Sosue

17 Neʼe fai leva he toho+ ʼo maʼu ai he fenua ʼo te telepi ʼo Manase,+ te ʼuluaki foha ʼo Sosefo.+ Ko Makile,+ te ʼuluaki foha ʼo Manase pea ko te tamai ʼa Kileate, neʼe ko he tagata tau. Koia neʼe ina maʼu ai ia Kileate pea mo Pasani.+ 2 Neʼe toe fai he toho ʼo maʼu ai he vahe ʼo te toe ʼo te hologa ʼo Manase, ke vaevae ʼi te ʼu famili takitahi: te ʼu foha ʼo Apiesele,+ mo te ʼu foha ʼo Eleki, mo te ʼu foha ʼo Aseliele, mo te ʼu foha ʼo Sekemi, mo te ʼu foha ʼo Hefele, pea mo te ʼu foha ʼo Semita. Ko te ʼu tagata ʼaia neʼe hifo mai ia Manase, te foha ʼo Sosefo, ʼo mulimuli pe ki ʼonatou famili.+ 3 Ko Selofati+ neʼe ko te foha ʼo Hefele, te foha ʼo Kileate, te foha ʼo Makile, te foha ʼo Manase. Neʼe mole maʼu e Selofati hona ʼu foha kae ko ʼona ʼofafine pe. Pea koʼeni ʼonatou higoa: ko Masela, mo Noa, mo Okala, mo Milika, pea mo Tilitesa. 4 Neʼe natou olo ai ʼo tutuʼu ia muʼa ʼo te pelepitelo ko Eleasale,+ mo Sosue te foha ʼo Nune, pea mo te ʼu pule, ʼo ui kia natou: “Neʼe fakatotonu e Sehova kia Moisese ke ina foaki mai homatou tofiʼa ohage pe ko tana fai ki ʼomatou tuagaʼane.”*+ Koia, neʼe foaki ai honatou tofiʼa ohage pe ko te fai ki te ʼu tehina ʼo tanatou tamai,* ʼo mulimuli pe ki te fakatotonu ʼa Sehova.+

5 Neʼe toe foaki he ʼu vahe ʼe hogofulu ki te telepi ʼo Manase, ʼo mole lau ai te potu fenua ʼo Kileate mo Pasani, ʼae ʼi te tahi faʼahi* ʼo te Solotane,+ 6 koteʼuhi neʼe maʼu tofiʼa ia te ʼu ʼofafine* ʼo Manase ohage pe ko ʼona foha.* Pea neʼe maʼu leva te potu fenua ʼo Kileate e te toe ʼo te hologa ʼo Manase.

7 Neʼe alu te tuʼakoi ʼo te fenua ʼo Manase mai te fenua ʼo Asele ki Mikemetati,+ ʼae ʼe haga ki Sekemi,+ pea neʼe hoko atu ki te potu saute,* ʼo kaku ki te potu fenua ʼae neʼe nonofo ai te hahaʼi ʼo Ene-Tapua. 8 Neʼe maʼu leva te fenua ʼo Tapua+ e te telepi ʼo Manase, kae neʼe maʼu e te hologa ʼo Efalaimi te kolo ko Tapua, ʼae ʼi te tuʼakoi ʼo Manase. 9 Neʼe hifo te tuʼakoi ki te potu saute ʼo te Vai Tafe* ʼo Kanea. Neʼe ʼi ai te ʼu kolo ʼo Efalaimi ʼi te ʼu kolo ʼo Manase.+ Neʼe fakalaka te tuʼakoi ʼo Manase ʼi te potu noleto ʼo te vai tafe, pea neʼe gata ai ʼi te tai.+ 10 Neʼe maʼu e Efalaimi te fenua ʼae ʼe haga ki te potu saute, pea neʼe maʼu e Manase te fenua ʼae ʼe haga ki te potu noleto, pea ko te tuʼakoi ʼo te fenua ʼo Manase neʼe ko te tai.+ ʼI te potu noleto, neʼe kaku te fenua ʼo Manase* ki Asele, pea ʼi te potu esite neʼe kaku ki Isakale.

