Te ʼu Gaue ʼa Te Kau Apositolo

15 Neʼe hihifo mai Sutea ʼihi tagata pea neʼe natou akonaki ki te ʼu tehina: “Kapau ʼe mole kotou silikosisio* ʼo mulimuli ki te Lao ʼa Moisese+ ʼe mole feala ke haofaki koutou.” 2 Neʼe hoko leva he maveuveu mo he fihi lahi, ʼo fakafeagai ia Paulo mo Palenapa kia natou ʼaia. Koia, neʼe fakatuʼutuʼu ai ke hake ia Paulo, mo Palenapa pea mo ʼihi tehina ki te kau apositolo mo te kau tagata ʼafeā ʼi Selusalemi+ ʼo ʼuhiga mo te fihi ʼaia.

3 Neʼe kaugā olo leva te kokelekasio ʼi he kiʼi temi mo te ʼu tagata ʼaia. Neʼe hoko atu leva te fagona ʼo te ʼu tagata ʼaia ʼo natou fakalaka ʼi Fenisia mo Samalia. Neʼe natou fakamatalatala te tafoki ʼa te hahaʼi ʼae ʼe mole Sutea, ʼo fiafia ai te ʼu tehina fuli. 4 ʼI tanatou tau atu ki Selusalemi, neʼe fakatalitali lelei natou e te kokelekasio, mo te kau apositolo pea mo te kau tagata ʼafeā, pea neʼe nā fakamatala age te ʼu gaue fuli ʼae neʼe fai e te ʼAtua ʼaki ia naua. 5 Kae ko ʼihi ʼo te magaʼi lotu ʼa te kau Faliseo, ʼae neʼe kua liliu ʼo tui, neʼe natou tutuʼu ake mai ʼonatou hekaʼaga ʼo natou ui: “ ʼE tonu ke silikosisioʼi natou pea mo fakatotonu age ke natou maʼuliʼi te Lao ʼa Moisese.”+

6 Neʼe fakatahitahi leva te kau apositolo mo te kau tagata ʼafeā ke natou vakavakaʼi te faʼahi ʼaia. 7 Neʼe hoko leva te fihi lahi. Hili ia, neʼe tuʼu ake ia Petelo ʼo ina ui kia natou: “ ʼU tagata, ʼu tehina, ʼe kotou iloʼi lelei talu mai te kamata neʼe filifili au e te ʼAtua mai ia koutou, ke au ʼave te folafola ʼo te logo lelei ki te hahaʼi ʼae ʼe mole Sutea pea ke natou tui.+ 8 Pea ko te ʼAtua, ʼae ʼe ina iloʼi te loto,+ neʼe ina fakaha ʼe ina tali natou ʼi tana foaki age te laumalie maʼoniʼoni,+ ohage pe ko tana fai ʼae kia tatou. 9 Pea neʼe mole ina fakakehekeheʼi tatou pea mo natou,+ kae neʼe ina fakamaʼa ʼonatou loto ʼaki te tui.+ 10 Koia he koʼe ʼe kotou ʼahiʼahiʼi ia te ʼAtua ʼi te temi nei, ʼo kotou hili ki te kau tisipulo he kavega mamafa+ neʼe mole feala ke ʼamo e ʼatatou kui ʼo feia pe la mo tatou?+ 11 Kae ʼe tou tui ʼe haofaki tatou ʼaki te ʼofa makehe ʼo te ʼAliki ko Sesu+ ohage pe ko te hahaʼi ʼaia.”+

12 ʼI tana ʼosi fai te ʼu palalau ʼaia, neʼe fakalologo leva te fakatahi katoa. Neʼe natou fakalogo ki te fakamatala ʼa Palenapa mo Paulo ia te ʼu milakulo pea mo te ʼu meʼa fakaofoofo* ʼae neʼe fai e te ʼAtua ʼaki ia naua, ʼi te hahaʼi ʼae ʼe mole Sutea. 13 ʼI tanā ʼosi palalau, neʼe ui leva e Sakopo: “ ʼU tagata, ʼu tehina, kotou fagono mai. 14 Kua fakamatala fakalelei mai e Simone*+ te hoki tokaga ʼae ʼa te ʼAtua ki te hahaʼi ʼae ʼe mole Sutea, ke ina filifili mai ia natou he hahaʼi ke natou fua tona huafa.+ 15 Pea ʼe alu tahi te faʼahi ʼaia mo te ʼu folafola ʼaeni neʼe tohi e te kau Polofeta: 16 ‘Hili te ʼu meʼa ʼaia, ʼe au toe liliu mai anai mo toe fakatuʼu te fale la* ʼo Tavite ʼae kua holo. ʼE au toe laga anai te ʼu faʼahi ʼae kua maumau. Pea ʼe au toe faʼu anai, 17 ke feala ki te ʼu tagata ʼae ʼe kei toe, ke natou kumi fakamalotoloto ia Sehova* fakatahi mo te hahaʼi fuli ʼe mole Sutea, ʼae ʼe natou fua toku huafa, ko te ui ʼaia ʼa Sehova,* ʼae ka ina fai te ʼu meʼa ʼaia+ 18 neʼe ina fakatuʼutuʼu talu mai te temi muʼa.’+ 19 Koia ko taku tonu* ke ʼaua naʼa fakahohaʼa kia natou ʼe mole Sutea ʼae ʼe tafoki ki te ʼAtua,+ 20 kae ke tou faitohi kia natou ke natou fakamamaʼo mai te ʼu meʼa ʼae ʼe pipiki ki te tauhi taula ʼatua,+ mo te ʼu felaveʼi fakasino heʼe ʼaoga,*+ mo te ’u manu ʼae neʼe tege* pea mo te toto.+ 21 Koteʼuhi talu mai te ʼu temi ʼafeā, ʼe fakamafola e te hahaʼi ia te ʼu tohi ʼa Moisese ʼi te ʼu kolo fuli pea ʼe lau leʼo lahi ʼi te ʼu sinakoka ʼi te sapato fuli.”+

