Numelo

19 Pea neʼe toe ui e Sehova kia Moisese mo Alone: 2 “Koʼeni te lao ʼae neʼe fakaha e Sehova: ‘Kolua ui ki te kau Iselaele ke natou ʼaumai kia koulua he pipi fafine kula, mo heʼe mele+ pea neʼe heʼeki hili ki ai he ʼakau toho. 3 ʼE kolua ʼave anai te pipi fafine ʼaia ki te pelepitelo ko Eleasale. ʼE ina taki anai ki tuʼa atu ʼo te nofoʼaga, pea ʼe matehi anai ʼi ʼona muʼa. 4 ʼE ʼai anai e te pelepitelo ko Eleasale he moʼi toto ʼo te manu ʼaia ki tona kauʼi tuhi, pea ʼe ina afuhi tuʼa fitu anai ki te kele ʼo haga ki te huʼaga ʼo te fale la ʼo te fono.+ 5 Pea ʼe tutu anai te pipi fafine ʼi ʼona muʼa. ʼE tutu anai tona kili, mo tona kakano, mo tona toto pea mo tana faifekau.+ 6 ʼE toʼo anai e te pelepitelo te ʼakau ʼae ko te sete, mo te isope,+ pea mo te filo kula ʼo li ki te afi ʼae ʼe tutu ai te pipi fafine. 7 Pea ʼe fo anai e te pelepitelo ʼona teu pea mo maʼanu, hili ʼaia, ʼe feala anai ke hu ki te nofoʼaga. Kae ʼe heʼe maʼa anai te pelepitelo ʼo kaku ki te afiafi.

8 “ ‘Ko ia ʼae neʼe ina tutu te pipi fafine, ʼe ina fo anai ʼona mutuʼi meʼa mo maʼanu, pea ʼe heʼe maʼa anai ʼo kaku ki te afiafi.

9 “ ‘ ʼE tanaki anai e he tagata ʼe maʼa te lefulefu ʼo te pipi fafine,+ pea ʼe ina ʼave anai ki he koga meʼa ʼe mole heʼe maʼa, ʼi tuʼa atu ʼo te nofoʼaga. ʼE taupau anai e te kau Iselaele te lefulefu ʼaia moʼo teuteuʼi ʼaki te vai ʼo te fakamaʼa.+ Ko te pipi fafine ʼaia ʼe ko he molaga ʼo te agahala. 10 Ko ia ʼae ʼe ina tanaki te lefulefu ʼo te pipi fafine, ʼe ina fo anai ʼona mutuʼi meʼa pea ʼe heʼe maʼa anai ʼo kaku ki te afiafi.

“ ‘Koʼeni te lao ki te kau Iselaele pea mo te matapule ʼae ʼe nofo ʼi te lotolotoiga ʼo natou, pea ʼe ko he lao anai ʼo talu ai:+ 11 Ko he tahi pe ʼe fāfā ki he tahi kua mate, ʼe heʼe maʼa anai lolotoga ʼaho ʼe fitu.+ 12 ʼE tonu anai ke ina fakamaʼa ia ia totonu ʼaki te vai ʼaia ʼi te tolu ʼaho, pea ʼe maʼa anai ʼi te fitu ʼaho. Kae kapau ʼe mole ina fakamaʼa ia ia totonu ʼi te tolu ʼaho, ʼe heʼe maʼa pe anai ʼi te fitu ʼaho. 13 Ko he tahi pe ʼe fāfā ki te sino ʼo he tahi kua mate pea ʼe mole ina fakamaʼa ia ia totonu, neʼe ina moamoagaʼi te tapenakulo ʼo Sehova,+ pea ʼe tonu anai ke matehi ia ia ʼi Iselaele.+ Koia, ʼe heʼe maʼa koteʼuhi neʼe mole afuhi kia ia te vai ʼo te fakamaʼa.+

14 “ ‘Koʼeni te lao moka mate he tagata ʼi he fale la: Ko he tahi pe ʼe ʼulu ki te fale la ʼaia, peʼe ko he tahi pe kua nofo ʼi te fale la, ʼe heʼe maʼa anai lolotoga ʼaho ʼe fitu. 15 Ko he ʼaiʼaga meʼa pe ʼe tuku ava kae ʼe mole hona tapunu ʼe pipiki ki ai, ʼe heʼe maʼa anai.+ 16 Ko he tahi pe ʼe fāfā ki he tahi neʼe matehi ʼaki te heleta, peʼe ko te sino mate ʼo he tahi, peʼe ko he ʼu huiʼi tagata, peʼe ko he fale maka ʼi tuʼa atu ʼo te nofoʼaga, ʼe heʼe maʼa anai lolotoga ʼaho ʼe fitu.+ 17 ʼE ʼai anai ki he ipu he lefulefu ʼe toʼo mai te molaga ʼo te agahala ʼae neʼe tutu, pea ʼe huaʼi anai ki ai he vai mai he matapuna vai ke fakamaʼa ai ia ia ʼae ʼe heʼe maʼa. 18 Pea ʼe toʼo anai e he tagata ʼe maʼa+ he isope+ ʼo ina fufuʼi ki te vai pea ʼe ina afuhi anai ki te fale la, mo te ʼu ʼaiʼaga meʼa fuli, mo te hahaʼi* ʼae neʼe nonofo ai, pea mo ia ʼae neʼe fāfā ki he ʼu huiʼi tagata, peʼe ko he tahi neʼe matehi, peʼe ko he sino mate, peʼe ko he fale maka. 19 Ko ia ʼae ʼe maʼa ʼe ina afuhi anai te vai kia ia ʼae ʼe heʼe maʼa ʼi te tolu ʼaho mo te fitu ʼaho. Pea ʼe ina fakamaʼa anai ia ia ʼae ʼe heʼe maʼa mai tana agahala ʼi te fitu ʼaho.+ ʼE fo anai e ia ʼae ʼe heʼe maʼa ʼona mutuʼi meʼa mo maʼanu, pea ʼe hoki maʼa anai ʼi te afiafi.

20 “ ‘Kae ko te tagata ʼae ʼe heʼe maʼa pea ʼe mole ina fakamaʼa anai ia ia totonu, ʼe tonu anai ke matehi,+ he neʼe ina moamoagaʼi te sagatualio ʼo Sehova. ʼE heʼe maʼa he neʼe mole afuhi kia ia te vai ʼo te fakamaʼa.

21 “ ‘Koʼeni te lao ki te hahaʼi ʼo Iselaele, pea ʼe ko he lao anai ʼo talu ai: Ko ia ʼae ʼe ina afuhi te vai ʼo te fakamaʼa,+ ʼe tonu anai ke ina fo ʼona mutuʼi meʼa, pea ko ia ʼae ʼe fāfā ki te vai ʼo te fakamaʼa, ʼe heʼe maʼa anai ʼo kaku ki te afiafi. 22 ʼE heʼe maʼa anai te ʼu meʼa fuli ʼae ʼe fāfā ki ai he tahi ʼe heʼe maʼa, pea ko ia ʼae ʼe fāfā ki te ʼu meʼa ʼaia, ʼe heʼe maʼa anai ʼo kaku ki te afiafi.’ ”+