Senesi

24 Neʼe kua matuʼa ʼosi ia Apalahamo, pea neʼe tapuakiʼi pe e Sehova ia meʼa fuli.+ 2 Neʼe ui e Apalahamo ki tana tagata faifekau ʼae neʼe matuʼa age ʼi tona loto fale pea neʼe tokaga ki ʼana meʼa fuli:+ “Fakalelei siʼou loto, kae ke ke ʼai tou nima ki toku lalo kauaga,* 3 pea ke ke fakapapau mai ʼi te huafa ʼo Sehova, te ʼAtua ʼo te lagi pea mo te ʼAtua ʼo te kele, ʼe mole ke kumi anai he ʼohoana ʼo toku foha ʼi te ʼu taʼahine ʼo te fenua ʼo Kanaane, ʼae ʼe au maʼuli ai.+ 4 Kae ʼe tonu ke ke alu ki toku fenua pea mo ʼoku kaiga+ ʼo kumi ai he ʼohoana ʼo toku foha ko Isaake.”

5 Kae neʼe ui age e te tagata faifekau: “ ʼE feafeaʼi mo kapau ʼe mole fia haʼu te taʼahine mo au ki te fenua ʼaeni? ʼE tonu anai koa ke au ʼave tou foha ki te fenua ʼae neʼe ke haʼu mai ai?”+ 6 Neʼe tali age e Apalahamo: “ ʼAua naʼa ke ʼave toku foha ki ai.+ 7 ʼE ko Sehova, te ʼAtua ʼo te lagi, ʼae neʼe ina fakamavae ia au mai te loto fale ʼo taku tamai mo te fenua ʼo ʼoku kaiga,+ pea neʼe palalau mo au ʼo ina fakapapauʼi mai:+ ‘ ʼE au foaki anai te fenua ʼaeni+ ki tou hakoga.’+ Pea ʼe ko ia totonu ʼae ka ina fekauʼi anai tana ʼaselo ke ina taki koe,+ pea ʼe ke ʼaumai moʼoni anai mai ai he taʼahine ke ʼohoana mo toku foha.+ 8 Kae kapau ʼe mole fia haʼu te taʼahine mo koe, ʼe ke ʼateaina anai mai te fuakava ʼaeni. Kae ʼe mole tonu ke ke ʼave toku foha ki ai.” 9 Pea neʼe ʼai leva e te tagata faifekau tona nima ki te lalo kauaga ʼo Apalahamo, tona pule, pea neʼe ina fakapapau age ki ai.+

10 Neʼe toʼo e te tagata faifekau te ʼu kamelo ʼe hogofulu ʼo tona pule, ʼo feia mo te ʼu meʼa ʼofa maʼuhiga fuli ʼo tona pule, pea neʼe alu ai leva. Neʼe faifagona ki Mesopotamia, ʼo alu ki te kolo ʼo Naole. 11 ʼI tana tau atu ki he vai keli ʼi tuʼa atu ʼo te kolo, neʼe tuʼu ai ke malolo ʼana kamelo. Neʼe ko te fakaafiafi ʼaia, te temi ʼae neʼe ʼomai ai te hahaʼi fafine ʼo ohu vai. 12 Neʼe ina ui leva: “Fakalelei siʼou loto, Sehova te ʼAtua ʼo toku pule ko Apalahamo, ʼe au kole atu ke maui mālie ia meʼa fuli ʼi te ʼaho nei, pea ke ke fakaha tou ʼofa agatonu ki toku pule ko Apalahamo. 13 Koʼeni ʼe au tuʼu ovi ki he matapuna vai, pea ʼe ʼomai anai te ʼu taʼahine ʼo te kolo ʼo ohu vai. 14 Pea koʼeni te meʼa ʼae ʼe tonu ke hoko: Ko te taʼahine ʼae ka au ui age anai ki ai: ‘Fakalelei siʼou loto, pe ʼe feala la ke ke foaki mai he moʼi vai mai tau ʼaiʼaga vai,’ pea kapau ʼe ina tali mai: ‘Inu pea ʼe au fakainu anai mo ʼau kamelo,’ ʼe ko ia ʼaia ʼe ke filifili maʼa tau tagata faifekau ko Isaake. Pea ʼaki te faʼahi ʼaia, ʼe au iloʼi anai neʼe ke fakaha tou ʼofa agatonu ki toku pule.”

