ʼUluaki Kolonito

7 Ko te koga ʼae neʼe kotou faitohi mai ki ai, ʼe lelei ke mole fāfā* he tagata ki he fafine. 2 Kae ʼi te lahi ʼo te fai ʼo te ʼu felaveʼi fakasino heʼe ʼaoga,* ke tahi maʼu e te tagata hona ʼohoana+ pea ke tahi maʼu e te fafine hona ʼohoana.+ 3 Ke fai e te tagata tona maʼua ki tona ʼohoana, pea ke fai feia mo te fafine ki tona ʼohoana.+ 4 ʼE mole pule te fafine ki tona sino, kae ʼe ko tona ʼohoana. Pea ʼo toe feia aipe, ʼe mole pule te tagata ki tona sino, kae ʼe ko tona ʼohoana. 5 ʼAua naʼa kolua fefakafisiʼaki, gata pe mo kapau ʼe fakatemi pea kua kolua lototahi ki ai, ke feala hakolua fakaʼaogaʼi he temi ki te faikole. Kae ka ʼosi ia, ke kolua toe fakatahi naʼa fakahalaʼi koulua e Satana ʼi takolua mole lotololomi. 6 ʼE feala pe ke kotou mulimuli ki te ʼu palalau ʼaeni neʼe au fai atu, kae ʼe mole ko he fakatotonu ia. 7 ʼE au fakaʼamu ke hage te tagata fuli ko au. Kae ʼe tou tahi maʼu tona fealagia+ mai te ʼAtua, ko he tahi te fealagia ʼaeni, pea ko he tahi age te fealagia ʼae.

8 ʼE au ui kia natou ʼae ʼe mole honatou ʼohoana* pea mo te kau vitua, ʼe lelei age kia natou hanatou nonofo ohage ko au.+ 9 Kae kapau ʼe mole natou lotololomi, pea ke natou ʼohoana, he ʼe lelei age ke kita ʼohoana ʼi hakita maʼu he ʼu holi fakavale.+

10 Kia natou ʼae kua ʼohoana, ʼe au fakatotonu, ʼe mole ko au kae ʼe ko te ʼAliki, ke mole mavae te fafine mai tona ʼohoana.+ 11 Kae kapau ʼe mavae, ke nofo tokotahi peʼe ke toe fakatokatoka mo tona ʼohoana. Pea ʼe mole tonu ki te tagata ke mavae mai tona ʼohoana.+

12 Kae kia natou leva ʼae, ʼe au ui, ʼei, ia au kae ʼe mole ko te ʼAliki:+ Kapau ko he tehina ʼe mole tui tona ʼohoana, kae ʼe lotolelei te fafine ʼaia ke nā nonofo, ke mole mavae te tehina mai ia ia. 13 Pea kapau ko he fafine ʼe mole tui tona ʼohoana, kae ʼe lotolelei te tagata ʼaia ke nā nonofo, ke mole mavae te fafine mai tona ʼohoana. 14 Koteʼuhi ko te tagata ʼae ʼe mole tui ʼe maʼoniʼoni ia ʼuhi ko tona ʼohoana, pea ko te fafine ʼae ʼe mole tui ʼe maʼoniʼoni ia ʼuhi ko te tehina. Pea ʼe feala ai ke maʼoniʼoni ʼakotou fanau kae mole natou heʼe maʼa. 15 Kae kapau ko ʼae ʼe mole tui ʼe loto ia ke mavae, pea tuku ia ke mavae. ʼI te aluʼaga ʼaia, ʼe mole fakamaʼua ki te tehina peʼe ki te tuagaʼane ke nofo mo tona ʼohoana, kae neʼe pauʼi koutou e te ʼAtua ke kotou maʼuʼuli ʼi te tokalelei.+ 16 Kae fafine, kapau ʼe ke nofo mo tou ʼohoana, ʼe lagi feala anai ke ke haofaki ia ia.+ Pea tagata, kapau ʼe ke nofo mo tou ʼohoana, ʼe lagi feala anai ke ke haofaki ia ia.

17 Koia ke tahi nofo ʼi te aluʼaga ʼae neʼe foaki age e Sehova* ohage ko tona pauʼi e te ʼAtua.+ Pea ʼe ko te fakatotonu ʼaia ʼe au foaki ki te ʼu kokelekasio fuli. 18 Neʼe kua silikosisioʼi* koa he tagata ʼi te temi ʼae neʼe pauʼi ai ia ia?+ Ke nofo silikosisio ia. Neʼe pauʼi koa he tagata kae neʼe heʼeki silikosisio? Ke ʼaua naʼa silikosisio.+ 19 ʼE mole he ʼuhiga ʼo te silikosisio pea ʼe mole he ʼuhiga ʼo te heʼe silikosisio.+ Kae ko te meʼa ʼae ʼe maʼuhiga ʼe ko te mulimuli ki te ʼu fakatotonu ʼa te ʼAtua.+ 20 Ke tahi nofo ʼi te aluʼaga ʼae neʼe nofo ai ʼi tona pauʼi.+ 21 Neʼe pauʼi koa koe kae neʼe ke kaugana? ʼAua naʼa ke tuʼania.+ Kae kapau ʼe feala ke ke ʼateaina, toʼo ia te faigamalie ʼaia. 22 Koteʼuhi ko ʼae neʼe pauʼi ʼi te ʼAliki kae neʼe kaugana, ʼe ina maʼu te ʼateaina pea ʼe fakalogo ki te ʼAliki.+ ʼE toe feia mo ʼae neʼe pauʼi kae neʼe ʼateaina, ʼe ko he kaugana ʼa Kilisito.* 23 Neʼe totogi koutou ʼaki he totogi lahi,+ koia tuku takotou kaugana ki te tagata. 24 ʼU tehina, ke kotou tahi nofo ʼi te aluʼaga ʼae neʼe nofo ai ʼi tona pauʼi ia muʼa ʼo te ʼAtua.

