeleke ki te fafine ʼaia.* Koia neʼe ina ui ai: “Sehova, ʼe ke matehi anai koa te hahaʼi fuli ʼo he puleʼaga kae neʼe mole natou fai he meʼa ʼe kovi?* 5 Neʼe mole ui mai koa la e te tagata: ‘ ʼE ko toku tokolua’? Pea neʼe mole toe ui koa la e te fafine: ‘ ʼE ko toku tokolua’? Neʼe mole au maʼu he ʼu manatu ʼe kovi. Pea neʼe mole au iloʼi ʼe au fai he meʼa ʼe kovi.” 6 Neʼe ui leva e te ʼAtua moʼoni kia ia ʼi te moemisi: “ ʼE au iloʼi neʼe ke fai te faʼahi ʼaia kae neʼe mole ke maʼu he ʼu manatu ʼe kovi. Koia ʼae neʼe au taʼofi ai ia koe ke mole ke fāfā kia ia naʼa ke agahala mai kia te au. 7 Kae ʼi te lakaga nei, toe fakaliliu te ʼohoana ʼo te tagata ʼaia, he ʼe ko he polofeta.+ ʼE ina hufakiʼi anai koe,+ pea ʼe ke maʼuli anai. Kae kapau ʼe mole ke toe fakaliliu ia te fafine ʼaia, ke ke iloʼi ʼe ke mate moʼoni anai, ʼo feia mo natou fuli ʼo tou loto fale.”

8 Neʼe ʼala uhuuhu leva ia Apimeleke, ʼo pauʼi ʼana hahaʼi faifekau fuli pea neʼe ina fakamatala age kia natou te ʼu meʼa fuli ʼaia. Neʼe natou matataku ai. 9 Pea neʼe pauʼi leva e Apimeleke ia Apalahamo, ʼo ina ui age: “He koʼe neʼe ke fai te faʼahi ʼaia kia matou? Neʼe meʼa pe ke matou fai he toe agahala lahi, ia au mo te hahaʼi ʼo toku puleʼaga, ʼuhi pe ko koe. Kotea koa te agahala ʼae neʼe au fai kia koe? Neʼe mole lelei te meʼa ʼae neʼe ke fai mai.” 10 Pea neʼe hoko atu e Apimeleke tana palalau kia Apalahamo: “Neʼe kotea koa ʼae neʼe ke manatu ki ai ʼi tau fai te faʼahi ʼaia?”+ 11 Pea neʼe tali age e Apalahamo: “Neʼe au ui ʼi toku loto: ‘ ʼE mahino ia, ʼe mole manavasiʼi te hahaʼi ʼo te koga meʼa ʼaeni ki te ʼAtua pea ʼe natou matehi anai ia au ʼuhi ko toku ʼohoana.’+ 12 Tahi ʼae meʼa, ʼe ko toku tokolua moʼoni, he ʼe ko te ʼofafine ʼo taku tamai kae ʼe mole ma faʼe tahi, pea kua liliu ia ko toku ʼohoana.+ 13 Pea ʼi te temi ʼae neʼe ui mai ai e te ʼAtua ke au mavae mo mamaʼo mai te loto fale ʼo taku tamai,+ neʼe au ui age ki toku ʼohoana: ‘Ke ke fakaha tou ʼofa agatonu kia au, ʼo ke fai te faʼahi ʼaeni: Ko he potu pe ʼe ta olo ki ai, ke ke ui ʼo ʼuhiga mo au: “ ʼE ko toku tokolua.” ’ ”+

14 Neʼe toʼo leva e Apimeleke he ʼu ovi mo he ʼu pipi pea mo he ʼu tagata mo he ʼu fafine faifekau, ʼo ina foaki age kia Apalahamo, pea neʼe ina toe fakaliliu leva tona ʼohoana ko Sala. 15 Neʼe toe ui age e Apimeleke: “Koʼeni, ʼe tuʼu toku fenua katoa ʼi ʼou muʼa. Ke ke alu ʼo nofo ʼi he potu pe ʼe ke loto ki ai.” 16 Pea neʼe ina ui kia Sala: “Koʼeni, ʼe au foaki he ʼu piesi siliva ʼe afe ki tou tokolua.+ ʼE ko he fakamoʼoni ʼaia kia natou fuli ʼo tou loto fale pea mo te hahaʼi fuli, neʼe mole ke fai he meʼa ʼe kovi, pea ʼe ke maʼa ʼi te meʼa ʼaia.” 17 Pea neʼe faikole leva ia Apalahamo ki te ʼAtua moʼoni ʼo ʼuhiga mo Apimeleke. Neʼe fakamalolo ai e te ʼAtua ia Apimeleke, mo tona ʼohoana pea mo ʼana fafine kaugana. Neʼe natou toe maʼu fanau ai, 18 he neʼe mole fakagafua e Sehova ke maʼu fanau te ʼu fafine fuli ʼo te loto fale ʼo Apimeleke, ʼuhi ko Sala te ʼohoana ʼo Apalahamo.+