15 Neʼe heʼeki ʼosi tana palalau, kae tau mai ia Lepeka mai te kolo mo tana ʼaiʼaga vai ʼe hili ʼi tona fuga ʼuma. Ko Lepeka neʼe ko te ʼofafine ʼo Petuele,+ te tama ʼa Milika,+ te ʼohoana ʼo Naole,+ te tehina ʼo Apalahamo. 16 Neʼe finemui ʼaupito te taʼahine pea neʼe heʼeki momoe mo he tagata. Neʼe hifo ki te matapuna vai ʼo ʼuʼutu ai tana ʼaiʼaga vai, pea neʼe hake ake leva. 17 Neʼe lele atu aipe ia te tagata faifekau ʼo fakafelaveʼi kia ia pea mo ui age: “Fakalelei siʼou loto, ʼe feala la ke ke foaki mai he kiʼi moʼi vai ke au inu mai tau ʼaiʼaga vai?” 18 Neʼe ina tali age: “Inu, siʼoku ʼaliki.” Neʼe ina toʼo fakavilivili ifo leva tana ʼaiʼaga vai mai tona fuga ʼuma ʼo ina foaki age hana moʼi vai ke inu. 19 ʼI tana kua foaki age ke inu, neʼe ina ui: “ ʼE au toe fakainu foki mo ʼau kamelo ʼo kaku ki tanatou ʼosi iinu fuli.” 20 Neʼe ina huaʼi ai ki te inuʼaga manu te vai ʼae neʼe ʼi tana ʼaiʼaga vai, pea neʼe tuʼa lahi tana lele ki te vai keli ʼo ohu vai mai ai. Pea neʼe hoko atu pe tana ohu vai moʼo fakainu te ʼu kamelo fuli. 21 Lolotoga te temi katoa ʼaia, neʼe punamaʼuli te tagata ʼi tana sio kia ia pea neʼe nofo fakalogologo, ʼo feʼekeʼaki pe neʼe tapuakiʼi e Sehova tana faifagona peʼe kailoa.

22 ʼI te ʼosi fakainu ʼo te ʼu kamelo, neʼe foaki age e te tagata kia ia he mama aulo ki tona ihu, ko tona mamafa neʼe ko he vaeluaʼi sikele.* Neʼe ina toe foaki age mo he ʼu vesa aulo ʼe lua, ko tonā mamafa neʼe ko sikele* ʼe hogofulu. 23 Pea neʼe ina ui age: “Fakalelei siʼou loto, fakaha mai pe ʼe ko ai tau tamai. Pea ʼe ʼi ai koa he koga fale ʼi te ʼapi ʼo tau tamai ke matou nonofo ai ʼi te po ʼaeni?” 24 Neʼe ina tali age: “Ko au ko te ʼofafine ʼo Petuele,+ te tama ʼa Milika mo Naole.”+ 25 Neʼe ina hoko atu: “ ʼE maʼu io matou he luna moamoa mo he meʼa kai lahi maʼa te ʼu manu, ʼo feia mo he koga fale ke kotou nonofo ai ʼi te po ʼaeni.” 26 Pea neʼe punou leva mo tulolo te tagata ia muʼa ʼo Sehova, 27 ʼo ina ui: “Ke vikiʼi ia Sehova, te ʼAtua ʼo toku pule ko Apalahamo, he neʼe hoko atu pe tana fakaha tona ʼofa* pea mo tana agatonu ki toku pule. Neʼe taki mai ia au e Sehova ki te fale ʼo te ʼu tehina ʼo toku pule.”

28 Pea neʼe lele leva te taʼahine ʼo fakamatala te ʼu meʼa fuli ʼaia ki te loto fale ʼo tana faʼe. 29 Neʼe ʼi ai te tokolua ʼo Lepeka neʼe higoa ko Lapane.+ Neʼe lele ia Lapane ki te tagata ʼae neʼe ʼi te matapuna vai, ʼi tuʼa atu ʼo te kolo. 30 ʼI tana sio ki te mama ʼae ʼi te ihu ʼo tona tokolua ko Lepeka mo te ʼu vesa ʼae ʼi ʼona nima pea mo tana logo ki tana ui: “Neʼe palalau feia mai te tagata,” neʼe alu ai ʼo fakafelaveʼi ki te tagata ʼae neʼe kei tuʼu ʼi te matapuna vai mo ʼana kamelo. 31 Pea neʼe ina ui age: “Haʼu, ia koe ʼae ʼe tapuakiʼi e Sehova. ʼE mole tonu ke ke nofo ʼi tuʼa. Kua au teuteuʼi te ʼapi pea mo he nofoʼaga ki ʼau kamelo.” 32 Neʼe hu ai leva te tagata ki te ʼapi. Neʼe ina* toʼo te ʼu kavega ʼae neʼe hili ʼi te ʼu kamelo pea neʼe ina foaki he luna moamoa mo he meʼa kai ki te ʼu kamelo. Neʼe ina toe foaki he moʼi vai ke fufulu ai ʼona vaʼe pea mo te ʼu vaʼe ʼo te ʼu tagata ʼae neʼe ʼomai fakatahi mo ia. 33 Kae ʼi te temi ʼae neʼe tuku ai ki ʼona muʼa he meʼa kai, neʼe ina ui: “ ʼE mole au kai anai kae heʼeki au fakaha atu te tupuʼaga ʼo taku haʼu ki heni.” Pea neʼe ui e Lapane: “Fakaha mai!”

