Senesi
22 Hili ʼaia, neʼe ʼahiʼahiʼi e te ʼAtua moʼoni ia Apalahamo,+ ʼo ina ui age: “Apalahamo!” Pea neʼe ina tali age: “Koʼeni au!” 2 Neʼe hoko atu e te ʼAtua: “Fakalelei siʼou loto, kae ke ke toʼo ia Isaake+ tou foha, tou foha ʼulu tokotahi ʼae ʼe ke ʼofa mamahi ai,+ pea ke alu ki te fenua ʼo Molia,+ pea ke momoli ai ia ia ohage ko he holokoseta ʼi te moʼuga ʼae ka au fakaha atu anai.”
3 Koia neʼe ʼala uhuuhu ai ia Apalahamo ʼo ina teuteuʼi tana asino, pea neʼe ina ʼave ʼana tagata faifekau ʼe toko lua ke olo mo ia mo Isaake tona foha. Neʼe ina fahi te ʼu fafie ʼo te holokoseta, pea neʼe alu ai leva tonatou fagona ki te koga meʼa ʼae neʼe fakaha age e te ʼAtua moʼoni. 4 ʼI te tolu ʼaho, neʼe hiki ake e Apalahamo ʼona mata pea neʼe sio mai mamaʼo ki te koga meʼa ʼaia. 5 Neʼe ui leva e Apalahamo ki ʼana tagata faifekau: “Kolua nonofo ʼi heni mo te asino, kae ʼe au alu muʼa mo toku foha ki he age ʼo atolasio ai ki te ʼAtua, pea hoki ma toe liliu mai anai kia koulua.”
6 Neʼe toʼo e Apalahamo te ʼu fafie ʼo te holokoseta ʼo hili ki te ʼu fuga ʼuma ʼo Isaake. Neʼe ina toʼo te afi* mo te hele, pea neʼe hoko atu leva tonā fagona. 7 Neʼe ui e Isaake ki tana tamai ko Apalahamo: “Siʼaku tamai!” Neʼe ina tali age: “Ko au!” Neʼe hoko atu e Isaake: “Koʼeni te afi pea mo te ʼu fafie, kae kofea te ovi ʼae ki te holokoseta?” 8 Neʼe tali age e Apalahamo: “Siʼoku foha, ʼe hoki foaki mai pe anai e te ʼAtua te ovi ʼae ki te holokoseta.”+ Pea neʼe hoko atu tanā haʼele.
9 Neʼe nā kaku leva ki te koga meʼa ʼae neʼe fakaha age e te ʼAtua moʼoni ki ai, pea neʼe laga e Apalahamo he ʼaletale ʼo ina hili ki ai te ʼu fafie. Neʼe ina haʼi te ʼu nima mo te ʼu vaʼe ʼo tona foha ko Isaake pea neʼe ina fakatakoto leva ia ia ki te ʼaletale, ʼi te fuga fafie.+ 10 Neʼe toʼo leva e Apalahamo te hele ke ina matehi tona foha.+ 11 Kae neʼe pauʼi mai te lagi te ʼaselo ʼa Sehova kia ia ʼo ina ui: “Apalahamo, Apalahamo!” Neʼe ina tali age: “Koʼeni au!” 12 Pea neʼe ina hoko atu: “ ʼAua naʼa ke matehi te tama, pea ʼaua naʼa ke fai he meʼa kia ia, he ʼe ʼi te lakaga nei, kua au iloʼi ʼe ke manavasiʼi ki te ʼAtua koteʼuhi neʼe mole ke fakafisi mai kia au tou foha, ʼei, tou foha ʼulu tokotahi.”+ 13 Pea neʼe hiki ake e Apalahamo ʼona mata pea neʼe sio ki he ovi tagata neʼe mole faʼa mamaʼo mo ia, neʼe maʼua ʼona tala ʼi he kiʼi fuʼu ʼakau. Neʼe alu ai ia Apalahamo ʼo toʼo te ovi tagata ʼaia pea neʼe ina momoli ohage ko he holokoseta moʼo fetogi ʼaki tona foha. 14 Neʼe fakahigoa leva e Apalahamo te koga meʼa ʼaia ko Sehova-sile.* Koia ʼae ʼe kei ui ai ia ʼaho nei: “ ʼI te moʼuga ʼo Sehova, ʼe Ina foaki anai te meʼa ʼae ʼe ʼaoga.”+
15 Pea neʼe pauʼi mai te lagi te ʼaselo ʼa Sehova kia Apalahamo, ko tona tuʼa lua ʼaia, 16 ʼo ina ui: “ ʼE ui e Sehova: ‘Koʼeni neʼe ke fai te meʼa ʼaia pea neʼe mole ke fakafisi mai tou foha, ʼei, tou foha ʼulu tokotahi.+ Koia ʼe au fakapapau e au totonu,+ 17 ʼe au tapuakiʼi moʼoni anai ia koe pea ʼe au fakahahaʼi moʼoni anai tou hakoga ohage ko te ʼu fetuʼu ʼo te lagi pea mo te ʼu fisiʼi ʼone ʼo te tai,+ pea ʼe maʼu anai e tou hakoga te ʼu kolo ʼo ʼona fili.+ 18 Pea ʼe tapuakina* anai te ʼu puleʼaga fuli ʼo te kele ʼaki tou hakoga,+ he neʼe ke fakalogo ki toku leʼo.’ ”+
19 Hili ʼaia, neʼe toe liliu leva ia Apalahamo ki ʼana tagata faifekau, pea neʼe natou olo ai ki Pele-sepa.+ Neʼe haga nofo aipe ia Apalahamo ʼi Pele-sepa.
20 Ki muli age, neʼe fakaha age kia Apalahamo: “Koʼeni, neʼe fanauʼi e Milika he ʼu foha ʼo Naole, tou tehina:+ 21 ko Usia, tona ʼuluaki foha, mo tona tehina ko Puse, mo Kemuele, te tamai ʼa Alame, 22 mo Keseti, mo Aso, mo Pilitasi, mo Sitilafe pea mo Petuele.”+ 23 Ko Petuele ko te tamai ʼa Lepeka.+ Neʼe fanauʼi e Milika te ʼu foha ʼaia ʼe toko valu ʼo Naole, te tehina ʼo Apalahamo. 24 Neʼe toe fanauʼi foki e tana fafine, ʼae ʼe higoa ko Leuma, he ʼu tama: ko Tepaki, mo Kaami, mo Taasi pea mo Maaka.