Selemia
31 ʼE ui e Sehova: “ ʼI te temi ʼaia, ʼe au liliu anai ko te ʼAtua ʼo te ʼu famili fuli ʼo Iselaele, pea ʼe natou liliu anai ko taku hahaʼi.”+
2 Koʼeni te folafola ʼa Sehova:
“ ʼI te toafa neʼe ʼofa te ʼAtua ki te hahaʼi ʼae neʼe hao ʼi te tau,
ʼI te temi ʼae neʼe haʼele ai Iselaele ki tonatou maloloʼaga.”
3 Neʼe ha mai ia Sehova mai mamaʼo kia au ʼo ui:
“Neʼe au ʼofa ia koe ʼi he ʼofa ʼe heʼe gata.
Ko te tupuʼaga la ʼaia ʼo taku taki mai ia koe kia te au ʼaki toku ʼofa agatonu.*+
4 ʼE au toe laga anai koe, ʼei, ʼe toe laga anai koe.+
Siʼi taʼahine taupoʼou ʼo Iselaele, ʼe ke toe toʼo anai ʼau nafa
Pea ʼe ke hu anai ki tuʼa ʼo meʼe fakafiafia.+
5 ʼE ke toe to anai ni gaueʼaga vite ʼi te ʼu moʼuga ʼo Samalia.+
ʼE to anai e te kau tagata gaue vite pea ʼe natou kai anai ʼona fua.+
6 ʼE hoko mai anai he ʼaho ʼe kalaga ai te ʼu tagata leʼo ʼae ʼi te ʼu moʼuga ʼo Efalaimi, ʼo ui:
‘Kotou tutuʼu! Tou hake ki Sione, kia Sehova totatou ʼAtua!’ ”+
7 Koʼeni te folafola ʼa Sehova:
“Kotou kalaga fakafiafia maʼa Sakopo!
Kotou kalaga fakafiafia he ʼe kotou mumuʼa ʼi te ʼatu puleʼaga.+
Kotou kalagaʼi, kotou vikiʼi te ʼAtua ʼo ui:
‘Sehova e, haofaki tau hahaʼi, ia natou ʼae ʼo Iselaele neʼe hao.’+
8 ʼE au fakaliliu anai ia natou mai te fenua ʼo te potu noleto.+
ʼE au fakatahiʼi anai ia natou mai te ʼu potu fenua mamaʼo ʼo te kele.+
ʼE kau anai kia natou ni kivi, mo ni ketu,+
Te fafine faitama mo te fafine ʼae ʼe fanau. ʼE fakatahi fuli anai ia natou.
ʼE kaugamalie anai te hahaʼi ʼae ʼe toe liliu mai ki te koga meʼa ʼaeni.+
9 ʼE natou tau fetagihi mai anai.+
ʼE au taki anai ia natou he ʼe natou kole mai anai.
ʼE au taki anai ia natou ki ni vai tafe+
ʼI he ala ʼe tokalelei ʼe mole natou tukia ai anai,
He ʼe ko au te Tamai ʼa Iselaele, pea ko Efalaimi toku ʼuluaki foha.”+
10 ʼU puleʼaga, kotou fakalogo ki te folafola ʼa Sehova,
Kotou fakaha ʼana folafola ki te ʼu motu mamaʼo.+ Kotou ui:
“Ko Ia ʼae neʼe ina fakamavetevete ia Iselaele ʼe ina toe fakatahiʼi anai.
ʼE tokaga anai ki ai ohage he tagata tauhi ovi ʼe tokaga ki tana faga ovi.+
11 ʼE totogi anai e Sehova ia Sakopo+
Pea ʼe ina haofaki anai ia ia mai te nima ʼo ia ʼae ʼe malohi age.+
12 ʼE natou ʼomai anai pea ʼe natou kalaga fakafiafia anai ʼi te tumutumu ʼo Sione.+
ʼE natou fiafia anai ʼuhi ko te ʼu lelei ʼae mai ia* Sehova,
Te fulumeto, te vino foʼou+ mo te lolo,
Te ʼu ʼuhiʼi ovi mo te ʼu ʼuhiʼi pipi.+
13 “ ʼI te temi ʼaia, ʼe meʼe fiafia anai te taʼahine taupoʼou,
Fakatahi mo te kau tama tupulaga mo te kau matuʼa.+
ʼE au fetogi anai tanatou putu ʼaki te fiafia.+
ʼE au fakafimalieʼi anai mo fakafiafiaʼi ia natou ke natou galoʼi tonatou lotomamahi.+
14 ʼE lahi anai te meʼa kai ʼae ʼe au foaki ki te kau pelepitelo,
Pea ʼe fiafia anai taku hahaʼi ʼi te ʼu meʼa lelei ʼae ʼe au foaki,”*+ ko te ui ʼaia ʼa Sehova.
