Numelo

18 Pea neʼe ui e Sehova kia Alone: “ ʼE lau pe anai ko tau hala, mo ʼou foha pea mo tou hologa, moka ʼe maumauʼi e he tahi te ʼu lao ʼo ʼuhiga mo te sagatualio,+ pea ʼe toe lau pe anai ko tau hala mo ʼou foha, moka ʼe maumauʼi e he tahi te ʼu lao ʼo ʼuhiga mo te gaue fakapelepitelo.+ 2 Pea ke ke toe ʼaumai ʼou tehina ʼo te telepi ʼo Levi, te telepi ʼo ʼau kui, ke natou tokoni atu+ pea mo gaue kia koe mo ʼou foha, ia muʼa ʼo te fale la ʼo te Fakamoʼoni.+ 3 ʼE natou fakahoko anai ʼonatou maʼua kia koe pea mo te fale la katoa.+ Kae ʼe mole tonu anai ke natou fakaovi ki te ʼu meʼa kehekehe ʼo te koga meʼa taputapu pea mo te ʼaletale, ke mole natou mamate ai ʼo feia mo koutou.+ 4 ʼE natou tokoni atu anai pea mo fakahoko ʼonatou maʼua ʼo ʼuhiga mo te fale la ʼo te fono pea mo te ʼu gaue fuli ʼo te fale la, kae ʼe mole fakaovi anai he tahi kehe* kia koutou.+ 5 ʼE tonu anai ke kotou fakahoko tokotou maʼua ʼo ʼuhiga mo te koga meʼa taputapu+ pea mo te ʼaletale,+ ke mole to ai toku hauhau+ ki te hahaʼi ʼo Iselaele. 6 Neʼe au filifili e au totonu ʼokotou tehina, ia te kau Levite, mai te kau Iselaele ke natou liliu ko he meʼa ʼofa maʼa koutou.+ Pea kua foaki ia natou kia Sehova ke natou tokakaga ki te gaue ʼo te fale la ʼo te fono.+ 7 ʼE ke tokaga anai mo ʼou foha ki te ʼu gaue fakapelepitelo ʼae ʼe tonu ke fai ʼi te ʼaletale mo te tuʼa lito,+ pea ʼe kotou fakahoko anai te gaue ʼaia.+ Neʼe au foaki atu kia koutou te gaue fakapelepitelo ohage ko he meʼa ʼofa. Pea kapau ʼe fakaovi he tahi kehe* ki te sagatualio, ʼe tonu anai ke matehi.”+

8 Neʼe toe ui age e Sehova kia Alone: “ ʼE au fakanofo koe ke ke tokaga ki te ʼu meʼa ʼofa ʼae ʼe foaki mai kia te au.+ Neʼe au foaki atu kia koe mo ʼou foha he vahe ʼi te ʼu meʼa ʼofa taputapu fuli ʼae ʼe foaki e te kau Iselaele, ke liliu ko hokotou vahe ʼo talu ai.+ 9 Koʼeni tou vahe ʼi te ʼu molaga taputapu ʼaupito ʼae ʼe tutu ʼi te ʼaletale: ko te ʼu molaga fuli ʼae ʼe natou fai, ʼae ʼe kau ai ʼanatou molaga meʼa kai,+ mo ʼanatou molaga ki te agahala,+ pea mo ʼanatou sakilifisio fakatokatoka+ ʼae ʼe natou ʼaumai kia te au. ʼE ko he meʼa taputapu ʼaupito kia koe mo ʼou foha. 10 ʼE ke kai anai te ʼu meʼa ʼaia ʼi he koga meʼa taputapu ʼaupito.+ ʼE feala anai ke kai ki ai te ʼu tagata fuli. ʼE ko he meʼa taputapu anai kia koe.+ 11 Koʼeni te ʼu meʼa ʼae ʼe ke toe maʼu: ko te ʼu meʼa ʼofa+ ʼae ʼe foaki e te kau Iselaele pea mo ʼanatou molaga ʼae ʼe lu.+ ʼE au foaki atu te ʼu meʼa ʼaia kia koe, mo ʼou foha pea mo ʼou ʼofafine, ke liliu ko hokotou vahe ʼo talu ai.+ ʼE feala anai ke kai ki ai ia natou fuli ʼae ʼe maʼa ʼi tou loto fale.+

12 “ ʼE au foaki atu kia koe te ʼu ʼuluaki fua+ ʼae ʼe foaki e te kau Iselaele kia Sehova: te lolo fuli ʼae ʼe lelei tukupau, mo te vino foʼou fuli ʼae ʼe lelei tukupau pea mo te fulumeto.*+ 13 ʼE ke maʼu anai te ʼu ʼuluaki fua fuli ʼae kua matutuʼa ʼo tonatou kele, ʼae ʼe natou foaki kia Sehova.+ ʼE feala anai ke kai ki ai ia natou fuli ʼae ʼe maʼa ʼi tou loto fale.

