Sosue

23 Neʼe kua haofaki e Sehova ia te kau Iselaele mai ʼonatou fili fuli ʼi ʼonatou tafaʼaki pea mo foaki te tokalelei kia natou.+ Hili he temi fualoa ki ai, ʼi te kua matuʼa ʼa Sosue,+ 2 neʼe pauʼi leva e Sosue ia Iselaele katoa:+ ia te kau tagata takitaki, mo te kau pule, mo te kau tuʼi fakamau pea mo te kau tagata taupau.+ Pea neʼe ina ui kia natou: “Kua au matuʼa leva. 3 Neʼe kotou sisio mata ki te ʼu meʼa fuli ʼae neʼe fai e Sehova tokotou ʼAtua ki te ʼu puleʼaga fuli ʼaia maʼa koutou, he neʼe ko Sehova tokotou ʼAtua, ʼae neʼe tau maʼa koutou.+ 4 Neʼe au fai he toho+ ke au foaki atu* te fenua ʼo te ʼu puleʼaga ʼae ʼe kei nonofo ai, ʼo feia mo te fenua ʼo te ʼu puleʼaga fuli ʼae neʼe au maumauʼi,+ mai te Solotane ʼo kaku ki te Tai Lahi,* ʼi te potu uesite.* ʼE ko te tofiʼa ʼaia ʼo ʼokotou telepi.+ 5 Neʼe tauʼi e Sehova, tokotou ʼAtua, te ʼu puleʼaga ʼaia pea neʼe ina kapu natou mai te fenua ʼi ʼokotou muʼa.+ Pea neʼe kotou maʼu leva tonatou fenua, ohage pe ko tona fakapapau atu e Sehova, tokotou ʼAtua.+

6 “ ʼI te temi nei, ʼe tonu ke kotou lototoʼa ke feala hakotou fakaʼapaʼapa pea mo mulimuli ki te ʼu meʼa fuli ʼae ʼe tuʼu ʼi te tohi ʼo te Lao+ ʼa Moisese, ke mole kotou olo ki te faʼahi mataʼu peʼe ki te faʼahi hema,+ 7 pea ke mole kotou fakatahi mo te ʼu puleʼaga ʼaia+ kei nonofo mo koutou ʼi te fenua. ʼE mole tonu ke kotou fetapa ki ʼonatou ʼatua+ pea mo fai he ʼu fakapapau ʼi ʼonatou higoa. Pea ʼe mole tonu anai ke kotou tauhi mo tulolo ʼi ʼonatou muʼa.+ 8 Kae ʼe tonu ke kotou pipiki kia Sehova, tokotou ʼAtua,+ ohage pe ko takotou fai ʼo kaku mai ki te ʼaho nei. 9 ʼE kapu anai e Sehova he ʼu puleʼaga lalahi mo malolohi ʼi ʼokotou muʼa.+ ʼE moʼoni, neʼe mole he tagata neʼe lava malo ia koutou ʼo kaku mai ki te ʼaho nei.+ 10 ʼE tuli anai e he tahi ia koutou he toko afe,+ he ʼe tau ia Sehova, tokotou ʼAtua maʼa koutou,+ ohage pe ko tana fakapapau atu.+ 11 Koia, ke kotou nonofo tokaga tuʼumaʼu+ ʼo kotou ʼoʼofa kia Sehova, tokotou ʼAtua.+

12 “Kae kapau ʼe kotou maliu kehe mai te ʼAtua, pea kapau ʼe kotou pipiki ki te toe ʼo te ʼu puleʼaga+ ʼae kei nonofo mo koutou ʼi te fenua, pea kapau ʼe kotou ʼohoana mo ʼonatou foha mo ʼonatou ʼofafine,+ pea kapau ʼe kotou fakatahi mo natou peʼe natou fakatahi mo koutou, 13 ke kotou iloʼi papau ia te faʼahi ʼaeni: ʼe mole hoko atu anai te kapu e Sehova, tokotou ʼAtua ia te ʼu puleʼaga ʼaia ʼi ʼokotou muʼa.+ ʼE natou liliu anai ko he hele kia koutou, mo he huipi ʼe taʼi ʼaki koutou ʼi ʼokotou vakavaka+ pea mo he ʼu meʼa talatala ʼi ʼokotou mata, ʼo kaku ki takotou pupuli ʼi te fenua lelei ʼaeni neʼe foaki atu e Sehova, tokotou ʼAtua.

14 “ ʼI te lakaga nei, kotou fakalogo mai! Koʼeni kua au vave mate.* ʼE kotou iloʼi lelei pe, neʼe mole to noa he folafola ʼe tahi ʼi te ʼu fakapapau taulekaleka fuli ʼae neʼe fai atu e Sehova, tokotou ʼAtua. Neʼe hoko fuli te ʼu fakapapau ʼaia. ʼEi, neʼe mole to noa he folafola ʼe tahi.+ 15 Neʼe hoko te ʼu fakapapau lelei fuli ʼae neʼe fai e Sehova, tokotou ʼAtua kia koutou,+ pea ʼe toe fakahoko pe anai e Sehova kia koutou te ʼu malaʼia fuli ʼae neʼe ina tala atu.* Pea ʼe ina pulihi anai koutou ʼi te fenua lelei ʼaeni neʼe foaki atu e Sehova, tokotou ʼAtua.+ 16 Kapau ʼe kotou maumauʼi te fuakava ʼae neʼe fakatotonu atu e Sehova, tokotou ʼAtua ke kotou taupau pea kapau ʼe kotou olo ʼo tauhi ki he tahi age ʼu ʼatua mo tulolo ʼi ʼonatou muʼa, ʼe to anai te hauhau ʼo Sehova kia koutou,+ pea ʼe kotou pupuli vave anai ʼi te fenua lelei ʼae neʼe ina foaki atu kia koutou.”+