15 “Koʼeni te folafola ʼa Sehova:
‘ ʼE logo he leʼo, mo ni lauga mo ni tagi ʼi Lama:+
Ko Lasele ʼae ʼe ina tagiʼi ʼana tama.*+
ʼE mole ina loto ke fakafimalieʼi ia ia ʼo ʼuhiga mo ʼana tama
He ʼe kua natou pupuli.’ ”+
16 Koʼeni te folafola ʼa Sehova:
“ ‘Tuku tau tagi, taʼofi ʼou loʼimata,
He ʼe au fakapale anai koe ʼo ʼuhiga mo te meʼa ʼae neʼe ke fai,’ ko te ui ʼaia ʼa Sehova.
‘ ʼE natou toe liliu mai anai mai te fenua ʼo tonatou fili.’+
17 ‘ ʼE ʼi ai te ʼamanaki ki tou ka haʼu,’+ ko te ui ʼaia ʼa Sehova.
‘ ʼE toe liliu mai anai ʼau tama ki tonatou fenua.’ ”+
18 “Neʼe au logo ki te ʼu lauga ʼa Efalaimi:
‘Neʼe ke fakatonutonuʼi au pea neʼe au tali toku fakatonutonuʼi
Ohage ko he vitulo kei mui neʼe mole fakalalata.
Toe taki mai au kia te koe, pea ʼe au foimo maliu kehe anai mai te kovi
He ʼe ko koe ko Sehova toku ʼAtua.
19 ʼEi, neʼe au fakahemala pea neʼe au maliu kehe mai te kovi.+
Hili tona fakamahino mai, neʼe au taʼi toku kauaga ʼi te lotomamahi.
Neʼe au ufiufi mo lainoa,+
He neʼe au ʼamo te ufiufi ʼo te ʼu agahala ʼo toku temi tupulaga.’ ”
20 “ ʼE mole koa la ko he foha maʼuhiga kia au ia Efalaimi mo he fanau ʼofaina?+
ʼE kei au manatuʼi ia ia ʼi te temi fuli pe ʼae ʼe au fakatonutonuʼi ai.
Koia ʼae ʼe au lotomamahi ai+
Pea ʼe au ʼofa mamahi anai kia ia,” ko te ui ʼaia ʼa Sehova.+
21 “Fakatuʼu ni tuʼakoi ʼi tou ala.
Fakatuʼu ni pou fakailoga.+
Tokaga ki te ala lahi, te ala ʼae ʼe tonu ke ke alu ai.+
Toe liliu mai, taʼahine taupoʼou ʼo Iselaele, toe liliu mai ki ʼou kolo.
22 Taʼahine heʼe agatonu, ʼe kaku anai ki ʼafea tau lotolotolua?
Neʼe fakatupu e Sehova ia he aluʼaga foʼou ʼi te kele:
ʼE tuli fakamalotoloto anai e he fafine he tagata.”
23 Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼE toe lau anai ia te ʼu palalau ʼaeni ʼi te fenua ʼo Suta pea mo ʼona kolo, moka au fakatahiʼi ki ai ʼana hahaʼi popula: ‘Ke tapuakiʼi koe e Sehova te nofoʼaga faitotonu+ pea mo te moʼuga taputapu!’+ 24 ʼEi, ʼe maʼuli fakatahi anai ʼi ai te hahaʼi ʼo Suta pea mo ʼona kolo fuli, mo te kau gaue kele pea mo te hahaʼi tagata ʼae ʼe natou takitaki te ʼu faga manu.+ 25 ʼE au fakamakona moʼoni anai ia natou ʼae kua gaʼegagaʼe pea ʼe au fakamalohiʼi anai ia natou fuli ʼae kua vaivavai.”+
26 Hili ʼaia pea neʼe au ʼala ake aipe ʼo sio. Neʼe lelei ʼosi taku moe.
27 ʼE ui e Sehova: “Koʼeni, ʼe hoko mai anai he ʼaho ʼe au fakahahaʼi ai ia Iselaele pea mo natou ʼo Suta, pea ʼe au toe fakalahi anai ʼanatou faga manu.”+
28 ʼE ui e Sehova: “Ohage pe ko taku tokagaʼi natou moʼo taʼaki, moʼo tuʼusi, moʼo holoʼi pea moʼo fakamamahiʼi natou,+ ʼe au toe tokagaʼi anai natou moʼo laga pea moʼo to.+ 29 ʼI te temi ʼaia, ʼe mole toe ui anai: ‘Neʼe kai e te ʼu tamai ni vite neʼe kei mumui kae ko te ʼu foha ia ʼae neʼe maninia ʼonatou nifo.’+ 30 Kailoa ia. ʼE tahi mate pe anai te tagata ʼuhi ko tana hala. Ko te tagata ʼae ka ina kai ni vite ʼe kei mumui, ko ia pe ʼae ka maninia ʼona nifo.”
