Senesi
48 Hili te ʼu meʼa ʼaia, neʼe fakaha kia Sosefo: “Koʼeni kua kovi tau tamai.” Neʼe ina ʼave ai ʼona foha ʼe lua ko Manase mo Efalaimi+ kia Sakopo. 2 Pea neʼe fakaha kia Sakopo: “Koʼeni tou foha ko Sosefo ʼe haʼu kia koe.” Koia neʼe faiga malohi ai ia Iselaele ke tuʼu ake ʼo heka ʼi tona palepale. 3 Neʼe ui leva e Sakopo kia Sosefo:
“Neʼe ha mai te ʼAtua Mafimafi kia au ʼi Lusi ʼi te fenua ʼo Kanaane pea neʼe ina tapuakiʼi au.+ 4 Neʼe ina ui mai: ‘ ʼE au fakaliliu anai tou hakoga ʼo kaugamalie, pea ʼe au fakaliliu anai koe ko he puleʼaga lahi.+ ʼE au foaki anai ki tou hakoga te fenua ʼaeni ke natou maʼu ʼo talu ai.’+ 5 Ko ʼou foha ʼe lua ʼae neʼe tutupu ʼi te fenua ʼo Esipito ʼi muʼa ʼo taku haʼu ki Esipito ʼe ʼaʼaku.+ ʼE liliu anai ia Efalaimi mo Manase ko ʼoku foha ohage pe ko Lupeni mo Simeone.+ 6 Kae ko te ʼu fanau ʼae ka ke maʼu ki ʼamuli, ʼe ʼa koe. ʼE fakahigoaʼi anai natou ki ʼonatou tehina ʼe lua pea ʼe natou maʼu honatou vahe mai tonā tofiʼa.+ 7 Pea ʼi taku mavae mai Patane, neʼe mate leva ia Lasele+ ʼi ʼoku tafa ʼi te fenua ʼo Kanaane, kae neʼe kei matou mamaʼo mo Efata.+ Pea neʼe au tanu ia ia ʼi te ala ʼae ʼe alu ki Efata, ʼae ko Petelehemi.”+
8 Neʼe sio leva ia Iselaele ki te ʼu foha ʼo Sosefo pea neʼe ina fehuʼi: “Ko ai ia naua ʼaeni?” 9 Neʼe tali age e Sosefo ki tana tamai: “ ʼE ko ʼoku foha ʼae neʼe foaki mai e te ʼAtua kia au ʼi te fenua ʼaeni.”+ Neʼe ina ui age ki ai: “Fakalelei siʼou loto, ke ke fakaovi mai ia naua ke au tapuakiʼi naua.”+ 10 Neʼe kua matuʼa ia Iselaele pea neʼe mole kei sio lelei, neʼe kua hage pe ʼe kivi. Neʼe fakaovi e Sosefo ia naua ki ai, pea neʼe ʼuma mo faʼufua kia naua. 11 Neʼe ui e Iselaele kia Sosefo: “Neʼe mole au manatu ʼe au toe sio anai ki ʼou fofoga,+ kae koʼeni kua toe fakagafua mai e te ʼAtua ke au sio ki tou hakoga.” 12 Neʼe fakamamaʼo leva e Sosefo ia naua mai tana tamai,* pea neʼe tulolo ki te kele.
13 Pea neʼe puke e Sosefo ia Efalaimi+ ʼi tona nima mataʼu pea mo Manase+ ʼi tona nima hema. Neʼe ina fakaovi leva ʼona foha ʼe lua kia Iselaele. Neʼe ina fakatuʼu ia Efalaimi ʼi te faʼahi hema ʼo Iselaele kae ko Manase ʼi te faʼahi mataʼu ʼo Iselaele. 14 Kae neʼe hili e Iselaele tona nima mataʼu ki te ʼulu ʼo Efalaimi, logo la neʼe ko ia te muli, pea neʼe ina hili tona nima hema ki te ʼulu ʼo Manase. Neʼe ina hili feia ʼona nima, logo la neʼe ina iloʼi lelei pe neʼe ko Manase te muʼa.+ 15 Pea neʼe ina tapuakiʼi ia Sosefo ʼo ina ui:+
“Neʼe haʼele+ taku kui ko Apalahamo mo taku tamai ko Isaake ia muʼa ʼo te ʼAtua moʼoni pea ʼe au kole kia te ia,
Te ʼAtua moʼoni ʼae neʼe hage ko haku tagata tauhi ovi ʼi toku maʼuli katoa ʼo kaku mai ki te ʼaho nei,+
16 Ia Ia ʼae neʼe ina fekauʼi mai tana ʼaselo ke ina haofaki au mai ʼoku malaʼia fuli,+ ke ʼofa ʼo tapuakiʼi te ʼu tama ʼaeni,+
Ke feala ʼaki ia naua ʼaia, ke manatuʼi e te hahaʼi toku higoa, mo te higoa ʼo taku kui ko Apalahamo mo taku tamai ko Isaake,
Pea ke liliu ʼonā hakoga ʼo kaugamalie ʼi te kele.”+
17 ʼI te sio ʼa Sosefo neʼe hili pe te nima mataʼu ʼo tana tamai ʼi te ʼulu ʼo Efalaimi, neʼe mole ina leleiʼia. Koia, neʼe faiga ai ke ina toʼo te nima ʼo tana tamai mai te ʼulu ʼo Efalaimi ʼo hili ki te ʼulu ʼo Manase. 18 Neʼe ui e Sosefo ki tana tamai: “Siʼaku tamai, ʼe mole tonu ke feia, he ʼe ko ia ʼaeni te muʼa.+ Hili tou nima mataʼu ki tona ʼulu.” 19 Kae neʼe mole loto ki ai tana tamai ʼo ina ui age: “ ʼE au iloʼi, siʼoku foha, ʼe au iloʼi. ʼE toe liliu anai mo ia ko he hahaʼi kaugamalie, pea ʼe toe liliu anai ʼo maʼuhiga. Kae ʼe liliu anai tona tehina muli ʼo maʼuhiga age ia ia,+ pea ʼe liliu anai tona hakoga ko he ʼu puleʼaga.”+ 20 Neʼe hoko atu pe tana tapuakiʼi ia naua ʼi te ʼaho ʼaia,+ ʼo ina ui:
“Ke talanoa te kau Iselaele ʼo ʼuhiga mo koe moka natou tala he ʼu tapuakina, pea ke natou ui:
‘Ke tapuakiʼi koe e te ʼAtua ohage ko tana tapuakiʼi ia Efalaimi mo Manase.’ ”
Neʼe ina haga fakamuʼamuʼa aipe ia Efalaimi ia Manase.
21 Neʼe ui leva e Iselaele kia Sosefo: “Koʼeni kua au vave mate,+ kae ʼe nofo moʼoni anai te ʼAtua mo koutou pea ʼe ina fakaliliu anai koutou ki te fenua ʼo ʼakotou kui.+ 22 ʼE au foaki atu hou tahi koga fenua, ʼi te meʼa ʼae kua ke maʼu mo ʼou tehina. ʼE ko te koga fenua ʼaia neʼe au toʼo mai te ʼu nima ʼo te kau Amole ʼaki taku heleta mo taku nahau.”