Selemia

39 ʼI te hogofulu mahina ʼo te hiva taʼu ʼo te pule ʼa te Hau ʼo Suta ko Setesiasi, neʼe haʼu ia Nepukanesa, te Hau ʼo Papiloni mo tana foʼi kautau katoa ʼo ʼa takai ia Selusalemi.+

2 ʼI te 11 taʼu ʼo te pule ʼa Setesiasi, ʼi te ʼaho hiva ʼo te fa mahina, neʼe natou fai ai te ava ʼi te kaupa ʼo te kolo.+ 3 Neʼe fehufi ai te kau tama ʼaliki fuli ʼa te hau ʼo Papiloni ki te kolo ʼo nonofo ʼi te Matapa ʼo Te Lotomalie.+ Neʼe kau ai ia Nekale-saletesele, te Samekale, mo Nepo-salesekime, te Lapesalise* pea mo Nekale-saletesele, te Lapemake* pea mo te kau tama ʼaliki fuli ʼa te hau ʼo Papiloni.

4 Neʼe sio kia natou te Hau ʼo Suta ko Setesiasi mo tana kau solia fuli pea neʼe natou feholaki ai+ ʼi te poʼuli. Neʼe natou mavae ʼi te kolo ʼo fakalaka ʼi te ʼoloto ʼa te hau, ʼo feulufi ʼi te matapa ʼae ʼe tuʼu ʼi te vaha ʼo te ʼu kaupa ʼe lua. Pea neʼe hoko atu tanatou feholaki ʼi te ala ʼo te Alapa.+ 5 Kae neʼe tuli natou e te foʼi kautau ʼa te kau Kaletea ʼo natou maʼu ia Setesiasi ʼi te ʼu kele toafa ʼae ʼe natou ʼa takai ia Seliko.+ Neʼe natou puke ia ia ʼo ʼave ki te Hau ʼo Papiloni ko Nepukanesa ʼi Lipila,+ ʼi te potu fenua ʼo Hamate.+ Neʼe fakamauʼi ai ia ia e te hau. 6 Neʼe fakatotonu e te hau ʼo Papiloni ke matehi te ʼu foha ʼo Setesiasi ʼi ʼona muʼa ʼi Lipila. Neʼe toe fakatotonu e te hau ʼo Papiloni ke matehi te kau ʼaliki fuli ʼo Suta.+ 7 Neʼe ina fakakiviʼi leva ia Setesiasi pea ina haʼi ʼaki ni kauʼi kapa ʼo ʼave ki Papiloni.+

8 Neʼe tutu ai e te kau Kaletea ia te fale hau mo te ʼu ʼapi ʼo te hahaʼi,+ pea neʼe natou maumauʼi leva te ʼu kaupa ʼo Selusalemi.+ 9 Neʼe ʼave popula ki Papiloni e Nepusalatane,+ te pule ʼo te kau leʼo, ia te hahaʼi ʼae neʼe kei nonofo ʼi te kolo, mo natou ʼae neʼe feholaki kia ia pea mo te toe ʼo te hahaʼi.

10 Kae neʼe tuku e Nepusalatane, te pule ʼo te kau leʼo ʼi te fenua ʼo Suta ʼihi hahaʼi ʼae neʼe masisiva ʼaupito, ia natou ʼae neʼe mole hanatou meʼa. Neʼe ina foaki age kia natou ni gaueʼaga vite pea mo ni gaueʼaga ke natou to.*+

11 Pea neʼe fai age e te Hau ʼo Papiloni ko Nepukanesa kia Nepusalatane, te pule ʼo te kau leʼo te fakatotonu ʼaeni ʼo ʼuhiga mo Selemia: 12 “Alu ʼo kumi mai ia ia pea ke tokaga ki ai. ʼAua naʼa ke fai kia ia he meʼa ʼe kovi pea ke foaki kia ia te ʼu meʼa fuli ʼae ʼe ina kole atu.”+

13 Pea neʼe fekauʼi e Nepusalatane, te pule ʼo te kau leʼo, mo Nepusasepane te Lapesalise,* mo Nekale-saletesele te Lapemake* mo te ʼu hahaʼi maʼuhiga fuli ʼae neʼe gaue ki te hau ʼo Papiloni he ʼu tagata ke olo 14 ʼo fakamavae ia Selemia ʼi te Malaʼe ʼo Te Kau Leʼo.+ Neʼe natou tuku ia ia kia Ketalia,+ foha ʼo Asikame,+ foha ʼo Safani+ ʼae neʼe ina ʼave ki tona ʼapi. Pea neʼe maʼuli leva mo te hahaʼi.

15 Neʼe palalau ia Sehova kia Selemia ʼi te temi ʼae neʼe kei pilisoniʼi ai ʼi te Malaʼe ʼo Te Kau Leʼo,+ ʼo ina ui age: 16 “Alu ʼo ui age kia Epeti-meleke,+ te Etiopea: ‘Koʼeni te folafola ʼa Sehova ʼo te ʼatu kautau, te ʼAtua ʼo Iselaele: “ ʼE au fakahoko anai te meʼa ʼae neʼe au fakaha ʼo ʼuhiga mo te kolo ʼaeni: ʼe mole fakahoko anai he meʼa ʼe lelei kae ko te malaʼia. Pea ʼi te ʼaho ʼaia ʼe ke sio tonu anai ki ai.’ ”

17 “ ‘Kae ʼi te ʼaho ʼaia, ʼe au haofaki anai koe, ʼe mole tuku anai ia koe ki te ʼu tagata ʼae ʼe ke mataku ki ai,’ ko te ui ʼaia ʼa Sehova.

18 “ ‘Ke ke tui papau ʼe au puipui anai koe mai te tuʼutamaki pea ʼe mole matehi anai koe ʼaki te heleta. ʼE ke maʼu anai te fakapale ʼae ko te maʼuli+ he neʼe ke falala kia au,’+ ko te ui ʼaia ʼa Sehova.”