22 Neʼe fai leva e te kau apositolo, mo te kau tagata ʼafeā mo te kokelekasio katoa te tonu ʼae ke filifili he ʼu tagata mai ia natou, ke kaugā olo mo Paulo mo Palenapa ki Atiokia. Neʼe ko Sutasi ʼae ʼe toe higoa ko Palesapasi mo Silasi,+ pea neʼe nā kau ʼi te ʼu tehina ʼae neʼe natou takitaki te gaue. 23 Neʼe natou tohi te faʼahi ʼaeni pea natou momoli ʼaki ia natou:

“ ʼE fakaʼalofa atu ʼokotou tehina, te kau apositolo mo te kau tagata ʼafeā, kia koutou ʼu tehina ʼe mole Sutea ʼae ʼi Atiokia,+ mo Silia pea mo Silisia! 24 Neʼe matou logo neʼe olo atu ʼihi tagata ʼi heni ʼo fakamaveuveuʼi koutou ʼaki ʼanatou palalau.+ Neʼe natou faigaʼi ke natou maumauʼi te ʼu meʼa ʼae ʼe kotou tui ki ai, kae neʼe mole matou fakatotonu age he meʼa. 25 Koia neʼe matou manatu tahi fuli ai ke filifili he ʼu tagata ke fekauʼi atu fakatahi mo ʼomatou tehina ʼofaina ko Palenapa mo Paulo, 26 ko he ʼu tagata kua nā momoli ʼonā maʼuli* ki te huafa ʼo totatou ʼAliki ko Sesu Kilisito.*+ 27 Koia ʼe matou fekauʼi atu ia Sutasi mo Silasi ke nā fakamatala atu mo naua te ʼu meʼa ʼaia.+ 28 Neʼe tokoni mai te laumalie maʼoniʼoni+ ke matou fai te tonu ʼae ke ʼaua naʼa hilifaki atu he tahi age kavega ki te ʼu meʼa maʼuhiga ʼaeni: 29 ke kotou fakamamaʼo mai te ʼu meʼa ʼae neʼe sakilifisioʼi ki te ʼu taula ʼatua,+ mo te toto,+ mo te ʼu manu ʼae neʼe tege*+ pea mo te ʼu felaveʼi fakasino heʼe ʼaoga.*+ Kapau ʼe kotou tokakaga ʼo fakamamaʼo mai te ʼu meʼa ʼaia, ʼe fua lelei anai kia koutou. ʼE matou ʼoʼofa mamahi atu!”

30 Koia neʼe mavae te ʼu tagata ʼaia ʼo natou hihifo ki Atiokia, pea neʼe natou fakatahitahiʼi te kau tisipulo katoa ʼo natou fakatoʼo age te tohi. 31 ʼI tanatou ʼosi lau, neʼe natou fakafiafia ʼuhi ko te fakalotomalohi ʼaia. 32 Pea ko Sutasi mo Silasi, ʼae neʼe toe polofeta mo naua, neʼe nā tokoni pea mo fakalotomalohiʼi te ʼu tehina ʼaki he ʼu akonaki.+ 33 Neʼe nā nonofo ai ʼi he kiʼi temi. Hili ia, neʼe fakaliliu naua e te ʼu tehina ʼi te tokalelei kia natou ʼae neʼe natou fekauʼi mai naua. 34* —— 35 Kae neʼe nonofo ia Paulo mo Palenapa ʼi Atiokia, ʼo nā faiakonaki pea mo tala te logo lelei ʼo ʼuhiga mo te folafola ʼa Sehova,* fakatahi mo ʼihi atu.

36 Hili ki ai ni ʼaho, neʼe ui e Paulo kia Palenapa: “ ʼI te temi leva ʼaeni,* ta toe liliu ʼo ʼaʼahi te ʼu tehina ʼi te ʼu kolo fuli ʼae neʼe ta tala ai te folafola ʼa Sehova,* mo vakaʼi ʼonatou aluʼaga.”+ 37 Neʼe loto e Palenapa ke nā toʼo ia Soane ʼae ʼe toe higoa ko Maleko.+ 38 Kae neʼe mole loto ki ai ia Paulo koteʼuhi ʼi muʼa atu, neʼe mavae mai ia naua ʼi Pafilia pea neʼe mole kaugā fagona mo naua ʼi te gaue.+ 39 Neʼe kovi ʼosi tanā feiitaʼaki, ʼo nā tahi olo leva. Neʼe toʼo e Palenapa+ ia Maleko ʼo nā folau vaka ki Sipele. 40 Kae neʼe filifili e Paulo ia Silasi. Neʼe mavae ʼi te ʼosi kole e te ʼu tehina kia Sehova* ke ina fakaha kia Paulo tona ʼofa makehe.+ 41 Neʼe fakalaka leva ʼi Silia pea mo Silisia, ʼo fakalotomalohiʼi te ʼu kokelekasio.