Senesi
13 Neʼe mavae ai leva ia Apalamo ʼi Esipito ʼo alu ki te Nekepe,+ mo tona ʼohoana, mo te ʼu koloa fuli ʼae neʼe ina maʼu, pea mo Lote. 2 Neʼe lahi ʼaupito te faga manu ʼa Apalamo, mo tana siliva pea mo tana aulo.+ 3 Neʼe alu tona fagona mai te Nekepe ʼo kaku ki Petele, ʼo ina fehikiʼaki aipe tona nofoʼaga mai ʼae potu ki ʼae potu. Neʼe tau leva ki te koga meʼa ʼae neʼe ina ʼuluaki fakatuʼu ai tona fale la, ʼi te vaha ʼo Petele pea mo Ai.+ 4 Neʼe ko te potu ʼaia neʼe ina laga ai he ʼaletale. Pea neʼe fetapa ai ia Apalamo ki te huafa ʼo Sehova.
5 Neʼe faifagona ia Lote mo Apalamo, pea neʼe toe maʼu foki e Lote tana faga ovi, mo tana faga pipi, pea mo ʼona fale la. 6 Neʼe mole feala ai ke natou nonofo fakatahi ʼi te koga meʼa ʼaia koteʼuhi neʼe kua lahi ʼaupito ʼonatou koloa. 7 Koia, neʼe hoko ai he kē ʼi te kau tagata tauhi manu ʼa Apalamo pea mo te kau tagata tauhi manu ʼa Lote. (ʼI te temi ʼaia, neʼe nonofo te kau Kanaane mo te kau Pelesite ʼi te fenua.)+ 8 Neʼe ui leva e Apalamo kia Lote:+ “Fakalelei siʼou loto, ke ʼaua naʼa ta fekēʼaki, ʼo feia pe mo ʼaku tagata tauhi manu pea mo ʼau tagata tauhi manu, he ʼe ta tau tehina. 9 ʼE feala ke ke filifili te koga meʼa ʼae ʼe ke fia nofo ai ʼi te fenua. Fakalelei siʼou loto, kae ʼe lelei age ke ke mavae ia au. Kapau ʼe ke alu ki te faʼahi hema, pea ʼe au alu anai ki te faʼahi mataʼu. Pea kapau ʼe ke alu ki te faʼahi mataʼu, pea ʼe au alu anai ki te faʼahi hema.” 10 Neʼe hiki ai e Lote ʼona mata pea mo sio ki te koga fenua katoa ʼo te Solotane+ ʼo kaku ki Tesoa.+ Ko te ʼu fenua ʼaia neʼe lahi ai te vai, ohage ko te ʼoloto ʼo Sehova+ pea mo te fenua ʼo Esipito (ʼi muʼa ʼo te fakaʼauha e Sehova ia Sotoma mo Komola). 11 Koia neʼe filifili ai e Lote maʼa ia te koga fenua katoa ʼo te Solotane, pea neʼe ina hiki leva tona nofoʼaga ki te potu esite. Pea neʼe nā mavete ai. 12 Neʼe maʼuli ia Apalamo ʼi te fenua ʼo Kanaane, kae neʼe maʼuli ia Lote ʼo ovi ki te ʼu kolo ʼo te koga fenua ʼo te Solotane.+ Ki muli age, neʼe ina fakatuʼu leva tona fale la ʼo ovi ki Sotoma. 13 Neʼe agakovi te hahaʼi ʼo Sotoma, pea neʼe natou agahala mamafa kia Sehova.+
14 Pea neʼe ui leva e Sehova kia Apalamo ʼi te ʼosi mavae ʼa Lote: “Fakalelei siʼou loto, hiki ake ʼou mata pea mo ke sio mai mai te faʼahi ʼae ʼe ke tuʼu ai, ki te potu noleto mo te potu saute, pea mo te potu esite mo te potu uesite, 15 koteʼuhi ko te fenua katoa ʼae ʼe ke sio ki ai, ʼe au foaki atu anai kia koe pea mo tou hakoga ʼo talu ai.+ 16 Koia ʼe au fakaliliu anai tou hakoga ke kaugamalie ohage ko te efu ʼo te kele, pea kapau neʼe feala ke lau e he tahi te efu ʼo te kele, ʼe feala anai ke lau te kaugamalie ʼo tou hakoga.+ 17 Koia tuʼu ake, ʼo alu ʼi te fenua katoa, he ʼe au foaki atu anai kia koe.” 18 Pea neʼe hoko atu pe te maʼuli ʼa Apalamo ʼi te ʼu fale la. Ki muli age, neʼe alu leva ʼo nofo ovi ki te ʼu fuʼu ʼakau lalahi ʼo Mamele,+ ʼae ʼe tuʼu ʼi Hepelone,+ pea neʼe ina laga ai he ʼaletale maʼa Sehova.+