Senesi
6 ʼI te temi ʼae neʼe kamata hahaʼi ai te tagata ʼi te kele pea mo natou toe maʼu mo honatou ʼu ʼofafine, 2 neʼe tokagaʼi e te ʼu foha ʼo te ʼAtua moʼoni*+ tonatou finemui. Koia neʼe natou ʼohoana ai mo natou fuli ʼae neʼe natou loto ki ai. 3 Neʼe ui leva e Sehova: “ ʼE mole au lava katakiʼi anai* te tagata ʼo talu ai,+ koteʼuhi ʼe kakano pe ia.* Koia, ʼe maʼuli pe anai ia taʼu ʼe 120.”+
4 ʼI te temi ʼaia, neʼe nonofo ia te kau Nefilime* ʼi te kele. Pea ki muli age neʼe hoko atu pe tanatou nonofo ʼi te kele. Lolotoga te temi ʼaia, neʼe momoe te ʼu foha ʼo te ʼAtua moʼoni mo te ʼu ʼofafine ʼo te ʼu tagata, pea neʼe natou fanauʼi he ʼu tama. Neʼe ko te ʼu tagata toʼa ʼo te temi muʼa, neʼe ko te ʼu tagata iloa.
5 Koia, neʼe sio ai leva ia Sehova ki te kua lahi ʼo te agakovi ʼa te tagata ʼi te kele pea mo te kovi tuʼumaʼu pe ʼo ʼana manatu ʼo feia mo te ʼu holi ʼo tona loto.+ 6 Neʼe fakahemala ai ia Sehova ʼi tana fakatupu* te tagata ʼi te kele, pea neʼe mamahi tona loto.+ 7 Koia neʼe ui e Sehova: “ ʼE au pulihi anai ʼi te fuga ʼo te kele ia te tagata ʼae neʼe au fakatupu, ʼo feia mo te ʼu manu lalata, mo te ʼu manu totolo, pea mo te ʼu manulele, he ʼe kua au fakahemala ʼi taku fakatupu ia natou.” 8 Kae neʼe leleiʼia e Sehova ia Noe.
9 Koʼeni te hisitolia ʼo Noe.
Ko Noe neʼe ko he tagata faitotonu.+ Neʼe mole ina fai he meʼa ʼe kovi* ʼi te lotolotoiga ʼo te hahaʼi ʼo tona temi.* Neʼe haʼele ia Noe mo te ʼAtua moʼoni.+ 10 Ki muli age, neʼe tupu leva te ʼu foha ʼe tolu ʼo Noe, neʼe ko Semi, mo Kami pea mo Safeti.+ 11 Kae neʼe kua kovi ʼosi te aga ʼa te hahaʼi ʼi te kele kia mata ʼo te ʼAtua moʼoni, pea neʼe kua lahi ʼaupito te agamalohi ʼi te kele. 12 ʼEi, neʼe sio te ʼAtua ki te kele, pea neʼe kua fakalialia.+ Neʼe kua kovi ʼosi te aga ʼa te hahaʼi* fuli ʼi te kele.+
13 Hili ʼaia, neʼe ui e te ʼAtua kia Noe: “Kua au fai te tonu ʼae ke au fakaʼauha te hahaʼi fuli, koteʼuhi kua lahi ʼaupito te agamalohi ʼi te kele ʼuhi ko natou. Koia ʼe au fakaʼauha anai ia natou ʼo feia mo te kele.+ 14 Ke ke faʼu he aleka* ʼaki he ʼakau lelei mo malohi.*+ ʼE ke fai anai ʼi te loto aleka he ʼu koga fale pea ʼe ke vali anai ʼi loto mo tuʼa he meʼa ʼe huʼa ʼuli.*+ 15 ʼE ke faʼu fenei anai ia te aleka: ʼE fasiga nima* 300 tona loa, mo fasiga nima 50 tona laulahi, pea mo fasiga nima 30 tona maʼoluga. 16 ʼE ke fai anai he matapa fakamalama,* ʼe fasiga nima tahi mai te faʼahi ʼae ʼi ʼoluga ʼo te aleka. ʼE tonu ke ke fakatuʼu te matapa ʼo te aleka ʼi hona faʼahi,+ pea mo ke fai he ʼu laufata ʼe tolu.
17 “Koʼeni, ʼe au fakato anai he tulivio+ ki te kele moʼo fakaʼauha te ʼu meʼa maʼuli fuli* ʼi te lalo lagi. ʼE mate anai te ʼu meʼa fuli ʼae ʼi te kele.+ 18 Pea ʼe au fai he fuakava mo koe, pea ʼe tonu anai ke ke ulu ki te aleka, ia koe, mo ʼou foha, mo tou ʼohoana, pea mo te ʼu ʼohoana ʼo ʼou foha.+ 19 Pea ʼe ke fakaulu anai ki te aleka, ni hoaʼi manu ʼo te ʼu manu kehekehe fuli,+ he manu tagata mo he manu fafine,+ koteʼuhi ke haofaki natou pea mo koe. 20 ʼE ʼomai anai kia koe he ʼu hoaʼi manulele ʼo mulimuli pe ki ʼonatou faʼahiga, mo he ʼu hoaʼi manu lalata ʼo mulimuli pe ki ʼonatou faʼahiga, mo he ʼu hoaʼi manu totolo ʼo te kele ʼo mulimuli pe ki ʼonatou faʼahiga, ke haofaki ai natou.+ 21 Pea ko koe, ke ke tanaki pea ke ʼave he ʼu faʼahiga meʼa kai kehekehe+ ʼe ʼaoga anai kia koe pea mo te ʼu manu.”
22 Pea neʼe fai e Noe te ʼu meʼa fuli ʼae neʼe fakatotonu age e te ʼAtua. ʼEi, neʼe mulimuli lelei pe ki ai.+