Senesi
14 ʼI te temi ʼo Amilafele, te hau ʼo Sinea,+ mo Alioke, te hau ʼo Elasale, mo Ketolaome,+ te hau ʼo Elame+ pea mo Titeale, te hau ʼo Koimi, 2 neʼe tauʼi e te ʼu hau ʼaia ia Pelea, te hau ʼo Sotoma,+ mo Pilisa, te hau ʼo Komola,+ mo Sineapi, te hau ʼo Atema, mo Semepele, te hau ʼo Sepoimi+ pea mo te hau ʼo te kolo ko Pela, ʼae ʼe toe higoa ko Tesoa. 3 Neʼe fakatahiʼi e natou fuli ʼaia ʼanatou solia ʼi te Potu Fenua Laulelei ʼo Sitimi,+ ʼae ʼe ko te Tai Kona.*+
4 Neʼe fakalogo te ʼu hau ʼaia ʼe toko nima kia Ketolaome lolotoga taʼu ʼe 12, kae ʼi te 13 taʼu, neʼe natou agatuʼu leva. 5 Koia, ʼi te 14 taʼu, neʼe alu ai ia Ketolaome pea mo te ʼu hau ʼae neʼe fakatahi mo ia ʼo tauʼi te kau Lefaimi, ʼi Asiteloti-kalenaimi, mo te kau Susimi, ʼi Hami, mo te kau Emime,+ ʼi Save-kiliataimi. Neʼe malo ia natou ʼaia 6 ʼo feia mo te kau Holi,+ ʼi tonatou moʼuga ko Seili+ ʼo kaku ki Ele-palani, ʼae ʼe ovi ki te toafa. 7 Pea neʼe natou toe liliu leva ʼo olo ki Ene-misipati, ʼae ko Katesi,+ pea neʼe natou ʼohofi mo maʼu ia te fenua katoa ʼo te kau Amaleke,+ pea mo malo ʼi te kau Amole+ ʼae neʼe nonofo ʼi Asasoni-tamale.+
8 Pea neʼe alu ia te hau ʼo Sotoma ki te Potu Fenua Laulelei ʼo Sitimi mo te hau ʼo Komola, mo te hau ʼo Atema, mo te hau ʼo Sepoimi, pea mo te hau ʼo te kolo ko Pela, ʼae ʼe toe higoa ko Tesoa. Neʼe natou fakaʼatu ai ʼanatou foʼi kautau ke natou tauʼi 9 ia Ketolaome, te hau ʼo Elame, mo Titeale, te hau ʼo Koimi, mo Amilafele, te hau ʼo Sinea, pea mo Alioke, te hau ʼo Elasale.+ Neʼe ko hau ʼe fa ki te ʼu hau ʼe nima. 10 Pea ʼi te Potu Fenua Laulelei ʼo Sitimi neʼe lahi ai te ʼu luo neʼe fonu ko he meʼa ʼe huʼa ʼuli.* Neʼe fetoki ki ai te ʼu hau ʼo Sotoma mo Komola ʼi tanā faiga ʼae ke nā feholaki, pea ko natou leva ʼae neʼe toe neʼe feholaki ki te potu moʼugaʼia. 11 Neʼe toʼo e natou ʼae neʼe malo ia te ʼu koloa fuli ʼo Sotoma mo Komola, mo tanatou meʼa kai fuli pea neʼe olo ai leva.+ 12 Neʼe natou toe ʼave foki mo te foha ʼo te tehina ʼo Apalamo ko Lote ʼae neʼe nofo ʼi Sotoma,+ ʼo feia mo ʼona koloa, pea neʼe hoko atu leva tonatou fagona.
13 Hili ʼaia, neʼe hola he tagata ʼo fakamatala kia Apalamo, te tagata Hepeleo te meʼa ʼae neʼe hoko. ʼI te temi ʼaia, neʼe nofo* ovi ki te ʼu fuʼu ʼakau lalahi ʼo Mamele, te tagata Amole,+ te tehina ʼo Esekoli pea mo Anele.+ Neʼe kau te ʼu tagata ʼaia mo Apalamo. 14 Neʼe iloʼi ai e Apalamo kua ʼave popula tona kaiga.*+ Koia, neʼe ina fakamaʼopoʼopo ai ʼana tagata ʼae neʼe popoto ʼi te tau, neʼe ko te ʼu tagata faifekau ʼe toko 318 neʼe tutupu ʼi tona loto fale. Pea neʼe natou tuli ai te ʼu hau ʼo kaku ki Tane.+ 15 ʼI te poʼuli, neʼe ina vaevae fakakutuga ʼana tagata solia, pea neʼe alu mo ʼana tagata faifekau ʼo tauʼi te ʼu hau pea neʼe natou malo ai. Neʼe ina tuli ia natou ʼo kaku ki Sopa, ʼae ʼe tuʼu ʼi te potu noleto ʼo Tamaso. 16 Neʼe ina toe maʼu te ʼu koloa fuli, ʼo feia mo tona kaiga ko Lote, mo ʼona koloa, mo te hahaʼi fafine pea mo te tahi ʼu hahaʼi.
17 ʼI te toe liliu mai ʼa Apalamo, hili tana malo ia Ketolaome pea mo te ʼu hau ʼae neʼe fakatahi mo ia, neʼe alu ai ia te hau ʼo Sotoma ʼo fakafelaveʼi kia Apalamo ʼi te Potu Fenua Laulelei ʼo Save, ʼae ko te Potu Fenua Laulelei ʼo Te Hau.+ 18 Pea neʼe ʼaumai e Melekiseteke,+ te hau ʼo Salemi+ he moʼi pane pea mo he vino. Neʼe ko te pelepitelo ʼaia ʼa te ʼAtua Maʼoluga.+
19 Pea neʼe ina tapuakiʼi ia ia ʼo ina ui:
“Ke tapuakiʼi ia Apalamo e te ʼAtua Maʼoluga,
ʼAe neʼe ina fakatupu te lagi mo te kele.
20 Pea ke vikiʼi ia te ʼAtua Maʼoluga,
ʼAe neʼe ina tuku ʼou fili ki ʼou nima!”
Pea neʼe foaki age e Apalamo kia ia te vahe tahi ki te hogofulu ʼo te ʼu meʼa fuli ʼae neʼe toe liliu mai mo ia.+
21 Hili ʼaia, neʼe ui e te hau ʼo Sotoma kia Apalamo: “Tuku mai te hahaʼi,* kae ke ke toʼo maʼa koe te ʼu koloa.” 22 Kae neʼe tali age e Apalamo ki te hau ʼo Sotoma: “ ʼE au hiki toku nima ʼo fakapapau kia Sehova te ʼAtua Maʼoluga, ʼae neʼe Ina fakatupu te lagi mo te kele, 23 ʼe mole au toʼo anai hau meʼa, tatau aipe pe ʼe ko he kauʼi filo peʼe ko he meʼa haʼi sulie, naʼa ke ui leva: ‘Neʼe au fakakoloa ia Apalamo.’ 24 ʼE mole au toʼo anai he meʼa, gata pe ki te meʼa ʼae kua kai e te kau tagata tupulaga. Pea ke toʼo e te kau tagata ʼae neʼe olo mo au, ia Anele, mo Esekoli pea mo Mamele,+ tonatou vahe.”