25 Pea ko natou ʼae ʼe heʼeki ʼohoana, ʼe mole au maʼu he fakatotonu mai te ʼAliki, kae ʼe au tuku atu taku manatu+ ohage ko he tahi ʼe agatonu he neʼe fakaha age ki ai e te ʼAliki tona manavaʼofa. 26 Koia ʼi taku manatu ʼe lelei age ki he tagata ke nofo feia ʼuhi ko te ʼu faigataʼaʼia ʼo te temi ʼaeni. 27 Kua ʼi ai koa hou ʼohoana? Tuku tau faiga ʼae ke ke mavae mai ia ia.+ ʼE mole ʼi ai koa hou ʼohoana? Tuku tau kumi hou ʼohoana. 28 Kae kapau ʼe ke ʼohoana ʼe mole ke agahala anai. Pea ʼe mole agahala anai he tama peʼe ko he taʼahine* mo kapau ʼe ʼohoana. Kae ko natou ʼae ʼe ʼohoana, ʼe natou felaveʼi anai mo he ʼu mamahi ʼi ʼonatou kakano. Kae ʼe au loto ke kotou hao mai ai.

29 Pea ʼe au fakaha atu, ʼu tehina, ʼe kua nounou te temi ʼae ʼe kei toe.+ Koia ʼi te temi nei, ʼe tonu ke maʼuli te tagata ʼae kua ʼohoana ohage pe ʼe mole hona ʼohoana, 30 pea ko natou ʼae ʼe fetagihi ke hage ʼe mole natou fetagihi, pea ko natou ʼae ʼe fakafiafia ke hage ʼe mole natou fakafiafia, pea ko natou ʼae ʼe faifakatau ke hage ʼe mole honatou ʼu koloa, 31 pea ko natou ʼae ʼe natou fakaʼaogaʼi te ʼu lelei ʼo te malamanei ke hage ʼe mole natou fakaʼaogaʼi katoa. Koteʼuhi ʼe fetogi te agaaga ʼo te malamanei. 32 ʼEi, ʼe au loto ke kotou ʼateaina mai te ʼu tuʼania. Ko te tagata ʼae ʼe mole hona ʼohoana, ʼe tuʼania ia ki te ʼu meʼa ʼa te ʼAliki, pe ʼe lava feafeaʼi hana maʼu ia te ʼofa ʼo te ʼAliki. 33 Kae ko te tagata ʼae kua ʼohoana, ʼe tuʼania ia ki te ʼu meʼa ʼo te malamanei,+ pe ʼe lava feafeaʼi hana maʼu ia te ʼofa ʼo tona ʼohoana, 34 koia kua vaelua tana fakakaukau. Pea ko te fafine ʼae ʼe mole hona ʼohoana, ʼo feia mo te taʼahine,* ʼe nā tuʼania ki te ʼu meʼa ʼa te ʼAliki,+ ke feala hanā maʼoniʼoni ʼi ʼonā sino pea mo ʼonā ʼatamai.* Kae ko te fafine ʼae kua ʼohoana, ʼe tuʼania ia ki te ʼu meʼa ʼo te malamanei, pe ʼe lava feafeaʼi hana maʼu ia te ʼofa ʼo tona ʼohoana. 35 ʼE au fai atu te ʼu palalau ʼaia ke ʼaoga kia koutou. ʼE mole au tuku atu kia koutou he fakamaʼua, kae ʼe au fakalotomalohiʼi koutou ke kotou fai te meʼa ʼae ʼe lelei pea ke mole fakaleluʼi koutou ʼi takotou tauhi tuʼumaʼu ki te ʼAliki.

36 Kae kapau ʼe manatu e he tahi ʼe ina fai he aga ʼe kovi ʼuhi ko tana mole ʼohoana, pea kapau kua fakalaka ʼi tona temi tupulaga, koʼeni te faʼahi ʼe tonu ke ina fai: Ke ʼohoana mo kapau ʼe loto ki ai, ʼe mole agahala ia.+ 37 Kae kapau ʼe fakatotonu e he tahi ʼi tona loto ke mole ʼohoana pea mo ina taupau maʼu te tonu ʼaia, he ʼe mole ina logoʼi he fia ʼohoana pea mo ina lava puleʼi ʼona holi, ʼe lelei anai tana tonu.+ 38 Koia ko ʼae ʼe ʼohoana ʼe ina fai he tonu ʼe lelei, kae ko ʼae ʼe mole ʼohoana ʼe ina fai he tonu ʼe lelei age.+

39 ʼE haʼi he fafine ki tona ʼohoana ʼi te temi ʼae ʼe kei maʼuli ai.+ Kae kapau ʼe mate* tona ʼohoana, ʼe ʼateaina te fafine ke ʼohoana mo he tahi ʼe loto ki ai, kae ʼaki pe he tisipulo ʼa te ʼAliki.*+ 40 Kae ʼi taku ia manatu, ʼe fiafia age anai ia mo kapau ʼe nofo feia. Pea ʼe au tui ʼe au maʼu foki mo au te laumalie ʼo te ʼAtua.