Senesi

1 ʼI te kamataʼaga, neʼe fakatupu e te ʼAtua te lagi pea mo te kele.+

2 Kae neʼe mole ha lelei te agaaga ʼo te kele pea neʼe mole he meʼa neʼe ʼi ai, pea neʼe fakapoʼuli te ʼu fuga vai,*+ pea neʼe gaue te malohi*+ ʼo te ʼAtua ʼi te ʼu fuga vai.+

3 Pea neʼe ui e te ʼAtua: “Ke ha te malama.” Pea neʼe ha leva te malama.+ 4 Hili ʼaia, neʼe sio leva ia te ʼAtua neʼe lelei te malama, pea neʼe kamata vaheʼi ai e te ʼAtua te malama mai te fakapoʼuli. 5 Neʼe fakahigoaʼi e te ʼAtua te malama ko te ʼAho kae neʼe ina fakahigoaʼi te fakapoʼuli ko te Poʼuli.+ Pea neʼe ʼi ai leva he afiafi pea neʼe ʼi ai leva he uhu, ko te ʼuluaki ʼaho ʼaia.

6 Pea neʼe ui e te ʼAtua: “Ke ʼi ai he vaha+ ʼi te ʼu vai, ke vaheʼi ai te ʼu vai.”+ 7 Pea neʼe hoko leva te aluʼaga ʼaia. Koia, neʼe fai e te ʼAtua he vaha pea neʼe ina vaheʼi te ʼu vai ʼae ʼi lalo mai te ʼu vai ʼae ʼi ʼoluga.+ 8 Neʼe fakahigoaʼi ai e te ʼAtua te vaha ʼaia ko te Lagi. Pea neʼe ʼi ai leva he afiafi pea neʼe ʼi ai leva he uhu, ko te lua ʼaho ʼaia.

9 Pea neʼe ui e te ʼAtua: “Ke tanaki te ʼu vai ʼae ʼi te lalo lagi ki he koga meʼa ʼe tahi pea ke ha te kele moamoa.”+ Pea neʼe hoko leva te aluʼaga ʼaia. 10 Neʼe fakahigoaʼi ai e te ʼAtua te kele moamoa ko te Kele,+ kae neʼe ina fakahigoaʼi te ʼu vai ʼae neʼe tanaki ko te Tai.+ Pea neʼe sio leva ia te ʼAtua neʼe lelei te meʼa ʼaia.+ 11 Pea neʼe ui e te ʼAtua: “Ke homo ʼi te kele he luna, mo he ʼu vao ʼakau mo ʼonatou tegaʼi ʼakau. Ke toe homo ʼi te kele he ʼu fuʼu ʼakau ʼe ʼi ai ʼonatou fua pea mo ʼonatou tegaʼi ʼakau, ʼo mulimuli pe ki ʼonatou faʼahiga.” Pea neʼe hoko leva te aluʼaga ʼaia. 12 Pea neʼe kamata homo ʼi te kele he luna, mo he ʼu vao ʼakau mo ʼonatou tegaʼi ʼakau+ pea mo he ʼu fuʼu ʼakau ʼe ʼi ai ʼonatou fua pea mo ʼonatou tegaʼi ʼakau, ʼo mulimuli pe ki ʼonatou faʼahiga. Pea neʼe sio leva ia te ʼAtua neʼe lelei te meʼa ʼaia. 13 Pea neʼe ʼi ai leva he afiafi pea neʼe ʼi ai leva he uhu, ko te tolu ʼaho ʼaia.

14 Pea neʼe ui e te ʼAtua: “Ke ha ni malama+ ʼi te lagi, ke vaheʼi ai te ʼaho mo te poʼuli,+ pea ʼe liliu anai ko he ʼu fakailoga ke iloʼi ai te ʼu fasiga taʼu, mo te ʼu ʼaho pea mo te ʼu taʼu.+ 15 ʼE liliu anai ko he ʼu malama ʼi te lagi moʼo fakamalamaʼi te kele.” Pea neʼe hoko leva te aluʼaga ʼaia. 16 Pea neʼe fakatupu e te ʼAtua te ʼu malama lalahi ʼe lua, ko te malama ʼae ʼe mu lahi ʼi te ʼaho+ pea mo te malama ʼae ʼe mu veliveli ʼi te poʼuli. Neʼe ina toe fakatupu foki mo te ʼu fetuʼu.+ 17 Koia neʼe fakatuʼu ai e te ʼAtua te ʼu meʼa ʼaia ʼi te lagi ke fakamalamaʼi ai te kele 18 pea ke mu ʼi te ʼaho mo te poʼuli, pea ke vaheʼi ai te malama mai te fakapoʼuli.+ Pea neʼe sio leva ia te ʼAtua neʼe lelei te meʼa ʼaia. 19 Pea neʼe ʼi ai leva he afiafi pea neʼe ʼi ai leva he uhu, ko te fa ʼaho ʼaia.

