Numelo
36 Neʼe fakaovi mai te ʼu pule famili ʼo te hologa ʼo Kileate, te foha ʼo Makile,+ te foha ʼo Manase, ʼi te ʼu famili ʼo te ʼu foha ʼo Sosefo pea mo natou palalau ia muʼa ʼo Moisese pea mo te ʼu pule ʼo te kau Iselaele. 2 Neʼe natou ui: “Siʼomatou ʼaliki, neʼe fakatotonu atu e Sehova ke ke vaevae te fenua ʼo fai ni toho+ ke liliu ko he tofiʼa ki te kau Iselaele. Pea siʼomatou ʼaliki, neʼe fakatotonu atu e Sehova ke ke foaki te tofiʼa ʼo tomatou tehina ko Selofati ki ʼona ʼofafine.+ 3 Kae kapau ʼe natou ʼohoana mo he ʼu tagata ʼo he tahi age telepi ʼo Iselaele, ʼe toʼo anai te tofiʼa ʼo te ʼu fafine ʼaia mai te tofiʼa ʼo ʼamatou tamai ʼo hilifaki ki te tofiʼa ʼo te telepi ʼae ʼe natou ʼohoana anai ki ai. ʼE puli ai anai he vahe ʼo te tofiʼa ʼae neʼe foaki mai kia matou. 4 Pea ka hoko anai te Supileo*+ maʼa te hahaʼi ʼo Iselaele, ʼe hilifaki anai te tofiʼa ʼo te ʼu fafine ʼaia ki te tofiʼa ʼo te telepi ʼae ʼe natou ʼohoana anai ki ai, ʼo natou maʼu ʼo talu ai. ʼE puli ai anai he vahe ʼo te tofiʼa ʼae neʼe foaki ki te telepi ʼo ʼamatou tamai.”
5 Neʼe fai leva e Moisese te ʼu fakatotonu ʼaeni ki te kau Iselaele, ohage ko tona fakatotonu age e Sehova: “ ʼE tonu te meʼa ʼae ʼe ui e te telepi ʼo te ʼu foha ʼo Sosefo. 6 Koʼeni te meʼa ʼae ʼe fakatotonu e Sehova ʼo ʼuhiga mo te ʼu ʼofafine ʼo Selofati: ‘ ʼE feala pe anai hanatou ʼohoana mo he ʼu tagata ʼe natou loto ki ai. Kae kehe pe ko he ʼu tagata ʼo he famili ʼo te telepi ʼo tanatou tamai. 7 ʼE mole tonu anai ke tuku te tofiʼa ʼo he telepi ʼo Iselaele ki he tahi age telepi, koteʼuhi ʼe tonu anai ke tahi taupau e te kau Iselaele te tofiʼa ʼo te telepi ʼo ʼanatou kui. 8 Pea ko te taʼahine ʼae ʼe maʼu tofiʼa ʼi te ʼu telepi ʼo Iselaele, ʼe tonu anai ke ʼohoana mo he tagata ʼe kau ki te hologa ʼo te telepi ʼo tana tamai,+ ke taupau ai e te kau Iselaele te tofiʼa ʼo ʼanatou kui. 9 ʼE mole tonu anai ke tuku te tofiʼa ʼo he telepi ki he tahi age telepi, koteʼuhi ʼe tonu anai ke tahi taupau e te ʼu telepi ʼo Iselaele tona tofiʼa.’ ”
10 Neʼe fai e te ʼu ʼofafine ʼo Selofati ʼo mulimuli pe ki te meʼa ʼae neʼe fakatotonu e Sehova kia Moisese.+ 11 Koia, neʼe ʼohoana ai te ʼu ʼofafine ʼo Selofati,+ ʼae ko Masela, mo Tilitesa, mo Okala, mo Milika pea mo Noa mo te ʼu foha ʼo te ʼu tehina ʼo tanatou tamai. 12 Neʼe natou ʼohoana mo he ʼu tagata ʼo te ʼu famili ʼo Manase, te foha ʼo Sosefo, ke taupau ai tonatou tofiʼa e te telepi ʼo te famili ʼo tanatou tamai.
13 ʼE ko te ʼu fakatotonu mo te ʼu lao ʼaia neʼe foaki e Sehova ki te kau Iselaele ʼaki ia Moisese, ʼi te toafa ʼo Moape, ʼae ʼe ovi ki te Solotane pea ʼe haga ki Seliko.+