Senesi
17 ʼI te taʼu 99 ʼo Apalamo, neʼe ha ia Sehova kia ia pea neʼe ina ui age: “ ʼE ko au te ʼAtua Mafimafi. Haʼele ʼi ʼoku ala pea ʼaua naʼa ke fai he meʼa ʼe kovi.* 2 ʼE au fakamoʼoni anai te fuakava ʼae neʼe au fai mo koe,+ pea ʼe au fakaliliu anai tou hakoga ʼo kaugamalie ʼaupito.”+
3 Neʼe tuʼutuli ifo ai ia Apalamo, pea neʼe hoko atu pe te palalau ʼa te ʼAtua kia ia, ʼo ina ui age: 4 “Koʼeni, neʼe au fai he fuakava mo koe,+ pea ʼe ke liliu moʼoni anai ko he tamai ʼo ni puleʼaga ʼe kaugamalie.+ 5 ʼE mole toe fakahigoa anai koe ko Apalamo,* kae ʼe fakahigoa anai koe ko Apalahamo,* he ʼe au fakaliliu anai koe ko he tamai ʼo ni puleʼaga ʼe kaugamalie. 6 ʼE au foaki atu anai hou hakoga ʼe kaugamalie ʼaupito, pea ʼe hifo anai mai ia koe ni puleʼaga, ʼo feia mo ni hau.+
7 “Pea ʼe au taupau anai te fuakava ʼae neʼe au fai mo koe,+ ʼo feia mo tou hakoga, mai he taʼiake ki he tahi taʼiake. ʼE ko he fuakava heʼe gata, ke au liliu ai ko tou ʼAtua, pea mo te ʼAtua ʼo tou hakoga. 8 Pea ʼe au foaki anai kia koe pea mo tou hakoga te fenua ʼae neʼe ke maʼuli ai ohage ko he matapule,+ ia te fenua katoa ʼo Kanaane, ke kotou maʼu ʼo talu ai, pea ʼe au liliu anai ko tokotou ʼAtua.”+
9 Neʼe toe ui e te ʼAtua kia Apalahamo: “Pea ko koe, ʼe tonu ke ke taupau taku fuakava, ia koe mo tou hakoga, mai he taʼiake ki he tahi taʼiake. 10 Koʼeni te fuakava ʼae ʼe au fai mo koutou, pea ʼe ke taupau anai ʼo feia mo tou hakoga: ʼE tonu anai ke silikosisioʼi* te ʼu tagata fuli ia koutou.+ 11 ʼE tonu ke kotou silikosisio, pea ʼe ko he fakailoga anai ʼaia ʼo te fuakava ʼae ʼe au fai mo koutou.+ 12 ʼE tonu anai ke silikosisioʼi te ʼu tamaliki tagata fuli ʼae neʼe tupu ʼi tokotou loto fale ʼi tonatou valu ʼaho.+ Pea ʼe tonu anai ke silikosisioʼi te ʼu tamaliki tagata pea mo te ʼu tagata fuli ʼae ʼe mole kau ki tou hakoga kae neʼe totogi mai he matapule. Koia, ʼe tonu ke kotou fai te faʼahi ʼaia mai he taʼiake ki he tahi taʼiake. 13 ʼE tonu anai ke silikosisioʼi te ʼu tagata fuli ʼae ʼe tupu ʼi tou loto fale pea mo te ʼu tagata fuli ʼae neʼe totogi,+ pea ko taku fuakava ʼo ʼuhiga mo te silikosisio* ʼe ko he fuakava ʼe fualoa anai. 14 Kapau ʼe mole silikosisioʼi he tagata, pea ʼe tonu anai ke matehi te tagata* ʼaia. Neʼe ina maumauʼi taku fuakava.”
15 Neʼe ui leva e te ʼAtua kia Apalahamo: “ ʼE mole ke toe fakahigoa anai tou ʼohoana ko Salai,*+ koteʼuhi ʼe higoa anai ko Sala.* 16 ʼE au tapuakiʼi anai ia ia pea ʼe au foaki atu anai mo hou foha ʼaki ia ia.+ ʼE au tapuakiʼi anai ia ia pea ʼe hifo mai anai mai ia ia ni puleʼaga, ʼo feia mo ni hau.” 17 Neʼe tuʼutuli ifo leva ia Apalahamo, pea neʼe kata mo ui ʼi tona loto:+ “ ʼE feala anai koa ki he tagata kua taʼu 100 ke ina maʼu hona foha? Pea ʼe feala anai koa ke fanauʼi e Sala ʼae kua taʼu 90 hana tamasiʼi?”+
18 Koia neʼe ui e Apalahamo ki te ʼAtua moʼoni: “ ʼOfa pe ke ke tapuakiʼi ia Isemaele!”+ 19 Kae neʼe ui age e te ʼAtua kia ia: “ ʼE fanauʼi moʼoni anai e Sala hou foha, pea ʼe tonu anai ke ke fakahigoaʼi ko Isaake.*+ ʼE au fai anai taku fuakava mo ia, ʼe ko he fuakava heʼe gata maʼa tona hakoga.+ 20 Kae neʼe au logo ki te kole ʼae neʼe ke fai ʼo ʼuhiga mo Isemaele. Koʼeni, ʼe au tapuakiʼi anai ia ia pea mo au foaki age anai hona hakoga ʼe kaugamalie ʼaupito. ʼE liliu anai ko te tamai ʼo te ʼu tagata pule ʼe toko 12, pea ʼe au fakaliliu anai ia ia ko he puleʼaga lahi.+ 21 Kae, ʼi te taʼu ka haʼu, ʼi te temi pe ʼaeni,+ ʼe fanauʼi anai e Sala ia Isaake, pea ʼe au fai anai taku fuakava mo ia.”+
22 ʼI te ʼosi palalau ʼa te ʼAtua mo Apalahamo, neʼe mavae leva te ʼAtua mai ia ia. 23 Neʼe toʼo leva e Apalahamo tona foha ko Isemaele mo te ʼu tagata fuli ʼae neʼe tutupu ʼi tona loto fale pea mo te ʼu tagata fuli ʼae neʼe ina totogi, ʼei, te ʼu tagata fuli ʼo tona loto fale, ʼo ina silikosisioʼi natou ʼi te ʼaho ʼaia, ohage pe ko tona ui age e te ʼAtua.+ 24 Neʼe taʼu 99 ia Apalahamo ʼi te temi ʼae neʼe silikosisioʼi ai ia ia.+ 25 Pea neʼe taʼu 13 ia Isemaele ʼi te temi ʼae neʼe silikosisioʼi ai ia ia.+ 26 ʼI te ʼaho pe ʼaia, neʼe silikosisioʼi ia Apalahamo pea mo tona foha ko Isemaele. 27 Neʼe toe silikosisioʼi foki mo te ʼu tagata fuli ʼo tona loto fale ʼi te ʼaho pe ʼaia, ia natou fuli ʼae neʼe tupu ʼi tona loto fale pea mo natou ʼae neʼe totogi mai he matapule.