34 Neʼe ina ui leva: “Ko au ko te tagata faifekau ʼa Apalahamo.+ 35 Pea neʼe tapuakiʼi lahi ʼaupito e Sehova ia toku pule, mo ina fakakoloa ʼaupito ia ia ʼo ina foaki age he ʼu ovi pea mo he ʼu pipi, mo te siliva pea mo te aulo, mo te ʼu tagata pea mo te ʼu fafine faifekau, mo te ʼu kamelo pea mo te ʼu asino.+ 36 Tahi ʼae meʼa, neʼe maʼu e toku pule tona foha mo tona ʼohoana ko Sala kae neʼe kua finematuʼa.+ Pea ʼe foaki anai e toku pule ʼana meʼa fuli ki tona foha.+ 37 Koia neʼe kole mai e toku pule ke au fakapapau age kia ia te meʼa ʼaeni: ‘ ʼE mole ke kumi anai he ʼohoana ʼo toku foha ʼi te ʼu taʼahine ʼo te fenua ʼo Kanaane, ʼae ʼe au maʼuli ai.+ 38 Kailoa ia, kae ʼe ke alu anai ki te fale ʼo taku tamai pea ki toku famili,+ ʼo kumi ai he ʼohoana ʼo toku foha.’+ 39 Kae neʼe au ui ki toku pule: ‘ ʼE feafeaʼi mo kapau ʼe mole fia haʼu te taʼahine mo au?’+ 40 Neʼe ina tali mai: ‘Ko Sehova, ʼae ʼe au tauhi ki ai,+ ʼe ina fekauʼi anai tana ʼaselo+ ke alu mo koe pea ʼe ina tapuakiʼi moʼoni anai tau faifagona. ʼE ke kumi anai he taʼahine ke ʼohoana mo toku foha ʼi toku famili pea mo te fale ʼo taku tamai.+ 41 Pea kapau ʼe ke alu ki toku famili kae ʼe mole natou fia foaki atu te taʼahine, ʼe ke ʼateaina anai mai te fuakava ʼae neʼe ke fai mo au.’+

42 “Pea ʼi taku tau mai ʼi te ʼaho nei ki te matapuna vai, neʼe au ui: ‘Sehova te ʼAtua ʼo toku pule ko Apalahamo, kapau ʼe ke tapuakiʼi taku faifagona, 43 pea ko te meʼa ʼaeni ʼae ʼe tonu ke hoko: Koʼeni ʼe au tuʼu ovi ki he matapuna vai pea ka haʼu anai he taʼahine+ ʼo ohu vai, ʼe au ui anai ki ai: “Fakalelei siʼou loto, ʼe feala la ke ke foaki mai he moʼi vai mai tau ʼaiʼaga vai?” 44 Pea kapau ʼe ina tali mai: “Inu pea ʼe au toe fakainu anai mo ʼau kamelo,” pea ʼe ko te taʼahine ʼaia ʼae neʼe filifili e Sehova maʼa te foha ʼo toku pule.’+

45 “Neʼe heʼeki ʼosi taku faikole fakalogologo ʼaia, kae tau mai ia Lepeka mo tana ʼaiʼaga vai ʼe hili ʼi tona fuga ʼuma, pea neʼe hifo ki te matapuna vai ʼo kamata ohu vai ai. Pea neʼe au ui age ki ai: ‘Fakalelei siʼou loto, ke ke foaki mai he moʼi vai ke au inu.’+ 46 Neʼe ina toʼo fakavilivili ifo ai tana ʼaiʼaga vai mai tona fuga ʼuma pea mo ui: ‘Inu+ pea ʼe au toe fakainu anai mo ʼau kamelo.’ Neʼe au inu ai, pea neʼe ina toe fakainu mo ʼaku kamelo. 47 Hili ʼaia, neʼe au fehuʼi age: ‘Ko ai tau tamai?’ pea neʼe ina tali mai: ‘Ko au ko te ʼofafine ʼo Petuele, te tama ʼa Naole pea mo Milika.’ Neʼe au ʼai te mama ki tona ihu mo te ʼu vesa ki ʼona nima.+ 48 Neʼe au punou leva mo tulolo ia muʼa ʼo Sehova pea mo au vikiʼi ia Sehova, te ʼAtua ʼo toku pule ko Apalahamo.+ Neʼe ina taki au ke au maʼu te ʼofafine ʼo te tehina ʼo toku pule ke ʼohoana mo tona foha. 49 ʼI te lakaga nei, kotou fakaha mai pe ʼe kotou fia fakaha tokotou ʼofa* pea mo takotou agatonu ki toku pule. Pea kapau ʼe mole kotou loto ki ai, kotou fakaha mai, ke au iloʼi ai te meʼa ʼae ʼe tonu ke au fai.”*+