14 “ ʼE ke maʼu anai te ʼu meʼa fuli ʼae ʼe tuku keheʼi* ki te ʼAtua ʼi Iselaele.+

15 “ ʼE ke maʼu anai te ʼu ʼuluaki tupu fuli,+ pe ʼe ko he tagata peʼe ko he manu, ʼae ʼe foaki anai kia Sehova. Kae ʼe tonu anai ke ke toe totogi te ʼuluaki tupu ʼo te tagata,+ ʼo feia mo te ʼu ʼuluaki ʼuhi ʼo te ʼu manu ʼae ʼe heʼe maʼa.+ 16 Ka kua mahina katoa ʼo fai ki ʼoluga, ʼe ko sikele* siliva anai ʼe nima tona totogi,+ ʼo mulimuli ki te sikele ʼo te koga meʼa taputapu.* Ko he foʼi sikele ʼe tahi ʼe ko kela* ʼe 20. 17 Kae ʼe gata pe anai ki te ʼuluaki ʼuhi ʼo he vitulo, peʼe ʼo he ovi tagata, peʼe ʼo he tao ʼe mole ke totogi anai.+ ʼE taputapu te ʼu ʼuhi ʼaia. ʼE ke afuhi anai tonatou toto ki te ʼaletale+ pea ʼe ke tutu anai ʼonatou gako ke kohu, ohage ko he molaga ʼe tutu maʼa Sehova pea ʼe ko he ʼaele lelei kia te ia.+ 18 ʼE ke maʼu anai te kanoʼi manu, ohage pe ko tau maʼu te fatafata ʼo te manu ʼae ʼe momoli ohage ko he molaga ʼe lu, ʼo feia mo te alaga mataʼu.+ 19 Ko te ʼu meʼa ʼofa taputapu fuli ʼae ʼe foaki anai e te kau Iselaele kia Sehova,+ ʼe au foaki atu kia koe, mo ʼou foha pea mo ʼou ʼofafine, ke liliu ko hokotou vahe ʼo talu ai.+ ʼE ko he fuakava ʼo te masima,* ʼe fai e Sehova mo koe pea mo tou hologa ʼo talu ai.”

20 Pea neʼe toe ui e Sehova kia Alone: “ ʼE mole ʼi ai anai hou tofiʼa ʼi te fenua ʼo Iselaele, pea ʼe mole ke maʼu anai hou moʼi kele ʼi te lotolotoiga ʼo natou.+ ʼE ko au tou vahe pea mo tou tofiʼa ʼi te lotolotoiga ʼo te kau Iselaele.+

21 “Pea ʼe au foaki ki te ʼu foha ʼo Levi te vahe tahi ki te hogofulu ʼo te ʼu meʼa fuli+ ʼae ʼe maʼu ʼi Iselaele ohage ko honatou tofiʼa, ʼuhi ko te gaue ʼae ʼe natou fakahoko ʼi te fale la ʼo te fono. 22 ʼE mole toe feala anai ke fakaovi te hahaʼi ʼo Iselaele ki te fale la ʼo te fono, naʼa natou agahala pea mo mamate. 23 ʼE fakahoko anai e te kau Levite te gaue ʼo te fale la ʼo te fono, pea ʼe lau pe anai ʼe ko tanatou hala moka ʼe agahala te hahaʼi.+ ʼE mole natou maʼu anai honatou tofiʼa ʼi te lotolotoiga ʼo te kau Iselaele. ʼE ko he lao ʼaia mai he taʼiake ki he tahi taʼiake.+ 24 Koteʼuhi ʼe au foaki ki te kau Levite te vahe tahi ki te hogofulu ʼae ʼe foaki e te kau Iselaele kia Sehova, ke liliu ko honatou tofiʼa. Koia neʼe au ui ai: ‘ ʼE mole natou maʼu anai honatou tofiʼa ʼi te lotolotoiga ʼo te kau Iselaele.’ ”+

25 Pea neʼe ui e Sehova kia Moisese: 26 “ ʼE ke ui anai ki te kau Levite: ‘ ʼE kotou maʼu anai te vahe tahi ki te hogofulu ʼae neʼe foaki mai e te kau Iselaele pea neʼe au foaki atu, ke liliu ko hokotou tofiʼa.+ Pea ʼe kotou toʼo anai mai ai he vahe tahi ki te hogofulu, pea ʼe ko he meʼa ʼofa ʼaia kia Sehova.+ 27 Pea ʼe lau anai ko hakotou meʼa ʼofa, ohage pe neʼe ko hakotou fulumeto,+ peʼe ko hakotou vino, peʼe ko hakotou lolo. 28 ʼI takotou fai feia, ʼe kotou toe foaki anai he meʼa ʼofa kia Sehova ʼe toʼo mai te vahe tahi ki te hogofulu ʼae ʼe foaki atu e te kau Iselaele, pea ʼe kotou foaki anai ki te pelepitelo ko Alone te meʼa ʼofa ʼaia ʼa Sehova. 29 ʼI te ʼu meʼa ʼofa ʼae ʼe lelei tukupau neʼe foaki atu pea ko he ʼu meʼa taputapu, ʼe kotou toʼo ai anai he ʼu meʼa ʼofa kehekehe ʼo foaki kia Sehova.’+

30 “Pea ʼe ke ui age anai kia natou: ‘ ʼU Levite, ka kotou foaki te meʼa ʼae ʼe lelei tukupau neʼe toʼo mai te ʼu meʼa ʼofa ʼaia, ʼe kotou maʼu anai tona toe, ohage pe ko hakotou fulumeto, peʼe ko hakotou vino, peʼe ko hakotou lolo. 31 ʼE feala anai ke kotou kai ki ai mo tokotou loto fale ʼi he koga meʼa pe, he ʼe ko tokotou totogi ʼaia ki te ʼu gaue ʼae ʼe kotou fai ʼi te fale la ʼo te fono.+ 32 Kapau ʼe hoko atu takotou foaki te meʼa ʼae ʼe lelei tukupau neʼe toʼo mai te ʼu meʼa ʼofa ʼaia, ʼe mole kotou agahala anai. ʼE mole tonu anai ke kotou moamoagaʼi te ʼu meʼa taputapu ʼa te kau Iselaele, naʼa kotou mamate.’ ”+