Lua Soane

1 Ko au, te tagata kua matuʼa,* ʼe au faitohi atu kia koe, fafine ʼae kua filifili pea mo ʼau fanau. ʼE au ʼofa moʼoni ia koutou, ʼo mole ko au pe kae ʼe toe feia mo natou fuli ʼae kua natou iloʼi te moʼoni, 2 he ʼe nofo te moʼoni ʼi ʼotatou loto, pea ʼe nofo anai ʼo talu ai. 3 ʼE tou maʼu anai te ʼofa makehe, mo te manavaʼofa pea mo te tokalelei mai te ʼAtua, te Tamai pea mo Sesu Kilisito,* te ʼAlo ʼo te Tamai, ʼo toe feia mo te moʼoni pea mo te ʼofa.

4 ʼE lahi ʼaupito toku fiafia koteʼuhi neʼe fakaha mai ko ʼihi ʼi ʼau fanau ʼe natou mulimuli ki* te ala ʼo te moʼoni,+ ohage pe ko tona fakatotonu mai e te Tamai. 5 Pea ʼi te temi nei, ʼe au kole atu, fafine, ke tou feʼofaʼaki. (ʼE mole au tohi atu he fakatotonu foʼou, kae ko he fakatotonu neʼe kua tou maʼu talu mai te kamataʼaga.)+ 6 Pea koʼeni te fakaʼuhiga ʼo te ʼofa: Ke tou haga haʼele ʼo mulimuli ki ʼana fakatotonu.+ Koʼeni te fakatotonu, ohage pe ko takotou logo ki ai talu mai te kamataʼaga: Ke kotou haga fakaha ia te ʼofa. 7 Koteʼuhi kua kaugamalie te hahaʼi kaka ʼi te malamanei,+ ia natou ʼae ʼe mole natou fakamoʼoni neʼe haʼu ia Sesu Kilisito ki te kele ohage ko he tagata.+ Koʼena te tagata kaka, ia ia ʼae ʼe fakafeagai kia Kilisito.*+

8 Kotou tokakaga kia koutou totonu, ke ʼaua naʼa puli te ʼu fua ʼo tamatou gaue, kae ke kotou maʼu katoa te fakapale.+ 9 Ko ia ʼae ʼe fakalaka ʼi te akonaki ʼa Kilisito ʼo mole nofo ai, ʼe mole fakatahi ia mo te ʼAtua.+ Kae ko ia ʼae ʼe nofo ʼi te akonaki ʼaia, ʼe fakatahi ia mo te Tamai pea mo te ʼAlo.+ 10 Kapau ʼe alu atu he tahi kia koutou kae ʼe mole ina akoʼi atu te akonaki ʼaia, ʼaua naʼa kotou tali ia ia ʼi ʼokotou loto fale+ peʼe kotou ʼalofa ki ai. 11 Koteʼuhi ko ia ʼae ʼe ʼalofa ki ai, ʼe toe kau mo ia ki ʼana gaue ʼae ʼe kovi.

12 ʼE lahi te ʼu meʼa ʼe au fia palalau atu ki ai, kae ʼe mole au fia tohi atu ʼi he moʼi pepa. ʼE au fakaʼamu ke au alu atu pea mo palalau mo koutou, ke katoa ai tokotou fiafia.

13 ʼE ʼofa atu te ʼu fanau ʼo tou tehina, ia ia ʼae neʼe filifili.