50 Neʼe tali leva e Lapane pea mo Petuele: “ ʼE takitaki e Sehova te aluʼaga ʼaia. Koia ʼe mole feala ai ke ma ʼio atu peʼe ke ma fakafisi atu.* 51 Koʼeni ia Lepeka ʼi ʼou muʼa. Ke ke toʼo ia ia pea ke alu, pea ke liliu ko te ʼohoana ʼo te foha ʼo tou pule, ohage pe ko tona ui e Sehova.” 52 ʼI te logo ʼa te tagata faifekau ʼa Apalahamo ki ʼanā palalau, neʼe punou mo tulolo atu aipe ki te kele ia muʼa ʼo Sehova. 53 Pea neʼe foaki age e te tagata faifekau kia Lepeka ni meʼa siliva, mo ni meʼa aulo pea mo ni mutuʼi meʼa. Neʼe ina toe foaki age ki tona tokolua mo tana faʼe he ʼu meʼa ʼofa maʼuhiga. 54 Hili ʼaia, neʼe natou kakai mo iinu, ia ia mo te ʼu tagata ʼae neʼe fakatahi mo ia, pea neʼe natou nonofo ai ʼi te poʼuli.

ʼI te ʼala uhu ake, neʼe ina ui: “Kotou tuku au ke au toe liliu ki toku pule.” 55 Neʼe ui age e te tokolua mo te faʼe ʼa te taʼahine: “Tuku muʼa ke nofo te taʼahine mo matou ia ʼaho ʼe hogofulu, pea hoki alu leva.” 56 Kae neʼe ina tali age kia naua: “ ʼAua naʼa kolua taʼofi fualoa au, he ʼe kua tapuakiʼi e Sehova taku faifagona. Koia kolua tuku au ke au toe liliu ki toku pule.” 57 Pea neʼe nā tali age ki ai: “Tou pauʼi muʼa te taʼahine pea tou fehuʼi age ki ai.” 58 Neʼe nā pauʼi ai ia Lepeka pea neʼe nā fehuʼi age: “ ʼE ke fia alu koa mo te tagata ʼaeni?” Neʼe ina tali: “ ʼEi, ʼe au fia alu mo ia.”

59 Koia, neʼe natou tuku ai ke alu ia Lepeka,+ mo tana fafine taupau,*+ mo te tagata faifekau ʼa Apalahamo pea mo ʼana tagata. 60 Neʼe natou tapuakiʼi ia Lepeka pea mo ui age ki ai: “Lepeka, ʼofa pe ke ke liliu ko te faʼe ʼo he toko lauʼi miliona, pea ke maʼu e tou hakoga te ʼu kolo ʼo te hahaʼi ʼae ʼe fehihiʼa ia natou.”+ 61 Neʼe heka leva ia Lepeka mo ʼana fafine faifekau ki te ʼu kamelo, ʼo natou muliʼi te tagata. Koia, neʼe alu ai te tagata faifekau mo Lepeka.

62 Neʼe kua haʼu ia Isaake mai Peele-lasai-loi,+ he neʼe nofo ʼi te fenua ʼo te Nekepe.+ 63 Neʼe alu ia Isaake ʼi he afiafi ʼo haʼele mo metitasio.*+ ʼI tana hiki ake ʼona mata, neʼe sio ki te ʼomai ʼa he ʼu kamelo. 64 ʼI te hiki ake e Lepeka ʼona mata, neʼe sio kia Isaake pea neʼe hifo fakavilivili ʼi tana kamelo. 65 Neʼe ina fehuʼi age ki te tagata faifekau: “Ko ai te tagata ʼae age ʼe haʼu ʼo fakatau mai kia tatou?” Neʼe tali age e te tagata faifekau: “Ko toku pule.” Neʼe toʼo ai e Lepeka he pulou ʼo pulouʼi ʼaki tona ʼulu. 66 Pea neʼe fakamatala age e te tagata faifekau kia Isaake te ʼu meʼa fuli ʼae neʼe ina fai. 67 Hili ʼaia, neʼe fakahu leva e Isaake ia Lepeka ki te fale la ʼo tana faʼe ko Sala.+ Neʼe ʼohoana ai mo ia. Neʼe manako ia Isaake ia Lepeka,+ pea neʼe ina maʼu hona fimalie ʼi te mate ʼo tana faʼe.+