20 Pea neʼe ui e te ʼAtua: “Ke lahi ʼi te ʼu vai ni manu* pea ke lele ʼi te lagi he ʼu manulele.”+ 21 Pea neʼe fakatupu e te ʼAtua te ʼu manu lalahi ʼo te tai pea mo te ʼu manu* fuli ʼae ʼe maʼuʼuli mo feoloʼaki ʼi te ʼu vai ʼo mulimuli pe ki ʼonatou faʼahiga, pea mo te ʼu manulele fuli ʼo mulimuli pe ki ʼonatou faʼahiga. Pea neʼe sio leva ia te ʼAtua neʼe lelei te meʼa ʼaia. 22 Pea neʼe tapuakiʼi e te ʼAtua ia natou, ʼo ina ui: “Kotou fanaunau pea mo fakafonu te tai,+ pea ke lahi te ʼu manulele ʼi te kele.” 23 Pea neʼe ʼi ai leva he afiafi pea neʼe ʼi ai leva he uhu, ko te nima ʼaho ʼaia.

24 Pea neʼe ui e te ʼAtua: “Ke ʼi ai ni manu* ʼi te kele ʼo mulimuli pe ki ʼonatou faʼahiga, he ʼu manu lalata, mo he ʼu manu totolo* pea mo he ʼu manu ʼo te vao ʼae ʼi te kele, ʼo mulimuli pe ki ʼonatou faʼahiga.”+ Pea neʼe hoko leva te aluʼaga ʼaia. 25 Pea neʼe fakatupu leva e te ʼAtua te ʼu manu ʼo te vao ʼae ʼi te kele ʼo mulimuli pe ki ʼonatou faʼahiga, mo te ʼu manu lalata ʼo mulimuli pe ki ʼonatou faʼahiga pea mo te ʼu manu totolo fuli ʼo te kele ʼo mulimuli pe ki ʼonatou faʼahiga. Pea neʼe sio leva ia te ʼAtua neʼe lelei te meʼa ʼaia.

26 Pea neʼe ui e te ʼAtua: “Ta*+ fakatupu te tagata ki totā* pāki,+ ke hage ko taua,+ pea ke ina puleʼi te ʼu ika ʼo te tai, mo te ʼu manulele, mo te ʼu manu lalata, mo te kele katoa pea mo te ʼu manu totolo fuli ʼae ʼe maʼuʼuli ʼi te kele.”+ 27 Pea neʼe fakatupu leva e te ʼAtua ia te tagata ki tona pāki, ʼei, neʼe fakatupu ia ia ki te pāki ʼo te ʼAtua. Neʼe ina fakatupu naua ko te tagata pea mo te fafine.+ 28 Pea neʼe tapuakiʼi naua e te ʼAtua, pea neʼe ina ui age kia naua: “Kolua fanaunau pea mo liliu ʼo hahaʼi, kolua fakahahaʼi pea mo puleʼi te kele,+ pea kolua puleʼi+ te ʼu ika ʼo te tai, mo te ʼu manulele pea mo te ʼu manu fuli pe ʼae ʼe maʼuʼuli ʼi te kele.”

29 Pea neʼe ui e te ʼAtua: “Koʼeni neʼe au foaki atu te ʼu vao ʼakau fuli mo ʼonatou tegaʼi ʼakau ʼae ʼi te kele katoa, pea mo te ʼu fuʼu ʼakau fuli ʼe ʼi ai ʼonatou fua pea mo ʼonatou tegaʼi ʼakau. ʼE ko takolua meʼa kai anai ʼaia.+ 30 Pea neʼe au foaki te vao ʼakau* fuli ke kai ki ai te ʼu manu fuli ʼo te vao ʼae ʼi te kele, mo te ʼu manulele fuli pea mo te ʼu meʼa maʼuli* fuli ʼae ʼe feoloʼaki ʼi te kele.”+ Pea neʼe hoko leva te aluʼaga ʼaia.

31 Hili ʼaia, neʼe sio leva te ʼAtua ki te ʼu meʼa fuli ʼae neʼe ina fakatupu, pea koʼeni, neʼe lelei ʼaupito.+ Pea neʼe ʼi ai leva he afiafi pea neʼe ʼi ai leva he uhu, ko te ono ʼaho ʼaia.