31 ʼE ui e Sehova: “Koʼeni, ʼe hoko mai anai te ʼaho ʼae ʼe au fai ai mo te puleʼaga ʼo Iselaele mo te puleʼaga ʼo Suta ia he fuakava foʼou.”+ 32 ʼE toe ui e Sehova: “ ʼE mole hage anai ko te fuakava ʼae neʼe au fai mo ʼanatou kui, ʼi te temi ʼae neʼe au puke ai ʼonatou nima ʼo fakamavae mai te fenua ʼo Esipito,+ ia ‘taku fuakava ʼae neʼe natou maumauʼi+ kae neʼe ko au ia tonatou pule moʼoni.’ ”*
33 ʼE ui e Sehova: “Koʼeni te fuakava ʼae ʼe au fai anai mo te puleʼaga ʼo Iselaele hili te ʼu ʼaho ʼaia. ʼE au ʼai anai taku lao ki ʼonatou loto,+ ʼei, ʼe au tohi anai ki ʼonatou loto.+ ʼE au liliu anai ko tonatou ʼAtua pea ʼe natou liliu anai ko taku hahaʼi.”+
34 “Pea ʼe mole toe akoʼi anai e he tahi tona tatau peʼe ko he tahi tona tehina ʼo ui: ‘ ʼE tonu ke kotou iloʼi ia Sehova!’+ koteʼuhi ʼe natou iloʼi fuli anai ia au, mai ia ia ʼae ʼe malalo kia ia ʼae ʼe maʼuhiga,”+ ko te ui ʼaia ʼa Sehova. “ ʼE au fakamolemole anai tanatou hala pea ʼe mole au toe manatuʼi anai tanatou agahala.”+
35 Koʼeni te folafola ʼa Sehova,
Ia ia ʼae ʼe ina foaki te laʼa moʼo fakamalamaʼi te ʼaho,
Pea mo te ʼu lao ʼo te mahina pea mo te ʼu fetuʼu moʼo fakamalamaʼi te poʼuli,
Ia ia ʼae ʼe ina fakahou te tai mo ʼona peau,
Ia ia ʼae ko tona huafa ko Sehova ʼo te ʼatu kautau:+
36 “ ‘ ʼE gata anai koa te ʼu lao ʼaia ʼi he ʼaho?’ ko te ui ʼaia ʼa Sehova.
‘ ʼE toe feia pe, ʼe tuʼu anai te hakoga ʼo Iselaele ʼi ʼoku muʼa ko he puleʼaga ʼo talu ai.’ ”+
37 Koʼeni te folafola ʼa Sehova: “ ‘ ʼE feala koa ʼi he ʼaho ke fakafuafua te lagi peʼe ke vakavakaʼi ia te ʼu fakatafito ʼo te kele? Kailoa ia. ʼE toe feia pe, ʼe mole feala anai ʼi he temi ke au liʼaki ia te hakoga katoa ʼo Iselaele, logo la te ʼu meʼa fuli ʼae neʼe natou fai,’ ko te ui ʼaia ʼa Sehova.”+
38 ʼE ui e Sehova: “Koʼeni ʼe hoko mai te ʼaho ʼae ʼe laga ai anai te kolo+ maʼa Sehova, mai te tule ʼo Ananeele+ ʼo kaku ki te Matapa ʼo Te Tuliki.+ 39 ʼEi, ʼe toho fakahagatonu anai ia te maea moʼo fua+ ki te kiʼi moʼuga ʼo Kalepe pea ʼe afe anai ki Koati. 40 ʼE liliu anai te potu fenua laulelei ʼae ʼe laku ki ai te ʼu sino mate mo te lefulefu* ko he meʼa taputapu maʼa Sehova,+ ʼo feia mo te ʼu gaueʼaga fuli ʼo kaku ki te Vai Tafe ʼo Kitelone ʼae kua mamaha+ pea mo te agele ʼo te Matapa ʼo Te ʼu Hosi+ ʼi te potu esite. ʼE mole toe taʼaki anai ʼi he temi peʼe maumauʼi.”