Te ʼu Gaue ʼa Te Kau Apositolo

28 ʼI tamatou kua hao ʼi te tuʼutamaki, neʼe matou iloʼi leva neʼe higoa te motu ko Malete.+ 2 Pea neʼe agalelei ʼaupito te hahaʼi ʼo te motu kia matou. Neʼe natou tafu he afi ʼo fakatalitali leleiʼi ia matou fuli, he neʼe ʼua pea mo momoko. 3 Neʼe tae fafie ia Paulo, pea ʼi tana hili ʼae ki te afi, neʼe mavae mai ai te gata kafokona ʼuhi ko te momofi ʼo te vela pea neʼe ina ʼuʼusi tona nima pea mo tautau ai. 4 ʼI te sisio ʼa te hahaʼi ʼo te motu ki te tautau ʼo te gata ʼi tona nima, neʼe natou feuiʼaki: “ ʼE mahino ia ko te tagata ʼaeni ʼe ko he tagata faifakapo, pea logo la tana hao mai te tai, kae neʼe mole tonu ke maʼuli, he ʼe ko tona tautea ʼaeni.” 5 Neʼe ina tūʼi te gata ki te afi pea neʼe mole ina logoʼi hona mamahi. 6 Kae neʼe natou ʼamanaki ʼe fufula anai tona nima peʼe mate fakapunamaʼuli anai. ʼI tanatou ʼosi fakatalitali fualoa pea mo sisio neʼe mole hoko he meʼa kia ia, neʼe fetogi ai tanatou manatu, ʼo natou ui neʼe ko he ʼatua.

7 ʼI te tafaʼaki ʼo te koga meʼa ʼaia, neʼe ʼi ai te ʼu kele ʼo te tagata neʼe higoa ko Popilio, neʼe ko te pule ʼo te motu. Neʼe ina fakatalitali lelei pea mo fakaʼapi matou lolotoga ʼaho ʼe tolu. 8 Pea neʼe takoto te tamai ʼa Popilio he neʼe fiva mo mahaki fatu. Neʼe alu ia Paulo ki ai ʼo faikole mo ina hili ʼona nima ki ai, pea neʼe malolo leva.+ 9 Hili te aluʼaga ʼaia, neʼe toe olo age foki te hahaʼi ʼo te motu ʼae neʼe mahahaki kia Paulo pea neʼe ina fakamalolo natou.+ 10 Neʼe natou toe lotofakafetaʼi foki kia matou ʼo natou foaki lahi mai ni meʼa ʼofa, pea ʼi tamatou heheka ki te vaka, neʼe natou foaki mai te ʼu meʼa fuli ʼae neʼe ʼaoga kia matou.

11 Hili mahina ʼe tolu, neʼe matou heheka leva ki te vaka neʼe tuʼu ʼi tona taumuʼa te fakailoga ʼo “Te ʼu Foha ʼo Seusi.” Neʼe haʼu te vaka ʼaia mai Alesatelia pea neʼe tau ʼi te motu ʼi te temi momoko. 12 Neʼe matou tau leva ki Silakuse ʼo matou nonofo ai ʼaho ʼe tolu. 13 Mai ai, neʼe matou folau vaka leva ʼo tau ki Lekio. ʼI te ʼaho ake, neʼe agi te matagi mai te potu saute pea matou tau leva ki Puteoli ʼi te lua ʼaho. 14 Neʼe matou maʼu ai ni tehina pea neʼe natou kole mai ke matou nonofo mo natou ia ʼaho ʼe fitu. Hili ia, neʼe matou fagona leva ki Loma. 15 ʼI te maʼu logo ʼa te ʼu tehina ʼi Loma ʼo ʼuhiga mo matou, neʼe natou ʼomai ʼo fakafetaulaki mai kia matou ʼi te Fakatauʼaga Koloa ʼo Apiu pea mo te tahi koga meʼa ʼe higoa ko te ʼu Fale Tali Fagona ʼe Tolu. ʼI te sio ʼa Paulo kia natou, neʼe fakafetaʼi ki te ʼAtua pea neʼe lotomalohi ai.+ 16 ʼI tamatou hu leva ki Loma, neʼe fakagafua age kia Paulo ke nofo ʼi he ʼapi mo te tagata solia ʼae neʼe leʼo kia ia.