11 Koʼeni te ʼu kolo ʼae neʼe foaki kia Manase, ʼi te ʼu fenua ʼo Isakale mo Asele: ko Pete-seani pea mo te ʼu kolo liliki ʼi ʼona tafaʼaki, mo Sipeleami+ pea mo te ʼu kolo liliki ʼi ʼona tafaʼaki, mo te hahaʼi ʼo Tole+ pea mo te ʼu kolo liliki ʼi ʼona tafaʼaki, mo te hahaʼi ʼo Ene-toli+ pea mo te ʼu kolo liliki ʼi ʼona tafaʼaki, mo te hahaʼi ʼo Taanake+ pea mo te ʼu kolo liliki ʼi ʼona tafaʼaki, mo te hahaʼi ʼo Mekito pea mo te ʼu kolo liliki ʼi ʼona tafaʼaki. Neʼe ina maʼu he ʼu potu fenua maʼoluga ʼe tolu.

12 Kae neʼe mole feala ke maʼu e te hologa ʼo Manase te ʼu kolo ʼaia, he neʼe kei nonofo aipe te kau Kanaane.+ 13 ʼI te temi ʼae neʼe liliu ai te kau Iselaele ʼo malolohi, neʼe natou fakamaʼua leva ki te kau Kanaane ke natou gaue ohage ko he ʼu kaugana+ kae neʼe mole natou kapu ia natou fuli.+

14 Neʼe fehuʼi e te hologa ʼo Sosefo kia Sosue: “He koʼe neʼe ke foaki mai he vahe pe ʼe tahi ʼo te fenua+ ko homatou tofiʼa? Ko matou ko he hahaʼi kaugamalie, koteʼuhi neʼe tapuakiʼi matou e Sehova ʼo kaku mai ki te temi nei!”+ 15 Pea neʼe tali e Sosue kia natou: “Kapau ko koutou ko he hahaʼi kaugamalie, kotou hake ki te vao matuʼa pea mo fakaʼatea he koga meʼa ʼi ai maʼa koutou ʼi te fenua ʼo te kau Pelesite+ pea mo te kau Lefaimi,+ mo kapau ʼe veliveli fau te potu moʼugaʼia ʼo Efalaimi+ kia koutou.” 16 Pea neʼe tali e te hologa ʼo Sosefo: “ ʼE mole feʼauga te potu moʼugaʼia kia matou. Pea ko te kau Kanaane fuli ʼae ʼe nonofo ʼi te potu fenua laulelei, ʼe maʼu ʼanatou saliote+ ʼe fakapipiki he ʼu hele ʼi te ʼu foʼi teka.* Ko te hahaʼi ʼaia ʼe nonofo ʼi Pete-seani+ pea mo te ʼu kolo liliki ʼi ʼona tafaʼaki, pea mo te Potu Fenua Laulelei ʼo Siseleele.”+ 17 Pea neʼe tali e Sosue ki te hologa ʼo Sosefo, te ʼu telepi ʼo Efalaimi mo Manase: “ ʼE kotou kaugamalie, pea ʼe kotou malolohi ʼaupito. ʼE mole kotou maʼu pe anai he fenua ʼe tahi,+ 18 kae ʼe kotou toe maʼu anai mo te potu moʼugaʼia.+ ʼE moʼoni, ʼe ko he vao matuʼa, kae ʼe kotou fakaʼatea anai, pea ʼe ko te tuʼakoi ʼaia ʼo tokotou fenua. ʼEi, ʼe kotou kapu anai te kau Kanaane, logo la ʼe malolohi pea mo natou maʼu he ʼu saliote ʼe fakapipiki he ʼu hele ʼi te ʼu foʼi teka.”+