Sopo
32 Neʼe mole kei faigaʼi leva e te ʼu tagata ʼaia ʼe tolu ke natou tali kia Sopo, he neʼe tui papau ia ʼe faitotonu.+ 2 Neʼe kovi te ita ʼo Eliu te foha ʼo Palakele te tagata mai Puse,+ mai te famili ʼo Lame. Neʼe ita lahi kia Sopo he neʼe faiga ia ke ina fakaha ko ia ʼae ʼe faitotonu kae mole ko te ʼAtua.+ 3 Neʼe toe ita lahi ki te ʼu kaumeʼa ʼe tolu ʼo Sopo, he neʼe mole natou maʼu he tali kae neʼe natou ui ko te ʼAtua ʼae ʼe lakahala.+ 4 ʼUhi ʼae neʼe kua natou matuʼa age ia ia, neʼe talitali ia ke palalau kia Sopo.+ 5 Neʼe ita ia Eliu ʼi tana sio ʼae ʼe mole maʼu e te ʼu tagata ʼaia ʼe tolu hanatou tali. 6 Pea neʼe palalau leva ia Eliu te foha ʼo Palakele, te tagata mai Puse, ʼo ina ui:
“ ʼE kei au tamasiʼi,
Kae kua matuʼa koutou.+
Koia ʼae neʼe au fakaʼapaʼapa ai ʼo mole au palalau atu,+
Neʼe mole au lava fakaha atu te meʼa ʼae ʼe au iloʼi.
7 Neʼe au manatu: ‘ ʼE tonu ke palalau muʼa te kau matuʼa,
Ko natou ʼae ʼe lahi ʼonatou taʼu ʼae ʼe tonu ke natou fakaha te poto.’
8 Kae ʼe ko te laumalie maʼoniʼoni ʼae ʼe foaki e te ʼAtua ki te hahaʼi,
Ia te tuku manava ʼa te Mafimafi, ʼae ʼe ina foaki ki te hahaʼi te ʼatamai.+
9 ʼE mole maʼu pe te poto ʼi te lahi ʼo te taʼu,
ʼE mole gata pe ki te kau matuʼa te mahino ki te meʼa ʼae ʼe totonu.+
10 Koia ʼae ʼe au ui ai: ‘Fakalogo mai,
Ke au toe fakaha atu mo au te meʼa ʼae ʼe au iloʼi.’
11 Neʼe au talitali ke ʼosi ʼakotou palalau,
Neʼe au fakalogo lelei ki ʼakotou faʼahiga fakakaukau,+
Kae neʼe kotou kumi hakotou faʼahiga tali.+
12 Neʼe au fakalogo lelei kia koutou,
Kae neʼe mole fakaha e he tahi ia koutou ʼe faihala ia Sopo,
Peʼe tali ki ʼana manatu.
13 Koia ʼaua naʼa kotou ui: ‘Neʼe matou maʼu te poto,
ʼE ko te ʼAtua ʼae ʼe ina fakatonutonuʼi ia ia, ʼe mole ko he tagata.’
14 Neʼe mole palalau fakahagatonu mai kia au.
Koia ʼe mole au fakaʼaogaʼi anai ʼakotou manatu moʼo tali ki ai.
15 Kua lotomamahi te ʼu tagata ʼaia, ʼe mole kei natou iloʼi hanatou faʼahiga tali,
ʼE mole kei ʼi ai hanatou manatu.
16 Neʼe au talitali kae neʼe mole toe palalau he tahi,
ʼE natou nonofo noa, ʼo mole gu he tahi.
17 Koia, ko toku temi palalau ʼaeni.
Mo au foki la, ʼe au fakaha atu anai te meʼa ʼae ʼe au iloʼi,
18 He ʼe lahi ʼaku manatu,
ʼE uga au e te laumalie maʼoniʼoni.
19 ʼE hage toku fatu ko te vino ʼae ʼe fakamaʼumaʼu,
ʼE hage ko ni ʼaiʼaga vino foʼou kua vave pa.+
20 ʼE au palalau anai ke au fimalie,
ʼE au avahi anai toku gutu ke au tali.