17 Kae hili ʼaho ʼe tolu, neʼe ina pauʼi te ʼu tagata Sutea maʼuhiga. ʼI tanatou kua fakatahitahi, neʼe ina ui kia natou: “ ʼU tagata, ʼu tehina, logo la neʼe mole au fai he meʼa ʼe fakafeagai ki te hahaʼi pea mo te ʼu agaʼi fenua ʼo ʼatatou kui,+ kae neʼe puke au ʼi Selusalemi pea mo ʼave pilisoni au ki te kau Loma.+ 18 Pea hili tanatou fakafehuʼi au,+ neʼe natou fia fakaʼateainaʼi au he neʼe mole natou maʼu he tupuʼaga ke natou matehi ai au.+ 19 Kae ʼi te mole loto ʼa te kau Sutea ke fakaʼateainaʼi au, neʼe maʼua ai ke au tagi kia Sesale,+ kae mole tupu he ʼe au fia tukugakoviʼi taku hahaʼi. 20 Neʼe au kole ke au sio kia koutou pea mo palalau atu, he ʼe haʼi au ʼaki te ʼu seini ʼaeni ʼuhi ko ia ʼae ʼe ʼamanaki ki ai ia Iselaele.”+ 21 Neʼe natou ui ki ai: “Neʼe heʼeki matou maʼu he tohi mai Sutea ʼo ʼuhiga mo koe, pea neʼe mole he tehina neʼe haʼu mai ai ʼo laukoviʼi koe. 22 Kae ʼe matou fia logo mai ia koe totonu pe kotea tau manatu, he ʼe mahino ia, ʼo ʼuhiga mo te magaʼi lotu ʼaia,+ ʼe matou iloʼi ʼe palalau te hahaʼi ʼo fakafeagai ki ai ʼi te potu fuli.”+

23 Neʼe natou fakatuʼutuʼu leva ki he ʼaho ke natou fakatahi ai mo ia, pea neʼe natou ʼomai kaugamalie leva ki te ʼapi ʼae neʼe nofo ai. Pea mai te uhu ki te afiafi, neʼe faifakamafola kia natou ʼo ina foaki he fakamoʼoni katoa ʼo ʼuhiga mo te Puleʼaga ʼo te ʼAtua. Pea, ʼo fakatafito ki te Lao ʼa Moisese+ pea mo te ʼu tohi ʼa te kau Polofeta,+ neʼe ina faigaʼi ke ina fakalotoʼi natou ke natou tui kia Sesu.+ 24 Neʼe tui ʼihi ki te ʼu meʼa ʼae neʼe ina ui, kae neʼe mole tui ʼihi ki ai. 25 Koia ʼi tanatou mole manatu tahi, neʼe natou mavae leva. Neʼe ui leva e Paulo:

“ ʼE moʼoni ʼosi te palalau ʼae neʼe fai e te laumalie maʼoniʼoni ki ʼakotou kui ʼaki te polofeta ko Esaia, 26 ʼi tana ui: ‘Alu ki te hahaʼi ʼaeni pea ke ui: “ ʼE kotou logo anai kae ʼe mole kotou mahino tuʼa tahi anai ki ai, pea ʼe kotou sisio anai kae ʼe mole kotou malama tuʼa tahi anai ki ai.+ 27 Koteʼuhi kua liliu te hahaʼi ʼaeni ʼo lotofefeka, mo fakataliga tuli pea mo natou moeʼi ʼonatou mata, ke ʼaua naʼa natou sisio, mo logo, mo mahino, mo malave ki ʼonatou loto, pea mo tafoki mai ke au fakamalolo natou.” ’+ 28 Koia ke kotou iloʼi ʼe tala ki te hahaʼi ʼae ʼe mole Sutea te logo ʼaeni ʼo ʼuhiga mo te haofaki e te ʼAtua ia te hahaʼi,+ pea ʼe mahino ia ʼe natou fagono anai ki ai.”+ 29* ——

30 Neʼe nofo lolotoga taʼu ʼe lua ʼi te fale ʼaia neʼe ina totogi.+ Neʼe ina fakatalitali lelei ia natou fuli ʼae neʼe olo age kia ia, 31 ʼo ina fakamafola age kia natou te Puleʼaga ʼo te ʼAtua pea mo ina akoʼi natou ʼo ʼuhiga mo te ʼAliki ko Sesu Kilisito,* ʼo palalau mo he lototoʼa+ pea mo faʼifaʼitaliha.